RONDA PROBINSYA

Dead on the spot ang isang 39-anyos na lalaki matapos itong barilin sa ulo nang tangkain niyang tulungan ang kaibigan na hinahabol ng kanyang mga kaaway sa Tondo, Maynila.

Kinilala ni ng Manila Police District-Homicide Section ang biktima na si Edwin Gonzalez.

Ayon sa mga awtoridad, nakasakay sa tricycle ang biktima, kasama ang isa pang kaibigan na si Jhaylord Villalon, nang makita nito na hinahabol ang kanyang kaibigan.

Bumaba ng tricycle ang biktima para tulungan ang kaibigan pero nang makita siya ng suspek na tutulong ay kaagad itong bumunot ng baril at pinaputukan siya sa ulo bago umalis sa lugar.

Dinala sa ospital ang biktima pero hindi na naisalba ng mga doktor.

Patuloy na pinaghahanap ng mga awtoridad ang mga suspek.

Palaisipan sa mga awtoridad at mga residente sa Agoncillo, Batangas kung paano napadpad ang isang sanggol sa isang kulungan ng manok.

Ayon sa pulisya, isang residente ang nakakita sa sanggol na nakabalot sa tela at inabandona sa loob ng kulungan ng mga manok.

Hindi naman ito nagdalawang isip na i-report sa mga awtoridad, kung saan agad itong inasikaso ng Barangay Health Worker.

Ayon sa mga residente, nakakabit pa umano ang umbilical  cord ng sanggol nang makita at bakas pa ang dugo sa kanyang katawan.

Dinala na rin sa ospital ang sanggol upang masuri at nakatakdang i-turnover sa dswd para sa wastong panga­ngalaga.

Ini-report na rin sa pulisya ang pangyayari at iniimbestigahan kung sino ang nag-iwan ng sanggol sa lugar at kung sino ang mga magulang nito.

Patay ang isang senior citizen matapos pagbabarilin ng riding in tandem sa Cotabato City.

Kinilala ang biktimang si Charlie Caling jr., 63-anyos.

Ayon sa  Cotabato City Police, naganap ang krimen sa gilid ng ilog habang ang biktima ay nakaupo.

Bigla na lamang sumulpot ang mga suspek na nakamotorsiklo at pinagbabaril ang biktima bago tumakas.

Agad naman dinala sa ospital ang biktima subalit sa daan pa lamang ay nalagutan na ito ng hininga.

Inaalam na ng mga awtoridad ang tunay na motibo sa krimen at pagkakakilanlan sa mga suspek para sa agaran pagdakip.

Hindi na umabot ng buhay ang isang motorcycle rider  matapos masalpok nito ang isang kalabaw sa Amulung, Cagayan.

Kinilala lamang ng awtoridad ang biktima sa alyas na Jonnel.

Ayon sa pulisya, mabilis ang pagpapatakbo ni alyas Jonnel sa kaniyang motor at nabundol ang hayop.

Mabilis namang rumesponde ang mga pulis sa lugar at nadatnan nila nakahandusay sa semento ang biktima kasama ng kaniyang motor at ang nabundol na kalabaw.

Sa kasamaang palad, idineklara nang dead on arrival sa ng mga sumuring doktor.

Nahaharap sa patong-patong na kaso ang isang miyembro ng Philippine National Police (PNP) matapos umano itong magwala at manutok ng baril nang matalo ito sa sugal sa Alabel, Sarangani.

Lumitaw sa imbestigasyon ng pulisya, na nagsugal si P/Cpl. Lougiever Suliquiz sa isang lamay sa nasabing bayan at nang matalo ito ay inakusahan niya ang mga kalaro ng pandaraya.

Natakot umano ang mga tao sa burol, nang bumunot ito ng baril.

Ayon sa Sarangani Police Provincial Office, agad na sinampahan ng kasong kriminal at administratibo ang pasaway na pulis nang makarating sa kanilang opisina ang ginawa nito.

Sugatan ang hepe ng pulisya ng bayan ng Jipapad sa lalawigan ng Eastern Samar matapos pagtatagain ng isang 37-anyos na magsasaka sa loob ng himpilan ng pulisya.

Ayon sa awtoridad, nakaupo sa lobby ang biktimang si Lieutenant Norben Carbonera nang biglang sumulpot ang suspek at inatake ito.

Mabilis naman ang kilos ng mga kabaro ng biktima at binaril ang suspek.

