Nanindigan si Marikina Representative Stella Quimbo na dapat ding isama sa prayoridad ng pamahalaan na mabakunahan kontra COVID-19 ang mga guro sa bansa.
Sa inihaing house joint resolution number 35 ni Quimbo, hinimok nito ang pamahalaan na isama sa A4 priority group ang mga guro para mabakunahan kontra COVID-19.
Mababatid kasi na sa ngayon ay nasa B1 priority group ang mga guro na dapat ani Quimbo na nasa A4 priority group ang mga ito dahil maituturing na frontliners ang mga guro sa mahalagang sektor ng edukasyon.
Giit pa ni Quimbo na sa pagbabakuna sa mga guro, mangangahulugan ito na makababalik na sa face-to-face classes ang bansa sa lalong madaling panahon.
Sa huli, nanawagan si Quimbo sa kapwa niya mambabatas na suportahan ang kanyang panukala.
