SPORTS

Sisikaping makabangon ng philippine cycling team mula sa isang bronze medal na kanilang nasungkit nuong 2017 SEA Games na ginawa sa Malaysia.

Ayon kay Philcycling President at Cavite Rep. Abraham Tolentino, bagama’t hindi sila pinalad sa unang sabak nuon sa Malaysia, tiwala naman siya sa kakayahan ng tropa para makasungkit ng ginto.

Malaking bentahe aniya sa kanila ang pagiging pamilyar sa ruta kahit pa batid nilang mabibigat ang kanilang mga makakalaban tulad ng Malaysia, Thailand at Indonesia.

Una rito, nagpahayag din ng suporta si SEA Games gold medalist at cycling squad member Marella Salamat na may malaking potensyal ang koponan para humakot ng mga medalya sa nalalapit na SEA Games na gagawin dito sa Pilipinas.

Pinahiya ng Los Angeles Lakers ang Oklahoma City Thunder makaraang pataubin nila sa sariling bakuran sa score na 130-127.

Si Anthony Davis ang nanguna sa Lakers sa pamamagitan ng kanyang 33 points habang nagdagdag si Lebron James ng 23 points at 14 assists.

Ikalawang panalo ito ng Lakers laban sa Thunder ngayong season makaraang gibain nila ito sa score na 112-107 noong Martes.

Humakot naman si Kentavious Caldwell-Pope ng 17 points para sa Los Angeles habang kumamada si Danny Green ng 14 points dahilan upang maitala nila ang ika-13 panalo ng koponan sa 14 na laro.

Kumpleto na ang roster ng Gilas Pilipinas na para sa 2019 Southeast Asian (SEA Games).

Sa anunsiyong inilabas ni Gilas Coach Tim Cone, ang mga maglalaro para sa Pilipinas ay sina Kiefer Ravena, Christian Standhardinger, June Mar Fajardo, Roger Pogoy, Troy Rosario at Japeth.

Kasama rin sa line up sina Marcio Lassiter, Vic Manuel, Stanley Pringle, Chris Ross, L.A Tenorio at Matthew Wright.

Itinalaga naman bilang team adviser si Alfrancis Chua.

Unang makakalaban ng Gilas ang Singapore sa Disyembre 4 na susundan naman ng Vietnam at Myanmar sa Disyembre 6 at 7.

Kumpiyansa ang Philippine Football Federation (PFF) na makakasungkit ng gintong medalya sa darating na 2019 Southeast Asian (SEA) Games.

Ayon kay PFF President Mariano Araneta, tiwala siyang malakas ang pwersa ng men’s at women’s football team batay na rin sa kanilang naging assessment.

Malaking tulong aniya ang naging paglahok ng team sa ilang training camp at football competition sa ibang bansa bago ang SEA Games.

Una nang nagpahayag si Olympic silver medalist Hidilyn Diaz na positibo siyang makakakuha ng ginto ang weightlifting team ng bansa sa SEA Games gayundin sa 2020 Tokyo Olympics.

Pinangunahan ng basketball star na si Giannis Antetokounmpo ang pagkapanalo ng Milwaukee Bucks sa laban nito kontra Portland Trail Blazers sa 2019-2020 NBA season.

Nakapagtala ng score na 137 ang Bucks samantalang 129 naman ang nakuha ng Blazers.

Nakagawa si Antetokounmpo ng 24 points, 19 rebounds at ang record breaking na 15 assists.

Samantala, susunod na makakalaban ng Bucks ang Detroit Pistons sa kasalukuyang season na gaganapin sa Linggo, Nobyembre 24.

Hindi muna makakapaglaro ang basketball player na si Nikola Vucevic ng Orlando Magic dahil sa natamo nitong right ankle injury.

Ayon sa mga opisyal ng Magic, isinailalim sa MRI ang manlalaro at dito nakita ang injury at kailangang dumaan sa re-evaluation matapos ang pito hangang 10 araw.

Nakuha ni Vucevic ang injury sa laro nito laban sa Toronto Raptors noong Miyerkules.

Pinangangambahan namang aabot sa apat na linggo ang pahinga ng manlalaro.

Samantala, magugunitang si Vucevic ang kasalukuyang may hawak ng titulong Eastern conference player of the week.

Buong pugay na ibibida ng Pilipinas ang tradisyong Filipino sa opening ceremony ng Southeast Asian (SEA) games sa Nobyembre 30.

Ayon kay Floyd Quintos, creative director ng SEA games, bamboo forest ang centerpiece ng palaro.

Dahil dito asahang makikita ang mga arkong gawa sa kawayan sa parada ng mga atleta.

Ipakikita rin sa parada ang iba’t ibang kasuotan ng mga katutubo.

Magsisimula ang opening ceremony ng SEA sa Philippine Arena 7 p.m. ng Nobyembre 30.

Target ng Ateneo Blue Eagles na itala ang makasaysayang 16 game sweep sa game two ng Season 82 Finals ng UAAP kaharap ang UST Growling Tigers.

Isang panalo na lamang ang kailangan ng Blue Eagles upang makamit ang 11 nilang titulo.

Inaasahan magtutuloy-tuloy ang momentum ng Blue Eagles mula sa 99-77 nilang panalo sa game one.

Ang bakbakan ay magsisimula 4:00 mamayang hapon sa Mall of Asia Arena sa Pasay City.

Mahigpit ang seguridad ng Civil Aviation Authority of the Philippines (CAAP) para sundin ang ipinatutupad na ‘no fly zone’ sa opening at closing ceremony ng SEA games.

Batay sa inisyung NOTAM o Notices to Airmen ng CAAP, epektibo ang ‘no fly zone’ mula November 30 hanggang December 11 sa paligid ng Philippine Arena sa Bocaue, Bulacan at New Clark City sa Pampanga na mga venue ng 30th SEA Games.

Nakasaad sa notams na bawal ang aircraft operations sa lboo ng tatlong nautical miles at restrict general aviation flights sa loob naman ng 40 nautical miles sa Philippine Arena at New Clark City mula alas 6:00 ng umaga hanggang alas 11:00 ng gabi.

Kabilang sa ‘no fly zone’ ang operasyon ng UAV o Unmanned Aircraft Vehicles o drones.

Magre-retiro na si Filipino football player Phil Younghusband.

Inanunsyo ni Younghusband gamit ang kaniyang instagram account ang kaniyang retirement sa pamamagitan ng pag post ng cartoon sketch.

Inilagay ng 32 anyos na Filipino-British striker sa caption ng karawan ang mga katagang “hanging up my boots”.

Ipinaabot din ni Younghusband sa nasabing post ang pasasalamat sa kaniyang mga boss, coach, team mates, competitors at maging sa mga tagahanga na naging bahagi ng kaniyang football career.

Umabot ng 13 taon ang international career ni Younghusband sa football kung saan nakilala siya sa top goal scorer na may 52 goals.