SPORTS

Nakabuena-mano ng panalo ang Barangay Ginebra sa pagbabalik ng 2020 PBA Philippine Cup matapos gibain ang NLEX sa score na 102-92.

Si Aljon Mariano ang nanguna sa Gin Kings sa pamamagitan ng kanyang 20 points habang nagdagdag naman si Stanley Pringle ng 12 points.

Sa unang laro, pinadapa ng TNT ang Alaska Aces sa score na 100-95.

Si RR Pogoy ang humataw nang husto nang kumana ito ng 45 points para sa Tropang Giga.

Nag-eject naman sa laro sa panig ng TNT si Poy Erram matapos mapatawan ng dalawang flagrant fouls.

Magbabalik hard court na ang inaabangang bakbakan sa Philippine Basketball Association (PBA) ngayong araw.

Ito’y kasunod ng matagumpay na pagsasagawa ng PBA ng kanilang bubble tournament na hinango sa konseptong ginawa rin sa NBA.

Ganap na alas kuwatro mamayang hapon bubuksan ng  TNT Tropang Giga at Alaska ang pagbubuksa muli ng pba na susundan naman ng paghaharap ng Brgy. Ginebra at NLEX ganap na alas 6:45.

Napili ang Angeles University sa Pampanga na siyang pagdausan ng PBA bubble tournament subalit gagawin itong closed door bilang pag-iingat na rin sa banta ng COVID-19.

Umakyat sa flyweight ranks si Australia-based Filipino Reece McLaren matapos durugin si Brazilian Jiu-Jitsu champion Aleksi Toivonen ng Finland sa fight card ng ONE Championship sa Singapore Indoor Stadium.

Agad na natumba at namilipit sa sakit si Toivonen nang tamaan sa bodega ng malupit na tuhod ng dating bantamweight title contender.

Dahil sa panalo, inaasahang makakasagupa ni McLaren sa hinaharap sina champion Adriano Moraes, UFC legend Demetrious Johnson at Danny Kingad ng Team Lakay.

Muling inupakan ni US President Donald Trump si Los Angeles Lakers star LeBron James kung saan tinawag pa niya itong “nasty hater.”

Giit ni Trump, hindi na siya nanonood ng basketball dahil sa pakikisawsaw ng mga manlalaro sa pulitika.

Hindi na rin aniya siya interesadong makilala nang personal ang NBA superstar.

Isang panalo na lamang ang kailangan ng Los Angeles Lakers para masungkit ang kampiyonato sa nba finals ngayong araw.

Gayunman ayon kay Miami Heat Coach Eric Spoelstra, malabo pa ring makabalik sa laro si Goran Dragic na nagtamo ng injury sa kaniyang kaliwang paa.

Tanging pag-asa na lamang sa ngayon ng Heat para mabasag ang lamang ng Lakers ay ang pagbabalik ni Bam Abedayo matapos itong magtamo ng injury sa leeg.

Magsisimula ang laban sa pagitan ng Lakers at Miami Heat sa Walt Disney world isolation zone sa Orlando, Florida ganap na alas 9 ngayong umaga oras dito sa Pilipinas.

Tapos na ang kampanya ng 15-anyos na si Alex Eala ng Pilipinas sa 2020 French Open.

Ito’y makaraang mabigo ang Filipina tennis player sa kanyang laban kay Elsa Jacquemot ng France 6-3, 6-2 sa girls singles semifinals.

Makakaharap naman ni Jacquemot si Alina Charaeva matapos gibain si Polina Kudermetova sa hiwalay na semifinal duel.

Si Eala ang kauna-unahang Pinay na nakapasok sa semis sa isang Grand Slam event kung saan natumbasan niya ang narating ni Filipino tennis great Felix Barrientos na umusad sa semifinals ng Wimbledon noong 1985.

Makukumpleto na ng Philippine Southeast Asian Games Organizing Committee (PHISGOC )ang financial report nito kaugnay sa 30th sea games.

Ipinabatid ito ng PHISGOC matapos hingin ng Philippine Olympic Committee (POC) ang mga nasabing dokumento.

Nilinaw ni PHISGOC President and COO Ramon Suzara hindi P6 na bilyon kundi nasa P1.48 bilyon lamang ang natanggap nila na tulong pinansyal mula sa Philippine Sports Commission.

Ayon kay Suzara nitong Septyembre 4 lamang nakumpleto ng PSC ang pagremit ng nasabing halaga sa PHISGOC.

Ang natitirang pondo ng sea games na nasa P4.52 bilyon ay ipinadala sa  procurement service ng Department of Budget and Management habang ang bahagi nito ay ni remit sa POC o ginamit ng PSC para sa equipment at serbisyong ginamit para sa biennial meet.

Una nang ibinunyag nina POC Board Member Clint Aranas ng World Archery Philippines at athletics Chief Philip Ella Juico ang plano nilang pagrereklamo laban sa ilang POC officials kabilang na si POC President Abraham Bambol Tolentino dahil sa kabiguan ng PHISGOC na maglatag ng financial statement sa mga ginastos noong sea games.

Kaagad na nakabawi ang Los Angeles Lakers nang pataubin ang Miami Heat sa Game 4 ng NBA Finals.

Nagsilbing bayani ng Lakers sa Game 4 si Lebron James matapos makapagtala ng 26 points, 12 rebounds at 8 assists na sinuportahan nina Anthony Davis na may 22 points, 9 rebounds at 4 assists at si Kentavious Caldwell-Pope na nag contribute ng 15 points, 5 assists at 3 rebounds.

Hindi naman umubra ang pinagsamang puwersa nian Jimmy Butler, Tyler Herro, Duncan Robinson at Bam Adebayo para makuha ang sana’y ikalawang panalo ng Heat.

Napasakamay muli ng Lakers ang panalo matapos masilat sa kanila ang Game 3.

Naitala sa 102-96 ang final score.

Itinakda sa Sabado ang Game 5 ng bakbakang Lakers at Heat.

Gustong-gusto ni Bam Adebayo na tinaguriang big man ng Miami Heat na makabalik sa paglalaro sa Game 4 ng NBA Finals.

Ito’y makaraang ma-upgrade ang status ni Adebayo bilang ‘questionable’.

Nauna rito, dumanas ng injury ang manlalaro at inaming todo-todo na ang kanyang pagmamadaling gumaling.

Kasunod nito, ayon naman sa Fil-Am head coach ng Miami na si Erik Spoelstra, kinukulit na siya ni Adebayo na ipasok na itong muli sa kanilang laro.

Naniniwala si Miami forward Jimmy Butler na kaya pa nilang bumangon matapos matalo sa Game 1 at 2 sa kanilang best-of-7 championship series laban sa Los Angeles Lakers.

Ayon kay Butler, susubukan nilang ilatag ang kanilang huling baraha sa serye sa susunod na laro upang hindi mabaon at tuluyang matalo ng LA sa 2020 NBA Finals.

Matatandaang natalo ng Lakers ang Heat sa Game 1 habang hindi naman nakalaro sa Game 2 ang dalawa sa kanilang mga pambato na sina Goran Dragic at Bam Adebayo.