RONDA PROBINSYA

Natagpuang patay ang isang Municipal Election Officer at misis nito matapos na umano’y pasukin ang kanilang tahanan sa Agutaya, Palawan.

Ayon sa Palawan Provincial Police Office, nadiskubre ng kanilang mga kapitbahay ang bangkay ni Emmanuel Gacott at misis nitong si Frenie Gacott sa loob ng kanilang tahanan.

Ayon sa pulisya  si Emmanuel ay natagpuang duguan na nakadapa habang ang misis naman nitong si Frenie ay nadiskubre sa may kusina na duguan sa ulo.

Lumilitaw sa  imbestigasyon ng pulisya na pagnanakaw ang nakikita nilang motibo ng krimen dahil may pag-aaring pawnshop ang mag-asawa.

Kapwa nasawi ang dalawang Motorcycle Rider matapos magsalpukan ang minamaneho nilang mga motorsiklo sa Sinait, Ilocos Sur.

Sa kuha ng dashcam ng isang sasakyan, lumitaw ang isang motorsiklo sa maling lane at nakasalpukan nito ang kasalubong na isa pang motor dahilan para tumilapon ang mga ito sa kalsada.

Ayon sa awtoridad, nag-overtake ang isa sa mga motorsiklo at bumangga sa kasalubong na motorsiklo sa national highway.

Sangkot sa aksidente, ang 24-anyos at 31-anyos na mga rider na parehong nakasuot ng helmet pero binawian ng buhay dahil sa tindi ng tinamong pinsala sa katawan.

Nagluluksa ang isang pamilya sa pagkawala ng kanilang 22-anyos na Army Reservist na namatay matapos bumangga ang sinasakyan niyang motorsiklo sa concrete barrier sa macapagal bridge sa Marikina City.

Noong araw din na iyon, natagpuan ng ama ng biktima na si Mario Lomboy ang bangkay ng kanyang anak.

Salaysay ng ama ng biktima sa pulisya, umalis si Lomboy sa kanyang tahanan sa Antipolo City kasama ang isa niyang anak na nagmamaneho papuntang Quezon City.

Sa pagdaan nila sa Marikina, napansin ni Mario ang tindi ng traffic at pinaghihinalaang maaaring nagkaroon ng aksidente.

Nang malapit na sila sa lugar, nakilala ni Mario ang isang motorsiklo na sangkot sa insidente at napagtanto na ang sakay ay ang kanyang bunsong anak na si John Marc.

Naisugod pa sa ospital mga biktima, ngunit idineklarang dead on arrival si John Marc.

Ayon sa Marikina Police Traffic Unit, sakay ng kaniyang motor si John Marc kasama ang isang babae nang mabangga nila ang concrete barrier sa center island.

Patuloy ang imbestigasyon habang hinihintay ng mga awtoridad ang paggaling ng babae sa ospital upang matukoy kung may iba pang sangkot sa insidente.

Sugatan ang isang senior citizen na lalaki matapos na tagain ng kanyang kapitbahay sa Alcala, Pangasinan.

Ayon sa awtoridad, inakusahan ang biktima ng pagnanakaw ng manok na pag-aari ng suspek.

Dahil sa galit, sinugod ng itak ng suspekang biktima at bigla nitong tinaga ang 83-anyos na matanda.

Kung saan, nagtamo ang biktima ng hiwa sa kanyang kaliwang balikat.

Inaresto naman ng mga rumespondeng personnel ng mga pulis ang suspek.

Pinatay sa saksak ang isang lalaki makaraang tarakan ng patalim ng kanyang dating kaalitan sa Naic, Cavite.

Kinilala ng awtoridad ang namatay na biktima na si alyas Roldan habang naaresto naman ang suspek na si alyas Avelino.

Ayon sa pulisya, nagkasalubong ang biktima at suspek sa kahabaan ng antero soriano highway ng nasabing lugar.

Tila naungkat ang kanilang dating alitan hanggang sa nagkaroon ng mainitang pgtatalo na humantong sa paglalabas ng kutsilyo ng suspek at kaagad nitong pinagsasaksak ang biktima.

