Tiwala ang Employers’ Confederation of the Philippines (ECOP) na makakatulong ang mga biyahe ni Pangulong Bongbong Marcos Jr., sa ibang bansa upang matugunan ang pagdami ng mga walang trabaho sa bansa.
Sa panayam ng DWIZ, sinabi ni Sergio Ortiz-Luis Jr., pangulo ng ECOP, na malaki ang maitutulong nito upang makapag-uwi ng investments sa bansa na makalilikha ng maraming trabaho.
Paliwanag pa ni Ortiz-Luis na nakakadagdag sa bilang ng mga walang trabaho ang mga estudyanteng nagtatapos taon taon gayundin ang mga sektor na naaapektuhan ng kalamidad.
Sa datos ng Philippine Statistics Authority, umakyat sa 5.3% ang unemployment rate sa bansa noong Agosto, o katumbas ng 2.68 milyong Pilipino na walang trabaho.
Sinabi pa ni Ortiz-Luis na manageable pa rin ang 6.9% na inflation rate na naitala noong Setyembre.
Batay aniya ito sa kanilang isinagawang pag-aaral kaugnay sa inflation, kung saan, ikinikunsiderang manageable ang 5% hanggang 8%.
