Iniimbestigahan na ng Mandaluyong City Police ang pagkamatay ng disi otso anyos na househelper sa isang condominium unit sa Mandaluyong City.
Nakitaan ng mga pasa sa ulo, hita at indikasyon na sinakal ang biktimang si Selveliza “darlyn” Parba nang madiskubre ng kapwa househelper na si Bella Cereno, sa kwarto ng kanilang amo noong Biyernes ng umaga.
Ayon kay Senior Supt. Joaquin Alva, hepe ng Mandaluyong city police, dinala pa sa Victor R. Potenciano Medical center si Parba subalit binawian ng buhay alas onse singkwenta’y singko.
Kapwa stay-in maids sa 3rd floor unit ng El Dorado Tower 3, California Garden, sa barangay Highway Hills ang biktima at si Cereno.
Sa salaysay ni Cereno, naiwang mag-isa sa unit si Parba noong Biyernes ng umaga subalit nang bumalik siya ay nakitang nakahandusay sa ibabaw ng kama ang dalaga.
Inaalam na kung sino ang posibleng nasa likod ng pamamaslang sa biktima.
By: Drew Nacino
