Iginiit ni Senate President Pro Tempore at Senate Blue Ribbon Committee Chairman Panfilo “Ping” Lacson na ang Kongreso ang may “original sin” kaya naging impyerno ang buhay ng karaniwang Pilipino dahil sa pagbaha bunga ng korapsyon, mga palpak at guni-guning flood control projects.
Ayon kay Sen. Lacson, ang lohikal na konklusyon ng imbestigasyon ng Senado ay dapat umabot sa may “original sin.”
Anya, kailangang makita na umabot ang imbestigasyon sa pinagmulan ng sinasabing katiwalian.
Kung hindi anya nag-insert ang mga kongresista at mga senador, walang pondong pagkukunan ang tiwaling opisyal sa Department of Public Works and Highways.
Umabot anya sa sukdulan at naging systemic ang korupsyon kung saan pati ang mga minor functionaries, planning, mga section chiefs, ay naghahanapbuhay na rin.
Pamumunuan muli ni Sen. Lacson ang panibagong pagdinig ng Senate Blue Ribbon Committee ngayong araw, Setyembre a-bente tres.
Hiniling ni Sen. Lacson na i-adjust sa 4 p.m. ang pagsisimula ng sesyon mamaya para magkaroon ng mas mahabang panahon ang pagdinig.
