HEADLINES

Napag-alaman na isang kasunduan ang nakatakdang lagdaan sa pagitan ng Pilipinas at ng Vietnam na layong mapalakas ang maritime cooperation sa West Philippine Sea.

Ang pahayag ay ginawa ni PBBM kasunod ng panibagong insidente sa West Philippine Sea kung saan ginamitan pa ng water cannon ng China Coast Guard (CCG) ang barko ng Philippine Coast Guard (PCG).

Sa pakikipag-usap ni Pangulong Marcos kay outgoing Vietnam Ambassador to the Philippines Hoang Huy Chung, binigyang-diin nito ang kahalagahan ng maritime cooperation sa pagitan ng dalawang bansa.

Iginiit ng Pangulo na sa pamamagitan ng “solid agreement” mas magiging madali na harapin ang “common challenges” sa usapin ng territorial disputes.

Nagpasalamat din si Pangulong Marcos kay Chung sa kanyang ipinakitang kasipagan sa panahon ng kanyang panunungkulan.

Sa panig ni Chung, ipinaabot nito ang pasasalamat ni Vietnam President Vo Van Thuong kay Pangulong Marcos at sa gobyerno ng Pilipinas.

Pinangunahan ng National Telecommunications Commission (NTC) ang paglulunsad ng automated platform para sa licensing at permitting processes ng ahensya.

Ang Online Processing System with Digital Payment System (OPS-DPS) Project ng NTC ay bilang tugon sa layunin ni Pangulong Ferdinand “Bongbong” R. Marcos, Jr. na bilisan ang mga hakbang para gawing digitalize ang mga proseso sa gobyerno.

Sa ilalim ng nasabing proyekto ng NTC, inaasahang mas mapapabilis ang proseso at pag-iisyu ng lisensya, permit, certificates, authorizations, at clearances para sa mga telecommunications at internet infrastructure.

Ang soft launch para sa OPS-DPS ay dinaluhan ng mga kinatawan mula sa by Htech Corporation ang system provider, Globe Telecom, Inc. (Globe) at mga kinatawan mula sa NTC.

Ang grand launch para sa proyekto ay target na maisagawa sa October 2023.

Tiniyak ni Pangulong Ferdinand Marcos Jr. na may sapat na stock ng bigas sa bansa na kayang tumagal sa panahon ng pag-iral ng El Niño phenomenon.

Inihayag ito ng pangulo kasunod ng pulong sa Private Sector Advisory Council and Philippine Rice Stakeholders Movement (PRISM) sa Malacañang.

Ayon sa pangulo, stable ang rice situation sa bansa at may sapat na suplay hanggang sa matapos ang El Niño sa susunod na taon.

Sa naturang pulong, iprinisinta ng Department of Agriculture (DA) at ng PRISM ang rice supply outlook ng bansa hanggang sa katapusan ng taong 2023.

Ipinatawag ng pangulo ang pulong para talakayin ang status ng rice industry at ang mga ipinatutupad na hakbang para masiguro ang sapat na suplay ng bigas sa bansa.

Sa pagtaya naman ni DA Undersecretary Merceditas Sombillo, ang projected ending stock ng bigas para sa taong 2023 ay 1.96 million metric tons (MMT) na kayang tumagal ng 52-araw.

Ang harvest season ng palay ay nakatakdang magsimula sa Setyembre at Nobyembre ngayong taon.

Makaraang lumutang ang sinasabing hindi maayos na pagbibigay ng benepisyo sa ilalim ng Republic Act 11861 o ang Expanded Solo Parent Act, nangako si Sen. Chrostopher “Bong” Go na sisilipin ang naturang isyu.

Sa isang panayam, sinabi ni Sen. Go, na maghahain siya ng panukalang batas sa senado para ma-review ang implementasyon ng batas.

“Para sa mga solo parent ‘yan. Pero kung hindi naman nila natatanggap ang mga benepisyo nito, ano pa ang saysay,” ayon sa senador mula sa Davao.

Sinabi ni Go na ikokonsulta niya rin ang usapin kay Senadora Riza Hontiveros na siyang primary author ng batas.

Dagdag pa ng mambabatas, nakarating nga sa kanya na kahit ang malalaking lungsod ay hindi naibibigay ang P1,000 na monthly allowance sa mga solo parent na nakasaad naman sa nasabing batas.

“Ang mas masaklap yung mga solo parent sa 5th o 6th class municipalities ay wala talagang natatanggap na ni singko dahil ayon sa balita, wala daw sila pagkukunan ng pondo,” ani Go.

Nagtataka din ang senador kung bakit hindi rin naibibigay ang 10 percent discount sa grocery store at mga botika para sa mga solo parent na may anak na 6 years old and below.

