Hindi na pinagagalaw pa ni Pangulong Rodrigo Duterte sa Philippine National Police (PNP) ang sugal na “ending”.
Sa talumpati ng pangulo sa 118th Police Service Anniversary ng PNP sa Camp Crame, sinabi nito na huwag nang pakielaman pa ang “last two” o ending dahil larong pang mahihirap aniya lang ito at maliit lamang ang taya dito kaya’t hayaan na lamang ito.
Mayroon daw umano kasing hinuli pa sa pagpapataya ng ending sa Davao at kinalabasan ay si Senador Bong Go pa ang nagbayad ng piyansa dahil wala itong pera.
Ngunit nilinaw ng pangulo na maaaring hulihin ang mga sangkot sa ending kung ito ay pinatatakbo na ng sindikato o mga hustler.
Binanggit din ni Pangulong Duterte ang video karera kung saan maaari na ring hindi pakielaman ng mga otoridad.
Sinabi ng pangulo na kung hihigpitan masyado ang pagpapatakbo sa lahat ng uri ng sugal ay mawawalan ng hanap-buhay ang maraming mahihirap na Pilipino at nanganganib umanong mamamayagpag sa kanila ang iligal na droga.