SPORTS

Sumakabilang buhay na ang 18 anyos na babaeng mexican boxer na si Jeanette Zacarias Zapata limang araw mula nang matalo ito sa laban.

Sa abiso ng kampo ni Zapata, hindi na nito nakayanan ang tinamong head injury.

Bago bawian ng buhay, napabilang muna si Zapata sa mga boksingerong lumaban sa isang International Boxing Event sa Montreal kung saan ay sa ika-apat na round sa kanilang Welterweight Match ay tinalo siya ng kalabang si Marie Pier Houle.

Ito’y matapos na tumama kay Zapata ang kumbinasyon ng kaliwang uppercut at right hook ni Houle dahilan para ilabas ito ng ring at agad na dalhin sa pagamutan.

Ipinagluluksa ng mga nasa mundo ng palakasan o sports ang pagpanaw ng isa pang atletang Pinoy.

Ito’y makaraang kumpirmahin ng Philippine Table Tennis Federation sa kanilang Facebook page ang pagpanaw ni 2016 Rio Paralympics bronze medalist Josephine Medina.

Nabatid mula sa pamangkin ni Medina na hinihintay pa nila ang resulta ng RT-PCR test ng kaniyang tiyahin gayundin ang kung ano ang sanhi ng kaniyang pagpanaw.

Gayunman, sinabi ng Coach ni Josephine na si Louie Eballa na nabatid na may naranasang sintomas ng COVID-19 ang atleta bago ito pumanaw.

Kahit may polio, hindi ito naging hadlang para kay Josephine para mag-uwi ng mga medalya sa Pilipinas sa larangan ng table tennis.

Siniguro ni Boxing Legend Oscar Dela Hoya na magugulat ang karamihan sa kanyang muling pag-akyat sa boxing ring sa darating na Setyembre 11.

Iyan ay para sa sagupaan nila ni dating UFC World Champion Vitor the Phenom Belfort sa Los Angeles, California.

Ayon sa boksingero, kahit na labing tatlong taon na ang nakalilipas sa huling laban nila ng pambansang kamao Manny Pacman Pacquiao.

Hindi pa rin aniya nabago ang kanyang pagkagutom sa boxing at hinahanap hanap niya ang sakit ng katawan.

Aniya, ibang klase ang ginawa niyang pagsasanay at kung tutuusin daw ay hindi naman siya nagretiro sa mundo ng boxing matapos ang laban kay Pacman noong 2008. —sa panulat ni Rex Espiritu

Haharap sa mabigat na kalaban ang Pilipinas sa pagsabak nito sa 2023 Fiba World Cup.

Kabilang ang Gilas Pilipinas sa grupo,  kasama ang bansang New Zealand, South Korea at India sa ginawang draw ceremony nitong Martes ng gabi oras sa bansa.

Habang 80 bansa ang susubok na makakuha ng pwesto sa World Cup pero 32 lang ang makakapasok sa palaro na gaganapin sa Pilipinas, India at Japan.

Magaganap sa Agosto 25 hanggang Setyembre 10, 2023 ang World Cup at ito rin ang unang beses na tatlong bansa ang mag-hohost ng World Cup.—sa panulat ni Rex Espiritu

Bumaba ang world rankings ng Pinoy tennis player na si Alex Eala sa Women’s Tennis Association o WTA.

Iyan ay bago pa man ang kanyang muling pagsabak sa Juniors ng US open sa New York sa Setyembre 6 hanggang 11, 2021.

Bumaba si Eala sa number 513 batay iyan sa updated list ng wta matapos ang careers-best placing na number 505.

Kabilang sa sinasabing dahilan nito ay ang halos walang events sa women’s pro circuit.

Sa kabila nito, number two naman ang Pinay sa US open girls’ singles.—sa panulat ni Rex Espiritu