Pinagmumura at ginulpi ng driver ng kotse ang isang food delivery rider matapos na magka-alitan sa kalsada sa Sampaloc, Maynila.
Dakong 3am nang makunan sa CCTV Footage ang pag-agaw ng kotse sa linya ng paparating na rider nang mag-maniobra paatras.
Kahit hindi pa tuluyang nakapag-mamaniobra ang motorista, dumiskarte ang rider sa gitna ng daan upang maunahan ang kotse at doon na umano nagsimula ang alitan ng dalawa.
Hinabol ng driver ng kotse ang rider at nang abutan sa kanto ng Maceda at S.H. Loyola Street ay minura niya ito at pinagsusuntok.
Ipinatawag na ni Barangay 523 Chairman Rolando Ablaya, ang magkabilang panig upang maresolba ang gusot pero hindi dumating ang respondent.
Bagaman humingi ng paumanhin ang kaanak ng driver, desidido naman ang rider na ituloy ang reklamo makaraang dumulog sa Manila Police District Special Reaction Team. —sa panulat ni Drew Nacino
