Tatanggap ng 1,000 pesos na insensitibo ang higit 900,000 na mga guro sa pampublikong paaralan sa bansa sa pagdiriwang ng World Teachers’ Day sa October 5.
Ito ang inihayag ni Quezon City Rep. Marvin Rillo kung saan alinsunod ito sa ilalim ng kasalukuyang pambansang pondo o 2022 General Appropriations Act, na mayroong 925-million pesos na nakalaang pondo para sa nasabing benepisyo ng mga guro.
Aniya, nakasaad na ilalabas ang nasabing budget sa pagdiriwang ng World Teachers’ Day alinsunod sa itinalagang petsa ng United Nations Educational, Scientific and Cultural Organization (UNESCO) upang ipagdiwang ang mahalagang papel ng mga guro sa paggabay sa mga estudyante sa kanilang pag-aaral.
Habang sa ilalim naman ng batas, ang National Teachers’ Day ay idineklara din tuwing October 5 bilang pagpupugay sa mga guro. —sa ulat ni Tina Nolasco (Patrol 11)
