Inihayag ni Senador Koko Pimentel na ang Malacañang na ang dapat umaksyon at magpasya pagdating sa pagsuspindi sa buwis na ipinapataw sa produktong petrolyo.
Ayon sa senador, matagal pang proseso kapag idinaan sa legislation ang pagsuspinde sa buwis sa langis.
Aniya, dapat mabilis ang aksyon ng ehekutibo at dapat na handa itong isakripisyo ang bahagi ng kita ng gobyerno sa kasalukuyang sitwasyon.
Iginiit pa ni Pimentel na nagagawa namang mag shortcut ng gobyerno o ng ehekutibo sa maraming bagay kaya bakit hindi ito magagawa sa excise tax sa petrolyo kung ito naman ang kailangan upang maibsan ang presyo nito.
Una rito, hiniling ni Pangulong Rodrigo Duterte na repasuhin ang oil deregulation law upang mas magkaroon ng poder ang gobyerno sa pagbabantay sa presyo at pagtiyak ng suplay ng petrolyo. – —ulat mula kay Cely Ortega Bueno (Patrol 19)
