SPORTS

Plano ng Philippine team na magpadala ng 15 atleta sa Tokyo Olympics sa susunod na taon.

Ayon kay chef de mission Mariano “Nonong” Araneta, kabilang sa mga sports na maaaring humataw ang Pilipinas ay ang rowing, canoe-kayak, archery, fencing, athletics, golf, karate, judo, triathlon, boxing, weightlifting at skateboarding.

Apat nang Pinoy ang siguradong makakapasok sa olimpiyada na kinabibilangan nina Eumir Marcial at Irish Magno sa boxing; Carlos Yulo sa gymnastics, at pole-vaulter EJ Obiena.

Samantala, may tsansa ring makapasok sa Japan games sina Olympic silver medalist weightlifter Hidilyn Diaz, judoka Kiyomi Watanabe; Kyla Richardson at Willie Morrison sa athletics; Ariana Dormitorio at Daniel Caluag sa athletics, at Nesthy Petecio ng boxing.

Ipinagpaliban muna pansamantala ng pamunuan ng Philippine Football Federation (PFF) ang pag-eensayo ng Philippine football league clubs.

Ang desisyon ng PFF ay bunsod ng muling pagsasailalim ng Metro Manila sa modified enhanced community quarantine (MECQ).

Kasunod nito, ayon sa PFF, gaganapin na lamang ang kanilang training sessions sa ikatlong linggo ng Agosto sa national training center nito sa Cavite.

Samantala, sa panig naman ng Philippine Basketball Association (PBA), ipagpapaliban din nito ang pagsisimula ng kanilang training sessions sa Agosto 6 sa halip ay  sisimulan nalang sa Agosto 10 dahil din sa pagpapanumbalik ng muling pag-iral ng mahigpit na community quarantine.

Tinawag na “disturbing” o nakababahala ng isang opisyal ng National Basketball Association (NBA) ang napaulat na mga kaso ng pisikal na pang-aabuso sa NBA basketball academies sa China.

Ayon kay Deputy commissioner Mark Tatum, patuloy na ini-evaluate ng NBA ang programa pero nilinaw nito na ang tanging papel nila rito ay ang pagbibigay ng tatlong coaches sa bawat academy.

Matatandaang iniulat ng ESPN na may mga insidente ng physical abuse sa mga eskwelahan sa Shandong, Zhejiang at Xinjiang.

Nangako sina Michael Jordan at Jordan Brand na maglalaan sila ng isang daang libong dolyar para sa kampanya laban sa racism.

Ayon kay Brand, magdo-donate muna siya ng tig-isang milyong dolyar sa NAACP Legal Defense, Educational Fund, Inc. at Formerly Incarcerated & Convicted People and Families Movement.

Bukod, magbibigay din sila ng kalahating milyong dolyar sa Black Voters Matter para suportahan ang reformative practices na inaasahang maghahatid ng pagbabago sa Black community.

Naghahanda nang sumabak sa US Open si tennis star Andy Murray.

Gayunman inamin ng dating world number one na nagdadalawang isip pa rin siyang maglaro muli dahil sa nananatiling banta ng coronavirus disease 2019 (COVID-19).

Ayon kay Murray makikilahok muna siya sa Battle of the Brits team tennis event sa london ngayong linggo at nakatutok ito sa hard court event sa new York sa August 31.

Sumailalim na sa 10 araw na quarantine si Los Angeles Clippers point guard Lou Williams matapos mabunyag ang pagpunta nito sa isang strip club sa Atlanta.

Kasunod ito nang paglabas ng litrato ng rapper na si Jack Harlow kasama si Williams na naka-NBA facemask at may hawak na inumin habang nasa Magic City Strip Club gayung ang unang paalam ay tutungo lamang sa burol ng ama ng isang kaibigan niya.

Sinabi ni  Williams na kumain lamang sila ng isang kaibigan sa lugar na wala naman aniyang babaeng entertainers.

Dahil sa 10 araw na quarantine hindi makakalaro ang tinaguriang Sixth Man of the Year sa unang dalawang games ng Clippers sa restart ng NBA.

Sa July 31 makakaharap ng clippers sa isang inaasahang exciting game kontra sa Los Angeles Lakers at sa August 2 kontra sa New Orleans Pelicans.

Sumalang na sa kauna-unahang pagkakataon sa panig ng Denver si rookie Bol Bol kung saan pinadapa nila ang Washington Wizards sa score na 89-82 sa Walt Disney World Complex sa Orlando, Florida.

Matatandaang nakuha ng Nuggets ang 20-anyos at 7-foot-2 na manlalaro sa second round ng Rookie Draft noong nakaraang taon pero hindi ito nakasabak sa regular season dahil sa foot injury.

Si Bol na anak ni NBA legend Manute Bol ay kumamada ng 16 points, 10 rebounds, at six blocks para sa Nuggets.

Sa unang practice game, wagi ang Los Angeles Clippers laban sa Orlando Magic sa score na 99-90 habang nasungkit naman ng New Orleans Pelicans ang 99-68 win laban sa Brooklyn Nets sa hiwalay na laro.

Balak umanong bilhin ni NBA legend Kevin Garnett ang Minnesota Timberwolves.

Ito ang nabunyag matapos i-anunsiyo ni team owner Glen Taylor na interesado siyang ibenta ang kanilang koponan na pag-aari niya mula pa noong 1994.

Sa isang Instagram post, ibinalita ni Garnett sa kanyang mga tagahanga na kasama siya sa grupo na planong kunin ang prangkisa ng kanyang dating team sa NBA.

Sinasabing ang Wolves ay ibinebenta ni Taylor sa halagang $1.2-billion.

Muling sasampa sa ring ang retiradong six-division boxing champion na si Oscar De La Hoya.

Ayon sa 47-anyos na boksingero, kukunin niyang trainer para sa kanyang comeback fight si Floyd Mayweather Sr.

Naniniwala si De La Hoya na kayang ibalik ni Mayweather ang lakas at bilis niya sa ibabaw ng parisukat na lona.

Huling sumampa sa ring si De La Hoya noong 2008 kung saan dinurog siya ni Sen. Manny Pacquiao sa pamamagitan ng eight-round technical knockout na naging dahilan ng kanyang pagreretiro.

Pinatawan ng P100,000 na multa ang Blackwater Elite matapos magsagawa ng team practice nang walang ‘go-signal’ mula sa Philippine Basketball Association (PBA).

Maliban dito, ayon kay PBA Commissioner Willie Marcial, maglulunsad din ng imbestigasyon ang liga kaugnay ng sinasabing plano ni Elite owner Dioceldo Sy na ibenta ang kanilang prangkisa sa gitna ng kontrobersiya.

Binigyang diin ni Marcial na bukod sa sasalang sa mandatory swab testing ang buong koponan, sasalang din sila sa seven-day quarantine kahit pa magnegatibo sila sa COVID-19 test.

Ayon pa kay Marcial, seryoso at mabigat ang isiniwalat ni Sy tungkol sa balak nito kaya nararapat lamang itong imbestigahan.