Isa kasi sa probisyon ng batas ay exempted ang mga solo parent sa value added tax kung ang kanilang kita ay hindi lalagpas ng P250,000 kada taon.

May 10 porsyentong diskwento rin naman sila sa mga gamot, pagkain at gamit ng bata tulad ng diaper, gatas, gamot at bakuna.

Si Sen. Go ay isa sa mga co-author ng Expanded Solo Parent Act.

Hinimok ni Pangulong Ferdinand Marcos Jr. ang Katipunan ng mga Artistang Pilipino sa Pelikula at Telebisyon (KAPPT) na mas itaas pa ang kalidad ng pelikulang Pilipino.

Ayon sa Pangulo, ang pelikula ay epektibong instrumento upang ipakita hindi lamang ang Filipino culture, kundi maging ang mga progresong nakamit na ng Pilipinas.

Sa kanyang mensahe sa oath-taking ceremony ng KAPPT officers at ng Board of Directors nito, tiniyak ng Presidente ang tulong ng gobyerno sa grupo.

“I am pleased to hear your oath and commitment to responsibly lead our very own actors guild and to know that the government has a genuine and reliable partner in all of you,” ayon kay PBBM.

Sinabi ni Marcos na ang mga pelikula at ang telebisyon ay nagsisilbing epektibong plataporma para sa makabuluhang dayalogo at positibong pagbabago.

Maliban dito, kinilala rin ni Pangulong Marcos ang mga hakbang ng KAPPT upang tiyakin ang kapakanan ng local film and television industry workers, magkaloob ng trabaho at oportunidad sa publiko at makatulong sa ekonomiya ng bansa.

Sabi ng Pangulo, suportado ng gobyerno ang industriya ng pelikula at telebisyon at tutulong ang pamahalaan sa promosyon ng mayamang kultura ng bansa.

“Lahat ‘yan ay mahalaga sa gobyerno. Mahalaga sa ekonomiya natin ‘yan. Kasi nakakatulong ‘yan sa ating pag-publicize ng Pilipinas at tayo naman ay maipagmamalaki natin, hindi tayo mapapahiya kahit sa anong klaseng…. artistic endeavor,” dagdag pa ng Pangulo.

Aniya pa, kabila ng naging epekto ng pandemya ng COVID-19 sa local film industry, hindi naman ito naging hadlang sa mga director, artista at industry workers para magbigay ng de kalidad na produkto na ang iba ay nasali pa sa mga international film festivals.

Umaasa naman ang Pangulo na sasamantalahin ng KAPPT ang makabagong teknolohiya at bagong mga plataporma para maipakita sa mundo ang galing ng mga Pinoy sa industriya.

Nagpahayag ng mariing pagkondena ang Armed Forces of the Philippines (AFP)  at Philippine Coast Guard (PCG) sa panibagong pambubully ng Chinese Coast  Guard supply boat ng Pilipinas sa patungong Ayungin Shoal na magdadala sana ng suplay para sa BRP Sierra Madre.

Kung saan hinarang at ginamitan ng Chinese Coast Guard (CCG) ng water cannon ang naturang supply boat ng Pilipinas, dahilan upang hindi madala ang mga naturang suplay lulan ng barko.

Sa inilabas na pahayag ng afp, iginiit nito na paglabag sa international law ang nasabing hakbang partikular sa 1982 United Nations Convention on the Law of the Sea (UNCLOS) pati na rin sa 2016 Arbitral Award.

Habang nanawagan naman si PCG Spokesperson for the West Philippine Sea Commodore Jay Tarriela sa Chinese Coast Guard na igalang ang Sovereign Rights ng Pilipinas at iwasang hadlangan ang kalayaan sa paglalayag.

TULOY na tuloy ang Konsyerto sa Palasyo (KSP) na inaasahang panonoorin ng daan-daang mga atleta bandang alas-6:30 ng gabi sa Linggo, Agosto 6.

Ito ang kinumpirma ni Dir. Anna Cristina “Kris” Villonco ng Broadcast Production ng Presidential Communications Office (PCO) kung saan bahagi aniya ito ng concert series na sinimulan noong Abril ngayong taon ng Office of the President, PCO at Radio Television Malacañang (RTVM) bilang suporta sa creative industries na nasapol ng pandemya.

Layunin ng konsiyerto na kilalanin ang husay at galing ng mga masisipag at world-class athletes sa bansa at sa kabilang banda’y makahanap din ng mga bagong usbong na artist at mabigyan sila ng pagkakataong makapagtanghal sa “People’s Palace”.

