INTERNATIONAL NEWS

Tatlong taon nang magkarelasyon sina Yang Jingshan at Lee Xueying mula sa Malaysia. Dahil matagal na rin silang nagsasama, napag-usapan na rin nila ang pagpapakasal.

Sa katunayan, balak ni Yang na mag-propose sa kanyang girlfriend sa mismong kaarawan niya sa June 2.

Ngunit noong May 24, ilang araw lamang bago ang pinaghandaang proposal, biglang bumaligtad ang sinasakyang kotse ng magkasintahan habang dumadaan sa Perak, northwestern Malaysia.

Sa kasamaang-palad, walang nakaligtas sa kanila. At lahat ng plano at pangarap nila, naglaho na parang bula.

Hindi pa rin naging hadlang ang trahedyang ito para sa mga pamilya ng magkasintahan na ikasal ang dalawa sa pamamagitan ng “ghost marriage”.

Ayon sa paniniwala ng mga Chinese, kung mamatay ang isang tao nang hindi natutupad ang kanyang kahilingan, hindi ito makakahanap ng kapayapaan sa kabilang buhay.

Ito umano ang dahilan kung bakit may mga nagmumulto.

Upang tulungan ang unmarried dead spirits na matupad ang kanilang pangarap na ikasal sa kanilang minamahal, idinaraos ang ghost marriage.

Bukod sa China, isinasagawa ang ghost marriage sa iba pang East Asian countries katulad ng Malaysia, North Korea, at Japan.

Sa halip na kamatayan ang maging dahilan ng kanilang hiwalayan, o ‘yung sinasabing “till death do us part”, ito pa ang naging tulay para kina Yang at Lee na matupad ang kanilang pinakahihintay na pag-iisang dibdib—kahit sa kabilang buhay.

Isang 45-anyos na lalaki ang naglilibot-libot sa Sri Jaya night market sa Pahang, Malaysia. May dala itong paper bag at nanlilimos sa mga dumadaan dito.

Nang magsagawa ng pagsusuri ang mga opisyal ng Social Welfare Department sa lugar, nadatnan nila ang lalaki.

Noong una, akala ng social workers na pipi at bingi ang pulubi dahil hindi ito sumasagot sa kanila.

Gayunman, hindi nila tinigilan ang lalaki at hiningian pa rin ito ng identification (ID) card.

Nasorpresa sila nang biglang magsalita ang lalaki at sinabing naiwan niya raw sa kotse ang kanyang ID.

Mas nagulat sila nang makita nilang Proton X70 ang sasakyan ng pulubi. Isa itong premium sport utility vehicle (SUV) na tinatayang nagkakahalaga ng P1.5 million.

Inamin ng lalaki na kumikita siya ng higit sa P6,000 kada araw sa panlilimos. Nakakakuha pa siya ng P5,600 monthly allowance mula sa Social Welfare Department dahil isa siyang person with disability (PWD).

Ginagamit niya ang nakukuhang limos at allowance bilang pambayad sa car installment at para na rin sa pang-araw-araw niyang pangangailangan.

Hindi na inireklamo ng social workers ang lalaki dahil first offense niya ito sa distrito, ngunit sinabihan siyang tigilan na ang panlilimos.

Bagama’t kailangan nating mag-ingat sa binibigyan natin ng limos, dapat pa rin nating panatilihing bukas ang ating mga puso sa pagtulong dahil sa kabila ng mga panloloko, marami pa rin ang tunay na nangangailangan.

Noong July 25, 2023, isang lalaking nakilala sa pangalang Chen ang nagtungo sa Yuyao City Fire and Rescue Brigade sa Zhejiang, China.

Sinubukan niyang kausapin ang mga bumbero, ngunit hindi siya maunawaan ng mga ito dahil may nakatakip na t-shirt sa kanyang bibig.

Nang tanggalin ang t-shirt sa bibig, dito nila nadiskubreng may naisubo palang isang LED lightbulb si Chen at hindi na niya ito mailuwa!

