Si Congressman Lord Allan Velasco ang magiging susunod na house speaker kung gugustuhin ito ng Pangulong Rodrigo Duterte.
Ayon kay House Speaker Alan Peter Cayetano, kaya’t nais niyang payuhan si Velasco na magtrabaho na lamang siya, huwag magsiraan at huwag mag-intrigahan.
Hindi rin aniya dapat matakot si Velasco na maging susunod na speaker of the house dahil mangyayari ito kung gugustuhin nga ng pangulo na siyang pinuno ng kanilang koalisyon.
Ang pahayag ni Cayetano ay kasunod na rin ng akusasyon nitong nagtatrabaho si Velasco para mapaalis siya bilang house speaker sa pamamagitan nang pag-aalok ng chairmanship posts sa mga kongresista gayundin ang dagdag na budget sa kani-kanilang mga distrito.
Una nang nakipagpulong si Cayetano sa mga kongresista ng Nacionalista Party at National Union Party kagabi at tinutukan nila ang direksyon at mga repormang isinulong niya bilang pinuno ng Kamara.
