Ipinauubaya na ni bagong talagang Tourism Secretary Bernadette Romulo-Puyat sa tanggapan ng Ombudsman ang pag-iimbestiga at posibleng pagsasampa ng kaso laban sa kanyang sinundan na si dating Secretary Wanda Teo.
Ayon kay Puyat, wala siyang planong silipin pa ang lahat ng kontratang pinasok ni Teo at sa halip aniya ay magpatuloy na lamang siya sa pagtatrabaho.
Iginiit pa ni Puyat na ang Ombudsman ang tamang ahensiya na dapat mag-imbestiga at humawak sa kaso ni Teo.
Gayunman, sinabi ni Puyat, kanya pa ring susuriin kung may mga nasimulang proyekto si Teo na mapatutunayang hindi dumaan sa tamang proseso.
Magugunitang, inihayag ng Ombudsman na kanilang nang sinimulan ang pag-iimbestiga kay Teo matapos na masangkot kontrobersiya hinggil sa 60 milyong pisong advertisement deal ng DOT sa PTV-4 na napunta sa programa ng kapatid nito.
—-
