Mariing itinanggi ni dating Land TRansportation Office (LTO) Chief Virginia Torres ang umano’y paggamit niya ng pangalan ni Pangulong Noynoy Aquino upang aregluhin sa Bureau of Customs ang mga puslit na asukal.
Giit ni torres, hindi niya kailanman ginamit ang pangalan ng Pangulo mula nang nainilbihan pa siya sa pamahalaan hanggang sa kasalukuyan.
Paliwanag pa niya, nagtungo lamang siya noon sa BOC upang makipagkita kay Deputy Commissioner Jessie Dellosa ngunit ipinakausap siya kay ECC Chief Willie Tolentino.
Aniya, ito’y para ipakiusap lamang ang pagpapalabas sa mga sugar shipment ng kaniyang kaibigang si Philipp Sy na kaniyang financier sa negosyo niyang may kinalaman sa asukal sa Tarlac.
Ngunit, binigyang diin ni Torres na hindi puslit o smuggled ang mga asukal na kaniyang ipinakikiusap.
Kasabay nito, sinabi ni Torres na handa niyang harapin ang anumang imbestigasyong gagawin laban sa kaniya.
Pinalagan din ng dating opisyal ang ulat ng pahayagang Inquirer kung saan, sinabi umano niya na gagamitin sa darating na eleksyon ang salaping pagbebentahan sa mga nasabing asukal.
By Jaymark Dagala