Naaresto ng pulisya ang isang hinihinalang sub leader ng Abu Sayyaf Group (ASG) sa barangay Caliran, Mabuhay Zamboanga Sibugay.
Kinilala ang umano’y lokal na terorista na si Jamiul Nassalon.
Ayon kay Police Regional Office 9 Chief Police Brig. General Jesus Cambay, gumagamit si Nassalon ng iba’t-ibang alyas tulad ng Ustad Amih, Abu Harris, Abu Janar at Abu Jamih.
Aniya, inaresto si Nassalon sa bisa ng warrant of arrest sa kasong serious illegal detention with ransom, multiple attempted murder at attempted murder.
Sinasabing naging miyembro ng Abu Sayyaf si Nassalon noong 2009 kung saan naging bahagi ito sa mga notorius na krimen lalo na sa Zamboanga City.
Ito ang tinukoy mastermind sa pagdukot at pagpugot sa isang kinilalang Doroteo Gonzales noong 2009 at sangkot dinito sa pambobomba sa isang bus terminal sa Guiwan noong 2012.
