Opisyal nang isinilbi ni Valenzuela City Mayor Rex Gatchalian ang suspension order sa business permit ng North Luzon Expressway (NLEX).
Ito ay matapos mabigo ang NLEX sa tumugon sa kautusan ni Gatchalian na maglatag ng action plan hinggil sa mabigat na trapiko na idinudulot ng problema sa sistema ng RFID.
Pasado alas 5:00 ng hapon nang magtungo si Gatchalian sa Mindanao Avenue toll plaza ng NLEX para personal na iabot ang suspension order.
Ayon kay Gatchalian, dapat magpatupad ng toll holiday o manatili pa ring bukas ang mga toll gate ng NLEX kahit suspendido ang business permit nito.
Iginiit ni Gatchalian, aalisin lamang ang suspension order kapag naresolba na ng NLEX ang nararanasang problema sa RFID sa mga toll plaza na nagreresulta ng mabigat na trapiko.
