Arestado ang magkasintahan matapos maaktuhang nagbebenta ng shabu na nagkakahalaga ng mahigit kalahating milyong piso.
Ayon sa Barangay Tugatog, Orani, Bataan, nagsagawa sila ng operasyon kasama ang mga pulis matapos makatanggap ng impormasyon hinggil sa ilegal na gawain ng mga suspek.
Ayon sa awtoridad, naging maugong umano ang mga pangalan ng magkasintahan sa bentahan ng ilegal na droga.
Dahil dito, isinailalim sa surveillance ang magkasintahang sina Nash Amerol “alyas Sadam”, 27-anyos at Regiena Bautista, 38-anyos at napag-alaman na halos kalalaya lamang umano mula sa bilangguan ang dalawa dahil din sa kasong ilegal na droga.
Nasamsam sa kanila ang nasa 100 gramo ng hinihinalang shabu, isang maliit na pakete ng shabu na nabili umano ng undercover na police sa mga suspek at marked money na ginamit sa buy bust operation.
Kasong paglabag sa RA 9165 o Comprehensive Dangerous Drugs Act of 2002 ang kahaharapin ng magkasintahan.— sa panulat ni Angelica Doctolero
