Nilinaw ng AFP o Armed Forces of the Philippines ang naging direktiba ng Pangulong Rodrigo Duterte na pag-okupa sa mga islang nasa teritoryo ng bansa sa West Philippine Sea.
Ayon kay AFP Spokesman Brigadier General Restituto Padilla, ang nais ng Pangulo ay ayusin ang kondisyon ng pamumuhay sa nasabing teritoryo ng bansa.
Kabilang dito aniya ang pag-aayos ng mga pasilidad tulad ng barracks at mapagkukunan ng mga inuming tubig.
“Sa mga nakatalaga diyan at nagbabantay, maayos na barracks, maayos na pinagkukunan ng tubig, freshwater, mga post storage plants na makakatulong sa ating mga mangingisda na patuloy na nangingisda diyan para maging maayos ang kanilang mga huli at makaabot ng maayos sa ating fish markets at iba pa pong imprastraktura na susuporta sa ating mga mamamayan na nakatira sa lugar.” Pahayag ni Padilla
Samantala, naniniwala ang AFP na hindi magdudulot ng tensyon sa West Philippine Sea ang plano ni Pangulong Rodrigo Duterte na maglagay ng bandila ng Pilipinas sa Pag-asa Island.
Ayon kay Padilla, ito ay dahil una nang nagpahayag ang China ng pagiging bukas sa bilateral consultation kaugnay ng mga pinag-aagawang isla sa West Philippine Sea.
Sinabi rin ni Padilla, kung sakaling matuloy ang plano ng Pangulo, ito ang magiging kauna-unahang pagkakataon na may magtutungong pinakamataas na opisyal ng bansa sa nasabing lugar.
Una nang iniutos ni Pangulong Duterte ang pag-okupa at pagpapalakas ng presensiya ng militar sa mga teritoryong pag-aari ng Pilipinas sa West Philippine Sea sa kanyang pagdalaw sa Camp General Artemio Ricarte sa Puerto Princesa City sa Palawan.
By Judith Larino | Ratsada Balita (Interview)