Mabilis na naaresto ang suspek dahil sa mabilis na responde ng mga awtoridad at narekober ang patalim na ginamit sa pagpatay.

Dead on the spot ang isang lalaki matapos itong barilin sa ulo ng kanyang tiyuhin sa gitna ng kanilang sagutan habang nag-iinuman sa Ilagan, Isabela.

Kinilala ng awtoridad ang biktima na si Reyjun Mina habang inaresto ng mga pulis ang tiyuhin nito na si Richard Mina.

Sa imbestigasyon ng pulisya, nag-iinuman ang magtiyuhin nang magtalo ang mga ito.

Umalis ang suspek at armado na ng shotgun nang bumalik, walang salitang inasinta nito ang ulo ng pamangkin at pinutukan ito.

Nakuha sa kanya ang 12-gauge shotgun na ginamit niya sa krimen matapos maaresto.

Dalawa katao ang nasawi sa pagsabog sa harap ng isang beach resort sa Tukuran, Zamboanga Del Sur.

Ayon sa tukuran Municipal Police Station, isang puting sasakyan na nasira ang pinto sa likod ay umalis sa lugar matapos ang pagsabog, batay sa mga salaysay ng mga saksi.

Sa lakas ng pagsabog, nadamay ang isang motorsiklo at isang bahagi ng resort, kabilang ang isang tindahan, ang nasira rin matapos ang pagsabog.

Natagpuan sa lugar ang isang bag na naglalaman ng ammonium nitrate ilang metro ang layo mula sa lugar ng pagsabog.

Patuloy ang imbestigasyon sa insidente upang matukoy ang motibo at matukoy ang mga responsable sa pagsabog.

Natagpuang patay ang isang 30-anyos na pintor sa loob ng manhole sa Cebu City, matapos umano itong mahulog mula sa ika-17 palapag ng isang hotel na under construction.

Kinilala ang nasawi na si Michael Isidro.

Sa salaysay ng katrabaho ng biktima sa mga pulis, napansin nilang hindi nag-punch-out si isidro pagkatapos ng trabaho kaya hinanap nila ito.

Laking gulat na lang nila nang matagpuan nila ang kanyang walang buhay na katawan na nakahandusay sa loob ng isang manhole.

Sa pag-iimbestiga, nabasag umano ang grill ng air conditioner kung saan nakakabit ang harness ng biktima dahil sa malakas na hangin dahilan para mahulog ito.

Sinaksak hanggang sa mapatay ang isang lalaki ng apat na suspek sa loob ng kanyang bahay sa quezon city.

Kinilala ng awtoridad ang biktimang si Andrew  Fulgencio, 22-anyos.

Agad namang naaresto ang mga suspek na pawang mga Aircon Technician.

Batay sa report ng Holy Spirit Police Station 14, humingi ng saklolo si Alvin, ama ng biktima matapos na pagsasaksakin ng mga suspek ang kaniyang anak sa loob mismo ng tahanan nito.

Inaalam pa ng mga pulis ang motibo sa pananaksak.

Samantala, inihahanda na ang kasong homicide laban sa mga salarin.

Mabilis na nasagip ang isang binatilyo ng tauhan ng Philippine Coast Guard (PCG) matapos tangayin ng malalaking alon sa Mamburao, Occidental Mindoro.

Ayon sa pulisya, naliligo ang binatilyo sa dagat ng hampasin ng naglalakihang mga alon dahilan para tangayin at mapalayo sa pampang.

Maagap namang nagtulong-tulong ang mga residente at awtoridad.

Hindi rin nakaiwas ang mga tauhan ng PCG at tinatangay din sila ng malalaking alon ngunit walang takot na sinuong ng mga ito ang alon para maisalba ang lalaki.

Gamit ang lifevest at lubid na nakatali sa kanyang katawan, unti-unti niyang nalapitan ang binatilyo at nahawakan habang nakaalalay sa kanya ang ilang mga residente at iba pang tumulong sa rescue operations.

Nasa maayos namang kondisyon ang binatilyo at nakauwi na rin sa kanyang pamilya.