Ipinauubaya na ng Malakanyang sa Kongreso ang isyu ng impeachment laban kay Chief Justice Maria Lourdes Sereno.
Ito ang binigyang – diin ni Presidential Spokesman Harry Roque kasunod ng pagbasura ni Sereno sa panawagang magbitiw na lamang ito sa puwesto upang iligtas ang hudikatura sa mas matinding kahihiyan dulot ng impeachment.
Ayon kay Roque, kinikilala nila ang tugon ng Punong Mahistrado at hahayaan na lamang nila ito kung ayaw nitong makinig sa kanyang panawagan.
Dahil aniya sa pagmamatigas ni Sereno, kailangan nang ituloy ang constitutional process para mapatalsik siya sa puwesto.
Kumbinsido naman si Roque na masisipa sa puwesto bilang Chief Justice si Sereno dahil sa mga matibay na ebidensya.
