Patuloy pa ring mararanasan ang maulap na kalangitan na may kalat-kalat na pag-ulan, pagkulog at pagkidlat sa Northern at Central Luzon.
Ayon kay PAGASA weather specialist Veronica Torres, magiging maganda ang panahon sa nalalabing bahagi ng Luzon maliban nalang sa posibleng thunderstorm sa hapon at gabi.
Asahan naman ang maaliwalas na panahon sa Visayas maliban nalang sa posibleng thunderstorms sa hapon hanggang sa gabi.
Maganda din ang panahon sa Mindanao kung saan, makakaranas ng mainit na panahon sa umaga hanggang tanghali habang posibleng makaranas ng thunderstorms pagsapit naman ng hapon hanggang sa gabi.
Wala namang nakataas na gale warning ang PAGASA kaya’t malayang makakapalaot ang mga kababayan nating mangingisda at maliliit na sasakyang pandagat.
Agwat ng temperatura sa Metro Manila ay maglalaro sa 25°C hanggang 33°C habang sisikat naman ang haring araw mamayang 5:39 ng umaga at lulubog naman ito mamayang 6:24 ng hapon.