Kapwa dinala ang biktima at suspek sa ospital para lapatan ng lunas.

Nagtamo si Carbonera ng mga sugat sa iba’t ibang bahagi ng katawan.

Sa kasamaang palad, hindi na umabot ng buhay sa ospital ang suspek.

Nahaharap sa reklamong attempted murder ang PBA player na si John Amores matapos masangkot sa insidente ng pamamaril sa kalsada sa Lumban, Laguna.

Sa ibinahaging CCTV footage ng Lumban PNP, angkas sa motorsiklo si Amores at bumaba, aakalaing may bibilin lang sa lugar pero bigla itong nagpaputok  sa isang lalaking patawid sa kalsada na napagalaman na nakaaway niya sa isang basketball game.

Tila gigil na gigil si Amores at nais niyang patayin ang biktima dahil kahit na kumaripas ng takbo ang target nito, tuloy-tuloy pa rin ang pagsunod at pagpaputok ng suspek dito.

Maswerte namang nakaiwas ang biktima sa mga bala ni Amores.

Sa imbestigasyon ng pulisya, nakainitan umano ni Amores ang biktima nang maglaro ng basketball sa Barangay Salac at naghamonan ng suntukan sa ibang lugar.

Hindi naman nagtagal sumuko rin si Amores sa kaniyang ginawang krimen at nahaharap sa kasong attempted murder at iba pang posibleng kaso kasama ang kaniyang kapatid sa nangyaring pamamaril.

Magugunitaan na ang PBA player nuong 2022 kung kailan siya player ng Jose Rizal University ay nag amok at nanuntok sa gitna nang sagupaan nila ng College of Saint Benilde sa NCAA.

Wala nang buhay nang matagpuan ng mga bystander ang isang lalaki sa Dasmariñas City sa Cavite.

Ayon awtoridad, nakita ang labi ng biktima ng mga dumadaang tao sa lugar sa gilid ng isang bangko.

Sa imbestigasyon ng Dasmariñas Police, may nakaalitan umano ang biktima na nauwi sa suntukan.

Naglabas ng sama ng loob ang suspek at naibaling ito sa biktima dahil hindi pinapansin ng kaniyang nililigawan na pinsan ng bktima.

Dalawang testigo umano ang nakakilala at nagturo sa suspek na naaresto sa hot-pursuit operation.

Nakakulong at nasampahan na ang suspek sa kasong murder.

Patay ang isang misis matapos pagbabarilin ng selosong mister habang kumakain sa harap ng tabunok public market sa Talisay City sa Cebu.

Kinilala ng awtoridad ang biktima na si Ailyn Francisco, isang negosyante.

Ayon sa awtoridad, kumakain ang biktima kasama ang kamag-anak nito ng bigla na lamang dumating ang suspek sakay ng motorsiklo.

At malapitang itong pinagbabaril bago tumakas.

Kaagad namang dinala sa ospital ang biktima subalit nasawi ito habang ginagamot ng mga doktor

Lumabas sa imbestigasyon ng pulisya, na matagal ng nagseselos ang suspek sa hinalang may ibang lalaking kinalolokohan ang misis nito.

Nagpapatuloy naman ang manhunt operation ng pulisya laban sa suspek na si rodino francisco para malaman ang tunay na motibo sa krimen.

Natagpuang patay at hubo’t hubad sa loob ng kanyang inuupahang bahay ang isang 18-anyos na babae sa Baguio City.

Batay sa inisyal na imbestigasyon ng pulisya, nag-alala ang kaibigan ng biktima matapos na hindi sumagot ang biktima sa mga text message at tawag.

Kaya naman pumunta ang kaibigan sa kaniyang bahay para i-check ito ngunit sinalubong siya ng kalunos-lunos na eksena.

Natagpuan niya itong hubo’t hubad at may mga saksak sa leeg.

Nawawala sa pinangyarihan ng krimen ang cellphone at iba pang gamit ng biktima.

Nakikipag-ugnayan na ang pulisya sa barangay para suriin ang mga kuha ng CCTV sa lugar para sa pagkakakilanlan ng salarin.

Tinitingnan ng mga awtoridad ang panggagahasa, pagnanakaw, o posibleng kaugnayan sa trabaho o personal na buhay ng biktima ang motibo sa pagpatay.

Nakikipag-ugnayan na rin ang Baguio City Police sa Cybercrime Unit sa imbestigasyon.