Pumalag ang pamahalaang lungsod ng Valenzuela sa paglalabas ng provisional business permit sa Kentex Manufacturing Corporation, ang may-ari ng nasunog na pabrika ng tsinelas sa nasabing lungsod.
Ayon kay Valenzuela City Mayor Rex Gatchalian, nagpadali kasi sa pagkuha ng business permit ang nilagdaang Joint Memorandum Circular ng Department of Interior and Local Government o DILG at ng Department of Trade and Industry o DTI laban sa red tape noong 2010.
Aniya, maaaring magbigay ng business permit ang lokal na pamahalaan habang may isang taong palugit naman ang mga ahensya ng gobyerno tulad ng Bureau of Fire Protection na magsagawa ng post audit sa mga negosyo para matiyak na sinusunod ng mga ito ang mga itinakdang alituntunin.
Magugunitang isiniwalat ng BFP na naipatatakbo ng naturang kumpaniya ang nasunog na gusali nang walang fire safety inspection certificate mula sa nabanggit na ahensya.
By Jaymark Dagala
