Mag-iikot sa mga lungsod ngayong araw ang binuong validation team ng Department of Interior and Local Government (DILG) para tiyakin kung nasunod ang itinakda nilang 60-day ultimatum na natapos na kahapon.
Kaugnay ito ng kautusan ng ahensiya sa mga Local Government Units (LGU) na linisin at buwagin ang lahat ng mga obstruction o sagabal sa mga kalsada at bangketa.
Babala ni DILG Undersecretary Martin Diño, kanilang padadalhan ng show cause order ang mga City Mayors at Barangay officials na hindi nakasunod sa 60 day deadline para pagpaliwanagin.
Dagdag ni Diño, posibleng masuspinde at makasuhan ang mga opisyal na mapatutunayang hindi ganap na napatupad ang paglinis o clearing operations sa mga kalsada.
