Asahan na ang mas mabilis na pagbabayad ng toll fee sa North Luzon Expressway at Subic Clark Tarlac Expressway.
Sa gitna na rin ito nang inaasahang pagdagsa ng mga motoristang uuwi ng mga lalawigan sa Luzon sa paggunita ng Semana Santa sa susunod na linggo.
Nakumpleto na ang integration ng koleksyon ng toll fee ng NLEX at SCTEX kung saan ang motorista ay kukuha ng ticket sa point of entry niya o kung saan siya papasok at magbabayad na lamang ng toll fee sa exit o nangangahulugan na dalawang toll gate na lamang ang dadaanan.
Taliwas ito sa nakasanayan na kung saan ang motorista ay dadaan sa limang toll gate mula Balintawak hanggang Subic.
Ipinabatid ng Manila North Tollways Corporation na gumastos sila ng P650 million pesos sa integration project subalit wala namang ikakasang dagdag singil para rito.
Tinatayang 200,000 sasakyan ang dumadaan sa NLEX araw-araw at 30,000 naman sa SCTEX.
By Judith Larino