Halos 14 bilyong pisong gastos ng Department of Education ang walang legal na basehan o sapat na documentation.
Ayon ito sa 2018 annual audit ng COA o Commission on Audit kung saan nasa 3,000 piso hanggang 13 billion pesos ang nadiskubreng walang basehang gastusin ng DepEd.
Kabilang sa mga hindi maipaliwanag na gastusin ng DepEd nOong 2018 ay mahigit 300 million pesos na ginugol sa trainings at seminars gayundin sa midyear annual planning ang assessment activities sa mga malalaking resorts at tourist spots, daan daang milyong pisong gastusin ng mga tanggapan nito sa regions 1, 2, 3, 7, 9, 10 at 11 at bayad sa PCAB contractor kahit pa expired na ang lisensya ng contractor.
Dahil dito, inatasan ng COA ang DepEd na magsumite ng mga kinakailangang dokumento para maiwasan ang audit suspensions, huwag nang magsagawa ng anumang aktibidad maliban na lamang kung kailangang kailangan at tiyaking otorisado ang lahat ng paggastos ng pondo na may kaukulang dokumento.
Samantala, lumabas din sa 2018 annual report ang 113 milyong pisong halaga ng mga hindi pa nagagamit na libro at iba pang learning materials para sa public schools na nakatambak sa bodega ng DepEd.
Ipinabatid ng COA na nasa tatlong milyong piraso ang mga nasabing hindi pa nagagamit na libro at ibang learning materials.
Sinabi ng COA na hindi maganda ang kondisyon ng mga nasabing bodega ng DepEd o pawang marurumi ang mga ito, walang maayos na ventilation at insulation materials para makaiwas sa sunog.
