SPORTS

72 manlalaro ng National Football League (NFL) ang nagpositibo sa coronavirus disease 2019 (COVID-19).

Ayon sa website ng NFL Players Association ang nasabing bilang ng football players na COVID-19 positive ay 2.5% ng kabuuang rostered players ng liga.

Ipinabatid ng NFLPA na naka-quarantine na ang mga naturang players sa gitna na rin nang pakikipag-ugnayan nila sa pamunuan ng NFL para sa ipatutupad na protocols at mga bagong measures dahil sa pandemic.

Wala pa umanong napagkakasunduan ang NFL at NFLPA sa mga panuntunan para sa pre-season training at exhibition games subalit nais ng grupo ng players na wala munang pre-season games sa Agosto.

Balak nang ibenta ni Blackwater owner Dioceldo Sy ang kanilang prangkisa sa Philippine Basketball Association (PBA).

Ayon kay Sy, wala na ang puso niya sa liga kaya’t humihingi siya ng pang-unawa mula sa kanilang mga tagasuporta.

Matatandaang inatasan ni PBA commissioner Willie Marcial ang Elite na magpaliwanag kung bakit nagsagawa ito ng team practice nang walang abiso mula sa liga habang nagbanta rin si Games and Amusement Board chairman Abraham “Baham” Mitra na balak nilang patawan ng parusa ang koponan.

Una nang binigyang diin ni Sy na wala silang nilabag na health protocols at sinusunod nila ang mga patakaran ng PBA.

Aminado si Team Lakay fighter Kevin Belingon na nais niyang makasagupa sa isang rematch si ONE featherweight king Martin Nguyen.

Gayunman, sinabi ng dating undisputed bantamweight champion na haharapin niya muna si Bibiano Fernandes bago umakyat sa mas mataas na dibisyon.

Unang natalo ni Belingon si Fernandes noong 2018 kaya siya naging undisputed champion.

Ngunit na-disqualify naman siya dahil sa illegal strikes nang magtuos muli ang dalawa noong March 2019.

Pursigido pa rin si American Boxer Keith Thurman na makaharap muli si Senador Manny Pacquiao.

Sinabi ni Thurman na tiyak na sulit ang rematch nila ng pambansang kamao.

Magugunitang tinalo ni Pacman si Thurman sa pamamagitan ng split decision sa sagupaan nila nuong July 2019.

Gayunmanipinabatid ni Thurman na sakaling mabigo siya kay Pacman kinukunsider niya ang mga boksingerong sina Shawn Porter, Mikey Garcia, Danny Garcia at Errol Spence para makasagupa sa mga susunod na araw.

Ipasasagot na sa mga koponan sa PBA ang gastusin kapag nagpositibo sa coronavirus disease 2019 (COVID-19) ang kanilang players.

Ito ayon kay PBA Commissioner Willie Marcial ang napagpasyahan ng PBA Board of Directors.

Katulad din ito aniya na kapag na injured ang manlalaro ay sinasagot ng team ang pagpapagamot dito.

Kasabay nito ipinabatid ni Marcial na nagdesisyon din ang liga na i-upgrade ang COVID-19 swab tests na dapat gawin kada 10 araw.

Umaasa si Marcial na sa Agosto ay tuluyan na silang makakapagsimula ng mga laro.

Sasagutin ng kani-kanilang koponan ang gastusin sa pagpapaospital sakaling dapuan ng coronavirus disease 2019 (COVID-19) ang mga manlalaro ng Philippine Basketball Association (PBA).

Ito ang tiniyak ni PBA Commissioner Willie Marcial matapos makipagpulong sa Board of Governors, mga coaches at team managers.

Ayon kay Marcial, isa umano sa mga ikinababahala ng mga manlalaro ay kung sino ang babalikat sa kanilang medical expenses kapag nagpositibo sila sa coronavirus.

Maliban dito, sagot din ng PBA teams ang gagawing COVID-19 testing sa kanilang hanay.

Hindi makakalaro sa pagbabalik ng NBA season si Washington Wizards guard Bradley Beal.

Paliwanag ng Wizards, hindi pa kasi lubusang magaling ang injury sa kanang balikat ng number two scorer ng liga.

Samantala, sinabi naman ni Beal na gusto sana niyang tulungan ang team pero mas makabubuti sa lahat kung hindi muna siya lalaro para ihanda ang sarili sa susunod na season.

Nagpositibo sa coronavirus disease 2019 (COVID-19) ang pitong manlalaro ng Women’s National Basketball Association (WNBA).

Ayon sa pamunuan ng WNBA, sa kabuuang 137 na mga manlalaro nila na sumailalim sa COVID-19 testing, pito ang nagpositibo rito.

Ang naturang COVID-19 testing, ay isinagawa noong 28 ng Hunyo hanggang nitong 5 ng Hulyo, bilang bahagi sa nalalapit na pagbubukas ng liga sa susunod na buwan.

Kasunod nito, ang lahat ng mga manlalaro na nagpositibo sa nakamamatay na virus ay agad na inihaiwalay sa ibang mga manlalaro para maiwasan ang pagkalat ng virus.

Bukod pa rito, inaasahan naman ang pagdating ng 11 sa 12 koponan ng WNBA sa IMG academy sa Bradenton sa Florida para magsibing single site para sa training camp, games at housing.

Samantala, pagkatapos pa ng limang araw susunod ang mga manlalaro ng Indiana dahil nagkatrangkaso ang dalawa sa kanilang miyembro.

Naglabas na ng schedule ang NBA ng kanilang mga laro sa muling operasyon nito sa Disney Resort sa Florida.

Ayon sa NBA, magsasagawa muna ng 33 tune up games bago ang pormal na pagsisimula ng mga laro sa July 30.

Unang magsasagawa ng tune up games ang Orlando Magic at Los Angeles Clippers bago ang bakbakan ng Washington Wizards at Denver Nuggets at paghaharap ng New Orleans Pelicans at Brooklyn Nets gayundin ang pagtutuos ng Sacramento Kings at Miami Heat.

Magiging pambungad naman sa pormal na pagsisimula ng mga laro sa July 30 ang sagupaang Jazz at Pelicans.

Welcome sa Philippine Basketball Association (PBA) ang pagpayag ng gobyerno na muling makapag-praktis ang kanilang mga manlalaro.

Ayon kay PBA Commissioner Willie Marcial, natutuwa sila rito dahil tiyak na makakapagsagawa rin sila ng live games kalaunan.

Matatandaang nagsumite ng plano ang PBA sa Inter-Agency Task Force (IATF) sakaling aprubahan ang pagbabalik-training ng mga koponan.