HEADLINES

Nakapagtala ng mataas na mga bagong kaso ng COVID-19 ang tatlong rehiyon sa bansa.

Kabilang dito, ayon kay Health Undersecretary Maria Rosario Vergeire ang Bicol Region, Zamboanga Peninsula at MIMAROPA.

Ipinabatid ni Vergeire na ang Bicol ay nakapagtala ng halos 44,000 COVID-19 cases, mahigit 43,000 naman ang Zamboanga Peninsula at halos 30,000 cases sa MIMAROPA.

Samantala, inihayag ni Vergeire na ang Cordillera Administrative Region (CAR), Ilocos Region at Cagayan Valley ay nananatiling nasa high risk classification dahil sa bilang ng COVID-19 cases.

Unti unti nang bumababa ang kaso ng COVID-19 sa Quezon City kasunod na rin nang tuluy tuloy na testing at pagbabakuna sa mga residente rito.

Sa katunayan, ipinabatid ni Dr Rolando Cruz, pinuno ng QC Epidemiology and Surveillance Unit na nakapagtala ng negative growth rate ang lungsod nitong nakalipas na dalawang linggo kung saan ang average daily case na mahigit 1,000 ay naging 500 na lamang.

Gayunman, sinabi ni Cruz na uubrang tumaas muli ang kaso kung ititigil ang testing at pagbabakuna sa mga residente sa pamamagitan ng granular vaccination strategy.

Nakikipag ugnayan na ang COMELEC sa NTC sa pagaaral ng mga posibleng batas laban sa paggamit ng emergency alert system para sa political agenda.

Ayon kay COMELEC Spokesman James Jimenez, hinihintay nila ang resulta ng imbestigasyon ng NTC sa alert system matapos mag file ng COC si dating Senador Bong Bong Marcos na sa tiningi nila ay wala namang nalabag sa elections law.

Gayunman, pinagaaralan aniya nila ang mga posibleng batas laban sa pag abuso sa emergency alert system.

Sinabi ni jimenez na bago ang nasabing strategy kayat nais nilang matutukan kung may legal na basehan ang paggamit ng alert system sa eleksyon.

Pumapalo na sa mahigit 5.5-M doses ng Pfizer-Bio N Tech vaccine ang naibigay na ng Amerika sa Pilipinas sa pamamagitan ng COVID-19 Vaccines Global Access Facility ngayong linggo.

Ang mga nasabing supply ng Pfizer vaccines ay dumating sa bansa sa limang magkakahiwalay na shipment sa Maynila, Cebu at Davao mula Oktubre 1 hanggang 6.

Ang supply ng Pfizer vaccines sa Pilipinas ay bahagi ng 500-M doses na inilaan ng Amerika para sa patas na distribusyon sa pamamagitan ng Covax facility.

Pormal nang naghain ng kaniyang kandidatura para sa ikatlo at huling termino si Marikina City Mayor Marcelino Marcy Teodoro

Inihain ni Teodoro ang kaniyang kandidatura sa opisina ng Local Comelec sa bahagi ng Marikina Sports Complex sa Brgy. Sta. Elena ganap na ika-siyam kaninang umaga

Kasamang naghain ni Teodoro ng kaniyang kandidatura ang may bahay nitong si Ginang Marjorie Teodoro

Muling hiningi ni Teodoro ang suporta ng kaniyang mga nasasakupan at nagpasalamat sa tiwalang ibinibigay sa kaniya ng mga ito

Bago naging Alkalde nuong 2013, nagsilbi munang kinatawan ng lungsod si Teodoro sa mababang kapulungan ng Kongreso. —ulat mula kay Jaymark Dagala (Patrol 9)

Kinumpirma ng Philippine National Police o PNP na hawak na ng Criminal Investigation and Detection Group o CIDG ang mga dokumentong isinumite ng Armed Forces of the Philippines o AFP.

Ito’y may kaugnayan sa sandamukal na paglabag ng mga miyembro ng Communist Party of the Philippines – New People’s Army o CPP-NPA sa karapatang pantao gayundin sa International Humanitarian Law.

Ayon kay PNP Chief P/Gen. Guillermo Eleazar, aabot sa 1,672 mga kaso at paglabag sa karapatang pantao ng mga komunistang terrorista mula pa noong taong 2010 hanggang sa kasalukuyan.

