HEADLINES

Naghain na rin ng Certificate of Candidacy (COC) ang showbiz personality na si Robin Padilla at dating “That’s Entertainment ” member na si Joed Serrano.
Si Robin ay kabilang sa mga senatorial candidate sa ilalim ng PDP-Laban faction ni energy secretary Alfonso Cusi.
Kasama ni Robin sa grupo sina presidential legal counsel Salvador Panelo, dating senador at ngayon ay information and technology Secretary Gregorio Honasan, Sagip Party-List Rep. Rodante Marcoleta, anti-corruption commissioner Greco Belgica, broadcaster Rey Langit, at agrarian reform secretary John Castriciones.
Una nang ibinunyag naman ni Joed na plano nito na tumakbo sa Pagka-Pangulo, ngunit noong nalaman na naghain ng kandidatura ang kanyang dating kasamahan sa industriya na si Manila Isko Moreno ay hindi na ito tumuloy.
Sinabi ni Joed na nais niyang isulong ang karapatan ng kinabibilangan niyang LGBT community at labanan ang diskriminasyon.

Inaasahang aarangkada na ang pilot vaccination para sa edad 12 hanggang 17 anyos para sa piling mga ospital sa Metro Manila.
Ayon kay vaccine czar Carlito Galvez, kasama sa paglalaanan ng bakuna ng pamahalaan ang pilot vaccination ng mga kabataan.
Dagdag pa ni Galvez, posibleng nasa 40 hanggang 50 doses ang i-a-allocate para sa inisyal na pagbabakuna sa mga kabataan na nasa nasabing edad.
Samantala, inaasahan naman ng mga eksperto na maaagapan ang malalang kaso ng COVID-19 para sa 12 taong gulang pataas sa pag-apruba ng bagong gamot na Ronapreve, isang Monoclonal antibody treament kontra COVID-19.
Sa huli, sinabi ni Galvez na bubuhos pa ang mga suplay ng bakuna sa huling quarter ng taon kaya inaasahang mas maraming Pilipino ang mababakunahan bago mag-Pasko.

Aarangkada na ang pagbabakuna kontra COVID-19 sa mga kabataan sa Oktubre 18, araw ng Biyernes.
Sinabi ni presidential spokesperson Harry Roque na sisimulan ang pediatric vaccination sa mga ospital ng National Children’s Hospital at Philippine Heart Center, Fe Del Mundo Medical Center, pawang nasa Quezon City; Pasig City Children’s Hospital sa Pasig City; Philippine General Hospital sa Maynila; Makati Medical Center sa Makati City St. Luke’s medical center sa Taguig City; at Philippine Children’s Medical Center sa Quezon City.
Dagdag ng kalihim, ang nasabing rollout sa mga ospital ay by age group mula 15 hanggang 17 taong gulang at 12 hanggang 14 na taong gulang.
Batay sa national COVID-19 dashboard, nasa mahigit 40 milyong doses na ang total vaccines ang na-administer.
Samantala, nasa mahigit 17 doses na ang naiturok sa Metro Manila habang nasa kabuuang bilang na 22 milyon na ang nakatanggap ng dalawang dose ng bakuna sa buong bansa.

Sumailalim na ang unang trainset ng rolling stock contract ng PNR Clark Phase 1 sa Factor Acceptance Tests (FATS) sa japan.

Sinabi ng Department of Transportation (DOTR), maaari nang maisalang sa beripikasyon ang mga bagong trainset kung nakasunod ito sa international standards tulad ng International Organization of Standardization (ISO) at Japanese Industrial Standards (JIS).

Ipinabatid pa ng DOTR na makatutulong ang FATS para malaman kung gumagana nang maayos ang tren bago ito ipadala sa Pilipinas.

Samantala, nakatakda namang ipadala ang nasabing trainset ngayong buwan ng Oktubre mula sa Yokohama Port at darating ito sa Malanday Depot sa unang linggo ng Disyembre.