Sa una, tinangka ng mga bumbero na mailabas ang bumbilya, ngunit nahirapan sila dahil kailangan nilang iwasang mabasag ito sa loob ng bibig ng lalaki. Kung magkataon, mas lalala ang kalagayan niya.

Dahil dito, idinala nila si Chen sa kalapit na ospital. Iniulat ng mga doktor na hindi na nito maibuka ang bibig para maluwa ang bumbilya dahil sa sobrang ngawit.

Upang mailabas ang bumbilya, napagdesisyunan nilang i-dislocate ang isang panga ng lalaki. Nang bumukas na ang bibig nito, naalis ng mga doktor ang bumbilya nang hindi nababasag.

Ayon kay Chen, dalawang oras nang na-stuck sa bibig niya ang lightbulb nang humingi siya ng tulong sa mga bumbero.

Nang tanungin kung bakit niya isinubo ang bumbilya in the first place, inamin ni Chen na dahil ito sa isang online challenge.

Challenge failed na nga siya, kailangan niya pang sumailalim sa rehabilitasyon dahil sa nangyari sa kanyang panga.

Naging paalala ang kwento ni Chen na huwag basta susubukan at gagayahin ang mga nakikita sa internet, lalo na kung magdudulot ito ng panganib sa iyong buhay.

Dismayado ang mga naging bisita ng isang zoo sa Jiangsu, China.

Sa halip kasi makakita ng panda katulad ng ipinangako nila sa kanilang advertisement, mga asong kinulayan ng itim at puti ang nadatnan nila!

Unang ipinakita ng Taizhou Zoo ang mga “panda” sa publiko noong May 1. Mula 8 a.m. hanggang 5 p.m., dinadagsa ng mga turista ang mga panda.

Ngunit napansin ng ilang zoogoers na masyadong mabilis kumilos ang mga hayop para maging panda.

Dito na nabunyag na mga Chow Chow pala ang nasa exhibit!

Napag-alamang ginupitan ng zoo officials ng balahibo ang mga aso at pinintahan ng black and white dye upang magmukhang panda. Tiniyak naman nilang hindi ito delikado.

Nang tanungin kung bakit gumamit sila ng Chow Chow upang magpanggap, sinabi ng zoo officials na wala silang panda at ito lamang ang naisip nilang paraan.

Marami man ang gustong makakita ng tunay na panda, mailap at mahirap itong mahanap, lalo na’t nanganganib itong ma-extinct.

Bagama’t nag-improve ang conservation status nito sa “vulnerable” mula sa noo’y “endangered”, kailangan pa rin nating protektahan ang mga panda at ang kanilang mga tirahan upang mapanatili ang balanse sa ating kalikasan.

Bagama’t 20 times na siyang inaresto ng mga pulis, hindi pa rin tumigil ang isang lalaki mula sa Spain sa pag-iwas sa pagbabayad ng kanyang bills sa mga kinainang restaurant sa pamamagitan ng pagpapanggap na inaatake siya sa puso.

Isa sa mga pinakahuling target ng Lithuanian scammer na si Aidas J. ang El Buen Comer, isang tapas and seafood restaurant.

Dito, umorder siya ng seafood paella at dalawang whiskey na nagkakahalaga ng $37 o P2,150.

Matapos kumain, tinangka ni Aidas na umalis, ngunit hinarang siya ng isang staff ng restaurant upang singilin ito sa kanyang bill.

Nagpaalam siya na kukuha muna ng pera sa kanyang tinutuluyang hotel. Nang hindi siya payagan ng staff, bigla siyang humandusay sa sahig na tila inaatake sa puso.

Hindi kumbisido rito ang staff, kaya agad itong tumawag ng mga awtoridad.

Pagdating ng mga pulis, kinumpirma nilang paulit-ulit nang ginagawa ng lalaki ang ganitong scam, at ilang beses na rin siyang nadakip dahil dito.