Tampok sa KSP ang powerhouse vocalists na sina Chloe Redondo, Emman Buñao, Jopper Ril at Kevin Traqueña, kasama ang mga beatbox artists na sina Adrian “Ad Beat” Ferrer at Neil Rey Llanes.

Magkakaroon din ng special performances si The Voice France Season 8 contestant Aivan Mendoza, gayundin ang a capella group na Pinopela mula Baguio City, at maging ang professional dance group Douglas Nierras Powerdance.

Ayon kay Villonco, karamihan sa mga magtatanghal ay nagkaroon na ng viral videos sa social media sa kani-kanilang larangan.

Pinamagatang “Konsyerto sa Palasyo: Para sa Atletang Pilipino,” ang event ay inaasahang panonoorin din ng mahigit tatlong daang atleta mula sa iba’t ibang sports at ipapalabas nang live sa official social media pages ng Konsyerto sa Palasyo at RTVM.

Bumagal pa sa ika-anim na sunod na buwan ang inflation ng bansa.

Ayon kay National Statistician at Undersecretary Dennis Mapa, ang naitalang 4.7% inflation sa nakalipas na buwan ng Hulyo ay dahil sa bumagal ding pagtataas sa presyo ng pabahay, kuryente, gas at iba pang produktong petrolyo.

Ipinabatid pa ng Philippine Statistics Authority (PSA) na bumagal din ang pagsirit ng presyo ng pagkain na nasa 6.3% sa nakalipas na buwan kumpara sa 6.7% sa buwan ng Hunyo.

Bukod dito, isa pang factor sa July 2023 inflation ang pagbagal ng singil sa transportasyon na naitala sa pinakamabilis na annual decrease na negative 4.7% sa buong buwan mula sa negative 3.1% nuong June 2023.

Dahil dito, ang average inflation rate mula January hanggang July 2023 ay pumapalo sa 6.8%.

Ang July 2023 inflation ay pasok pa rin sa 4.1 hanggang 4.9% forecast ng Bangko Sentral ng Pilipinas bagama’t mas mataas sa dalawa hanggang apat na porsyentong target range ng economic managers.

Nagpatakam ang SM Supemalls ng magkakaibang culinary heritage ng Pilipinas mula sa iba’t ibang rehiyon na may sariling natatanging lasa.

Mahilig ka man sa pagkain o naghahanap ng pagkain na makapag-satisfy ng iyong cravings, maraming kilalang restaurant ang nag-aalok ng iba’t ibang putahe na may  mga kakaibang lasa mula sa iba’t ibang lalawigan sa bansa.

Upang masebisyuhan ang dumaraming food enthusiasts, maraming kilalang pangalan sa food industries ang naipakalat para maihandog ang mga masasarap na pagkain sa mga mall at iba pang pampublikong lugar.

Nagbibigay-daan ito sa publiko na madaling ma-access ang kanilang mga paboritong pagkain.

Matatagpuan ilang oras lang ang layo mula sa maynila, sa mga probinsya ng Nueva Ecija, Isabela, at Cagayan.

Kung ikaw ay nasa Cabanatuan, Nueva Ecija, tiyaking bumisita sa SM Megacenter para sa isang exciting experience sa pagluluto na pasok sa iyong bulsa.

Isang dapat puntahan ang Joey’s Restaurant Cafe, na kilala sa mga masarap ngunit abot-kayang pagkain nito na siguradong mabubusog ka sa flavorful fresh lumpia, lechon paksiw, pork barbecue, authentic pansit malabon, at refreshing halo-halo.

Sa mga sweet tooth cravings magandang bumisita sa Edna’s Cakeland para cake and pastry. Na nagsimula ang lahat sa ancestral home ng may-ari sa Kapitan Pepe Subdivision, na ngayon ay main branch sa Cabanatuan City.

Habang umiikot sa Cabanatuan City, siguraduhing bisitahin ang SM City Cabanatuan, isang destinasyon na nag-aalok hindi lamang ng masarap na pagkain kundi tumutulong din sa komunidad isa na rito ang Harvest Café PH.

Higit pa sa mga masasarap na offer nito, isang itong social enterprise na may social responsibility.

Para sa mga naghahanap ng restaurant na may warm and inviting atmosphere, ang Gerry’s Grill ay ang perfect destination for local favorites na ipinares sa malawak na cocktail menu.

Ang mga residente at turista ay makakadiskubre ng maraming pagpipiliang pagkain sa loob ng sm supermalls na nagsisilbing culinary hub.

Sa pamamagitan ng pagbisita sa SM Supermalls sa buong bansa, mae-experienced ang malawak na culinary horizon at ang mga kuwentong bumubuo sa mga pagkaing ito.

Upang gawing enjoyable ang kainan, ang mga sikat na food brands ay nag-expand sa mga mall at pampublikong lugar upang mas madali para sa mga tao na tangkilikin ang kanilang mga paboritong pagkain.

