Tila tapos na ang maliligayang araw ng mga e bike o electric bikes na hindi na papayagang magbiyahe sa mga pangunahing kalsada simula sa Lunes, December 1.
Kasunod ito nang pangako ni LTO Chief Assistant Secretary Markus Lacanilao sa budget deliberation ng DOTr o Department of Transportation sa Senado na huhulihin na simula unang araw ng Disyembre ang mga e-trike.
Sinabi ni Senador JV Ejercito, sponsor ng panukalang 2026 budget ng DOTr, na mismong ang LGU o local government unit ang nagbigay ng go signal sa LTO na hulihin na ang mga e-bike na dadaan sa mga pangunahing kalsada.
Ayon pa kay Senador Ejercito, nakikipag-ugnayan na ang DOTr sa DILG at LGU para hulihin ang mga pasaway na e-bike simula December 1.
Una nang kinuwestyon ni Senador Raffy Tulfo ang LTO sa pamamayagpag ng e-bike na aniya’y siya nang hari ng kalsada, subalit nilinaw na hindi siya tutol sa e-bike na dapat gamitin sa mga ligtas na lugar.