Ayon pa sa mga pulis, madalas nilang nahuhuling nakangiti ang suspek tuwing inaaresto. Paniniwala nila, walang pakialam si Aidas sa ilang araw na pananatili sa selda.

Sa kanilang batas, magtatagal lamang kasi ng anim na linggo ang pagkakakulong sa kasong minor crime of fraud.

Upang hindi na maulit ang krimen, ikinalat ng El Buen Comer ang larawan ni Aidas sa kanilang lungsod.

Nanawagan din ang iba pang restaurant owners na nabiktima ng scammer na ipakulong ito ng dalawang taon.

Sa hirap ng buhay ngayon, iba’t ibang paraan ang ginagawa ng mga tao para lamang mapunan ang kanilang kumakalam na sikmura; ngunit sa halip na manloko, mas maigi pa ring humanap ng patas na paraan upang matugunan ang anumang pangangailangan.

Noong 2005, nakaranas ng stroke ang noo’y 30-anyos na si Ann Johnson. Nagdulot ito sa kanya ng pagkaparalisa.

Sa kasamaang-palad, nawala rin ang boses niya dahil dito.

Ngunit makalipas ang 18 years, “nakapagsalita” muli si Ann sa pamamagitan ng artificial intelligence (AI).

Isang implant ang inilagay sa ibabaw ng utak ni Ann, sa regions na may kaugnayan sa pagsasalita at wika. Mayroon itong 253 electrodes na sumasalo sa brain signals mula sa libu-libong neurons.

Mayroon ding in-install na port sa ulo ni Ann na nakakonekta sa isang kable. Ang kableng ito ang nagdadala ng brain signals sa isang computer.

Gumagamit naman ang computer ng AI algorithms upang i-translate ang brain signals sa sentences, na siya namang binibigkas ng isang digital avatar.

Nako-convert din ng teknolohiya ang brain signals sa facial movements, kaya nagpapakita ng emosyon ang avatar. Maging ang boses niya, kuhang-kuha nito dahil ginamit ng researchers ang voice recording ni Ann bago ma-stroke.

Ayon kay Dr. Edward Chang, chair ng neurological surgery ng University of California San Francisco na nagsagawa ng operasyon ni Ann, 150-200 words per minute ang natural rate ng speech; may kalapitan na sa 80 words per minute ng kanilang teknolohiya.

Mas mabilis at accurate ang ganitong sistema, kumpara sa mga nakaraang teknolohiya na katulad nito.

Sa panig naman ni Ann, bumuhos ang kanyang emosyon nang marinig muli ang kanyang sariling boses. Hangad niya, magamit ang teknolohiyang ito upang maging counselor.

Ipinakita ng kwentong ito ni Ann na may kakayahang magbigay ng bagong buhay at pag-asa sa mga taong lubos na nangangailangan ang pagsusulong sa siyensya at teknolohiya.

Isang lalaki ang nanloob sa isang tirahan sa Uttar Pradesh, India. Plano niyang magnakaw ng pera, water pump, washbin, at gas cylinder.

Ngunit nang makita niya ang aircon sa loob ng bahay, agad niya itong binuksan. Kumuha siya ng unan, humiga sa sahig, at unti-unting nakatulog.

Nakadestino sa Varanasi, India ang may-ari ng bahay na si Dr. Sunil Pandey nang mangyari ang insidente.

Nang mapansin na bukas ang gate, agad siyang tinawagan ng kanyang mga kapitbahay. Iniulat naman ito ng doktor sa mga pulis.

Nadatnan na lamang ng mga pulis na natutulog pa rin sa sahig ang magnanakaw. Hawak-hawak pa nito ang kanyang cellphone!

Napag-alamang lasing pala ang suspek na kinilalang si Kapil. Dahil sa pagkalasing at sa lamig na rin ng aircon, naging mahimbing ang kanyang tulog.

Ngayon, nahaharap siya sa kasong theft.

Nakakatawa man ito para sa iba, maging paalala sana ito sa lahat na mag-ingat at pahalagahan ang seguridad ng ating mga tahanan—may aircon man o wala.