Hinimok ng Department of Health (DOH) ang mga laboratoryo sa bansa na manatiling bukas at maipagpatuloy ang pag-proseso ng mga specimen para sa COVID-19 tests kahit holiday.
Ito ay upang matiyak na maitatala ang eksaktong bilang ng mga bagong kaso ng COVID-19 sa bansa kada araw.
Ayon kay Health Undersecretary Maria Rosario Vergeire, kanilang napuna na bumaba ang bilang ng naisusumiteng resulta ng COVID-19 tests ng mga laboratoryo nitong mga nakaraang araw.
May ilang pasyente rin aniyang mas piniling huwag nang magtungo ng laboratoryo ngayong holiday habang sarado naman ang ibang disease reporting units kung saan kumukuha rin ng specimen.
Gayunman, sinabi ni Vergeire na hindi pa nila matiyak sa ngayon kung magreresulta sa paglobo ng kaso ng COVID-19 ang pansamantalang pagsasara ng mga laboratoryo ngayong Kapaskuhan.
Batay sa tala ng DOH, bumaba sa mahigit 14,000 ang bilang ng mga indibidwal na nagpa-test noong araw ng Pasko at mas bumaba pa ito sa mahigit 13,000 at 11,000 noong December 26 at 27.