Kabilang dito ang paggamit sa mga child warrior, pagpatay, paninira ng mga kagamitang sibilyan, paggamit sa mga anti personnel mines at iba pa.

Patunay lang ito ani Eleazar na matibay ang ugnayan ng pamahalaan para labanan ang pamamayagpag ng mga komunista na deka-dekada nang nagpapahirap sa mga Pilipino.

Una nang sinampahan ng CIDG ng patumpatong na kaso si CPP Founding Chairman Jose Ma. Sison sa pagrerecruit nito sa mga kabataan para sumali sa kilusan na nagsisimula sa mga student organizations na nabistong legal front pala ng mga komunista.—ulat mula kay Jaymark Dagala (Patrol 9)

Pormal nang naigawad ang ika-apat na estrelya kay Armed Forces of the Philippines o AFP Chief of Staff Jose Faustino Jr. na ngayo’y full pledged General na .

Mismong ang Commander in Chief ng AFP na si Pangulong Rodrigo Duterte ang nanguna sa donning of ranks kay Faustino kasabay na rin ng pagbisita nito sa Albay kahapon .

Maliban kay Faustino, iginawad na rin ng punong ehekutibo ang ikatlong estrelya kay Southern Luzon Command Chief Lt/Gen. Bartolome Bacarro na kabilang sa 5 opisyal ng AFP na nabigyan ng pagkakataong maitaas ang ranggo .

Dahil diyan, bibigyan ng kaukulang parangal si Faustino bilang ika-56 na Chief of Staff ng AFP bukas, Oktubre 8 sa National Headquarters nito sa Kampo Aguinaldo, Quezon City.

Pinalitan ni Faustino na nagmula sa Philippine Military Academy o PMA “Maringal” class of 1988 si retired Gen. Cirilito Sobejana na mula naman sa PMA Hinirang class of 1987 na nagretiro na noong Hulyo.

Gayunman, 4 na buwan lang pamumunuan ni Faustino ang AFP dahil nakatakda na siyang magretiro sa Nobyembre 12.—ulat mula kay Jaymark Dagala (Patrol 9)

Nababahala ang isang grupo sa pagtaas ng kaso ng Human Immunodeficiency Virus (HIV) and Acquired Immune Deficiency Syndrome (AIDS) sa General Santos City, lalo na sa mga kabataan doon.

Ayon kay Cris Lopera, Executive Director ng Gender Rights and Reproductive Health Advocate Shine Soccskargen Inc., tumaas ang mga kaso ng naturang sakit sa siyudad sa nakalipas na mga buwan.

Batay sa datos mula sa City Health Office HIV/AIDS Core Team hanggang nitong Setyembre, umakyat na sa 112 ang mga kaso nito, na mas mataas kumpara sa 44 na kaso noong nakaraang taon.

Kabilang sa HIV/AIDS cases ay isang 15-anyos na lalaki.

Sinabi pa ni Lopera na dapat ding tutukan ng lokal na pamahalaan ang nasabing sakit maliban sa COVID-19.—sa panulat ni Hya Ludivico

Ilan pang mga artista at kilalang personalidad ang naghain ng kanilang kandidatura kahapon.

Kabilang sa kanila ang dating aktor na si Daniel Fernando na muling tatakbo bilang Gobernador ng Bulacan, at tatakbong Vice Governor naman si Alex Castro.

Puntirya naman ng komedyanteng si Long Mejia na mahalal na board member ng unang distrito ng Bulacan.

Si Vandolph Quizon at ang magkapatid na Jomari at Ryan Yllana ay tatakbo namang konsehal ng Parañaque.

Tatakbo ring bokal ang singer-songwriter na si Lito Camo sa Oriental Mindoro.

Kakandidato namang konsehal ng Cavite ang dating ”goin’ bulilit” star na si Nash Aguas.

Target naman ni incumbent Vice Governor Jolo Revilla  na mahalal bilang kongresista sa unang distrito ng Cavite.

Naghain na rin ng kanilang kandidatura sa Olongapo ang aktres na si Claudine Barretto bilang konsehal at talent manager na si Arnold Vegafria bilang Alkalde.—sa panulat ni Hya Ludivico