Sinibak sa puwesto ang dalawang opisyal ng Bureau of Fire Protection matapos tumanggap ng sinasabing kickback mula sa pagbebenta ng overpriced fire extinguishers.
Ayon kay Interior Secretary Jonvic Remulla, umabot sa tatlumpung milyong piso ang nakolektang kickback sa bentahan ng fire extinguishers sa iisang gusali lamang.
May direktang relasyon anya ang inspector at supplier, at pinilit ang building owner na sa kanila lang bumili ng fire extinguisher na sobra ang presyo ng hanggang isandaang porsyento.
Iginiit ng BFP na mahigpit na ipinagbabawal sa mga fire inspector ang pagrekomenda ng supplier dahil itinuturing itong unethical at maaaring mauwi sa korapsyon.
Hinikayat naman ng ahensiya ang publiko na i-report ang kahalintulad na insidente, habang tiniyak ni Sec. Remulla na may iba pang opisyal na papanagutin sa patuloy na paglilinis sa hanay ng BFP.
