SPORTS

Nagpasya si Kiefer Ravena ng NLEX na manahimik muna sa ngayon ukol sa sitwasyon niya sa PBA at Japan B.League club kung saan siya lumagda ng kontrata ngayong Linggo.

Sa isang programa sa telebisyon, natanong ng host si Ravena sa problema niya pero sinabi ng atleta na hindi muna siya magsasalita hinggil dito.

Una nang pumirma ng kontrata sa Shiga Lakestars sa Japan’s B.League si Ravena.

Nagpaalam din siya sa NLEX Road Warriors squad at nagpasalamat sa PBA at mga katrabaho na animo’y handa na siyang sumabak sa Lakestars.

Gayunman, may problema pa rin umano si Ravena dahil sa nilagdaan nitong Uniform Players Contract sa NLEX at PBA.

Sa kasalukuyan, naglalaro rin sa B.League ng Japan ang utol ni Kiefer na si Thirdy.

Abot kamay na ni Margielyn Didal ang pag-qualify sa Tokyo Olympics.

Ito ay matapos makapasok si Didal sa semifinals ng 2021 street skateboarding world championships sa Rome.

Ang 22 anyos na Cebuana skateboarder na kasalukuyang ranked 13 sa buong mundo ay sasagupa sa 26 na iba pang semifinalists na kinabibilangan nina world number 12 Yumeka Oda, number 3 Momiji Nishiya at number 8 Roos Zwetsloot.

Gagawin ang semifinals bukas, biyernes bago final showdown sa linggo.

Muli na namang maituturing na World Champion si Nonito ‘the Filipino flash’ Donaire.

Ito ay matapos patumbahin ni Donaire si Nordine Oubaali sa fourth round para mapasakamay ang titulo sa WBC bantamweight championship sa Dignity Health Sports Park Stadium sa Carson, California.

Nagpakawala ng tatlong matinding suntok ang 38 anyos na si Donaire laban kay Oubaali – Dalawa sa third round at isa sa fourth round, dahilan para ipatigil na ng referee ang bakbakan.

Si Donaire ang pinakamatandang boksingero na nanalo ng isang bantamweight title.

Ang nasabing laban naman ang kauna-unahang nagpayuko sa French boxer sa kanyang professional career matapos manalo sa 17 iba pang professional matches.

Muling nagpakitang gilas si Giannis Antetokounmpo para makumpleto ang panalo sa apat na laro sa first round series ng NBA eastern conference.

Kasunod na rin ito nang naiposteng tatlong triple double ni Antetokounmpo para sa Milwaukee Bucks kontra sa miami heat matapos maitala sa 120-103 ang final score.

Si antetokounmpo ay nagtala ng 20 points, 15 assists at 12 rebounds na naisama sa bucks playoff history na kinabibilangan din nina Kareem Abdul Jabbar noong 1970 at Paul Pressey noong 1986.

Dahil sa nasabing panalo umabante na ang Bucks sa ikalawang round ng play offs at tuluyang winalis ang Miami sa kauna-unahang pagkakataon sa tatlong play off match ups.

Nakapagtala naman ng 25 points si Brook Lopez, Bryn Forbes na nagpasikat sa pitong 3 points nito at Khris Middleton na gumawa ng 20 points at 11 rebounds.

Bigo ang Gilas Pilipinas 3X3 team sa kanilang kampanya sa FIBA 3×3 Olympic Qualifying Tournament makaraang padapain ng France sa ika-apat nilang laro sa torneo na ginanap sa Graz, Austria.

Ngunit bago nakuha ang panalo sa score na 14-15, pinahirapan muna nina Joshua Munzon, Santi Santillan at CJ Perez ang mga kalabang Pranses.

Una rito, inilampaso rin ang Philippine team ng mga koponan ng Qatar, Slovenia, at Dominican Republic.

Nasungkit ni Pinoy fighter Edward Kelly ang malupit na split decision victory laban kay Ahmed Faress ng Egypt sa kanilang bakbakan sa ONE: Full Blast sa Singapore Indoor Stadium.

Sa unang bahagi pa lamang ng laban ay ipinakita na ni Kelly ang mabangis niyang grappling skills at counterpunches.

Nabatid na sa ikalawang round ay nakatama si Kelly ng matinding sipa kay Faress na nagpatumba dito.

Nakaganti naman ang Egyptian at sinubukan siyang pasukuin si Kelly sa pamamagitan ng triangle choke pero nalusutan ito ng Pinoy.

Nagpakawala naman si Kelly ng leg kicks at body shots laban kay Faress kaya’t nangibabaw ito sa dulo ng naturang laban.

Pinataob ng Atlanta Hawks sa una nilang panalo sa game 1 ang New York Knicks na may iskor na 107-105.

Nanguna si Trae Young matapos maipasok ang bola sa loob ng 0.9 seconds sa 4th quarter upang gulatin ang Knicks lalo na ang mga fans.

Kakaiba ang ipinamalas ni young sa pamamagitan ng kanyang 32 points at 10 assists at 7 rebounds.

Inabot din kasi ng walong taon bago muling nag-qualify sa NBA playoffs sa Eastern Conference ang kanilang team.

Samantala, nanguna naman sa Knicks si Alec Burks na may 27 points, 3 rebounds at 4 assists.

Inilampaso ng Portland Trail Blazers ang Denver Nuggets 123-109 sa Game 1 ng kanilang Western Conference first-round series.

Si Damian Lillard ang nanguna sa kanilang koponan sa pamamagitan ng kanyang 34 points at 13 assists habang nagdagdag si CJ McCollum ng 21 points.

Samantala, sa Game 1 naman ng Eastern Conference first-round playoff series, nanalo ang Brooklyn Nets laban sa Boston Celtics sa score na 104-93.

Pasok na sa 2021 Tokyo Olympics si Filipino jin Kurt Barbosa.

Ito’y makaraang masungkit ni Barbosa ang come-from-behind win sa semifinals ng men’s 58kg event ng 2021 Asian Taekwondo Olympic Qualification tournament sa Amman, Jordan.

Kahit mas maliit ay pinadapa ni Barbosa ang local bet na si Zaid Al-Halawani sa score na 50-49 sa third round.

Una rito, tinalo rin ng Pinoy si Molom Tumenbayar ng Mongolia na naging dahilan para makapasok siya sa semis.

Pinadapa ng Memphis Grizzlies ang Golden State Warriors sa score na 117-112 sa kanilang laro sa NBA.

Dahil dito, bigong makakuha ng puwesto sa Western Conference playoffs ang Warriors.

Kumamada si Ja Morant ng 35 points para sa Memphis habang si Xavier Tillman ay nakabuslo ng go-ahead 3-pointer na nagpanalo sa kanilang koponan.

Nag-rally ang Golden State sa pangunguna ni Stephen Curry pero kinapos din ito sa dulo ng nasabing laro.