Puspusan na ang ginagawang paghahanda ng Pamahalaang Lungsod ng San Juan para sa nalalapit na pagbabakuna sa mga nasa A4 priority list.
Ayon kay San Juan City Mayor Francis Zamora, inihahanda na rin nila ang Greenhills Shopping Center bilang mega vaccination hub para sa mga tinaguriang “economic frontliners”.
Nitong weekend, nagsagawa ng inspeksyon si Zamora sa lugar para tukuyin ang mga pasilidad na pagdarausan ng pagbabakuna tulad ng mga sinehan at iba pang espasyo.
Sakaling umarangkada na ang pagbabakuna sa A4 priority list sa pagbabakuna, sinabi ng Alkalde kakayanin ng Greenhills Shopping Mall na makapagbakuna ng 1,000 kada araw hanggang sa unti-unting tumaas ang bilang.
Bukas aniya ito hindi lamang sa mga residente ng San Juan kundi maging sa iba pang mga nagtatrabaho sa lungsod na pasok sa kategorya.
Smantala, dinagdagan naman ng San Juan City Government ang option sa kanilang online vaccination registration para sa mga non-resident subalit nagtatrabaho sa lungsod na makikita sa kanilang official facebook page.