Para naman sa lahat ng K-pop at K-drama enthusiast! Humanda ng makiisa sa Nami PH, isang classy at sassy korean restaurant na nagtatampok din ng k-street food na malapit nang magbukas sa SM Center Tuguegarao Downtown with legit Korean cuisine at i-enjoy ang mala-K-like ambiance.

Kung kailangan mo ng masarap na dessert, huwag nang magdalawang isip pa kay Mr. Bingsu para ma-satisfy ang iyong sweet cravings partikular na ang kanilang Mango Bingsu.

Sa Cauayan, Isabela naman, maaaring tuklasin ng mga food entusiasts ang world of flavor sa SM City Cauayan.

Ang isang lugar na dapat subukan ay ang Buffalo Wings n Things, na may kumbinasyon ng american at mexican cuisine hindi rin papahuli ang quesadilla at nachos nila.

Para sa mga mahilig sa milk tea na naghahanap ng kakaibang twist, ang Pirazzo Milk Tea is a must try!

Lalo na ang kanilang signature na frostea na may masarap na suntok ng kape.

Nag-aalok din ang SM City Tuguegarao ng iba’t ibang traditional, trending, or international flavors. Ang isang dapat puntahan ang Asyanos Filipino Asian Buffet.

Pagdating sa milk tea cravings, Vanitea Cafe PH ang lugar na perfect puntahan.

Para sa mga mas gustong mapuno ang kanilang tiyan bago magpakasawa sa milk tea, nag-aalok ang Vanitea Cafe PH ng malawak na mga pagpipilian. Mayroon pa silang available na rice options at higit pa sa tradisyonal na lutuing Filipino.

Sa huling araw ng inyong culinary adventure, tiyakin na bisitahin ang Domlene’s Empanada sa masarap at malinamnam na kumbinasyon ng mga lasa at sangkap, hindi lang yun may mga benepisyong pangkalusugan sa bawat kagat.

Lumagda sa isang tripartite agreement ang Energy Regulatory Commission(ERC), Iloilo City Government at More Electric and Power Corporation (MORE Power) na nagsusulong ng paggamit ng renewable energy resources na magbibigay-daan sa pagbaba pa ng presyo ng kuryente.

Batay sa kasunduan, mag-eestablisa ang MORE Power ng one-stop shop na nag-aalok ng renewable energy technologies gaya ng Net Metering at Distributed Energy Resources (DER) na maaaring pagpilian ng mga consumers.

Pahayag ni MORE Power President at CEO Roel Castro, ang kasunduan sa pagitan ng ERC at Iloilo LGU ay bilang pagsuporta sa target ng pamahalaan na mabawasan ang greenhouse gas emissions sa pamamagitan ng paggamit na ng renewable energy resources.

”One of the obligations under the agreement is to have a one-stop shop where applicants and interested parties can come. Our collaboration with the city government has been active for the past three years, and we warmly welcome the involvement of ERC. Being the first in the Visayas to enter into this agreement showcases our strong support for the government,” pahayag ni Castro.

Ayon kay ERC Chairperson at CEO Atty. Monalisa Dimalanta, sa ilalim ng kasunduan ang ERC ang siyang magbibigay ng technical at regulatory expertise, kabilang dito pag-streamline ng documentary submission, installation, payment at permitting processes ng Net-Metering at DER.

Nabatid na palalakasin din ng ERC ang information drive para mas lalong tangkilikin ng mga electric consumers sa Iloilo City ang renewable energy.

Ang Iloilo ang ikalawa lamang sa mga pilot Local Government Unit partner ng ERC para sa Net-Metering at sa kanilang greater renewable energy program.

“We hope that other LGUs are similarly inspired to partner with national agencies to bring solutions closer to our people,”ani Dimalanta.

Sa panig ng LGU, hinimok ni Mayor Jerry Treñas ang mga residente, partikular ang mga small businesses na lumipat na sa paggamit ng renewable energy para sa tiyak na pagbaba ng kanilang energy consumption.

Siniguro rin nito ang promosyon ng green practices sa lungsod sa pamamagitan ng paggamit pa ng solar panels.

“With this partnership, we aim to promote green practices, aligning with the national government’s targets. In Iloilo, our efforts include solar panels at the national high school, city hall, dialysis centers, and eye care facilities,” pahayag pa ni Treñas.

Sinasabing sa inisyal na paglulunsad ng programa ay nasa 72 qualified users na ang naisyuhan ng Certificate of Compliance ng ERC para sa Net Metering Program sa Iloilo City at inaasahan na madaragdagan pa ito sa mga susunod na araw.