Patuloy ang pag akyat ng kumpirmadong kaso ng COVID-19 sa bansa na nasa mahigit 2.6-M na kasama ang mahigit 10,000 o nasa 10,670 na mga bagong kaso ng COVID-19.

Ayon sa DOH, naitala sa 118,203 ang active cases ng COVID-19 kung saan 77.7% ang mild, 13.4% ang asymptomatic, 2.7% ang severe at 1.1% ang critical condition.

Samantala, sumirit pa sa halos 2.5-M ang total recoveries matapos maitala ang 7,691 na mga bagong gumaling sa COVID-19.

Sumampa naman na sa mahigit 39,000 ang death toll nang maitala ang 191 na mga bagong nasawi sa virus. —sa ulat ni Aya Yupangco (Patrol 5)

Isinumite na ng DOJ for resolution ang drug complaint na isinampa ng pulisya laban kay Julian Ongpin na itinuturing na person of interest sa pagkamatay ng artist na si Bree Jonson.

Kasunod na rin ito nang pagdalo ni Ongpin, kasama ang dalawang abogado niya sa pagpapatuloy ng preliminary investigation para isumite ang kanyang supplemental counter affidavit.

Si Ongpin na anak ng negosyanteng si Roberto Ongpin ay kinasuhan kaugnay sa pagbitbit ng droga matapos marekober sa kanya ang 12 grams ng cocaine sa kuwartong tinuluyan nila ni Jonson sa isang beach resort sa La Union.

Naghain na ng kaniyang kandidatura si Taguig City Rep. Lani Cayetano hindi bilang reeleksyunista kungdi para bumalik bilang Alkalde ng Lungsod.

Ito’y matapos maghayag na ang incumbent Mayor na si Lino Cayetano na hindi na papalaot sa pulitika ngayong 2022 National at Local Elections.

Sa kaniyang pahayag, sinabi ni Mayor Cayetano na kahit hindi na siya tatakbong reeleksyunista ay gugugulin pa rin niya ang nalalabi niyang panahon sa COVID-19 response ng Lungsod.

Nagpasalamat ang Alkalde sa mga taga-Taguig sa kanilang pakikiisa, pakikipag-tulungan at bayanihan para malabanan ang pandemiya kahit sa simpleng paraan sa panahon ng kaniyang termino.

Aniya, matagal na niyang pinag-isipan ang hindi pagpalaot muli sa mundo ng pulitika at sa halip ay mas pinili niyang magbigay daan na lamang sa kaniyang hipag na naging Alkalde na rin sa loob ng 9 na taon. —sa ulat ni Jaymark Dagala (Patrol 9)

Matapos ang bagyong Lannie, muling pinaghahanda ng pamunuan ng Philippine National Police (PNP) ang mga tauhan nito sa epektong dulot naman ng bagyong Maring.

Ayon kay PNP Chief P/Gen. Guillermo Eleazar, kaniya nang inatasan ang Police Regional Office 8 o Eastern Visayas at mga karatig na rehiyon nito  na tutukan ang pinakahuling lagay ng panahon.

Inabisuhan niya ang mga kinauukulang yunit ng pulisya na palagiang alamin ang mga ulat mula sa PAGASA para sa pagkakasa ng maagang paglilikas kung kakailanganin.

Batay sa ulat ng weather bureau, kasalukuyang nasa Philippine Area of Responsibility na ang bagyo at erratic o sadyang pabagu-bago ang ikinikilos nito. —sa ulat ni Jaymark Dagala (Patrol 9)

Inulan ng mga reklamo sa social media ang telecommunications company na Smart-PLDT.

Sa kanilang posts sa Facebook, inireklamo ng mga subscriber ang anila’y palpak na serbisyo ng kumpanya tulad ng mabagal na internet, madalas na pagkawala ng signal o connection, madayang promo at hindi maaasahang customer service.

Malaking porsyento rin ng mga nag reklamo sa social media laban sa mabagal na internet ng Smart-PLDT ay nagsabing nakakaapekto ito sa online class ng kani-kanilang mga kaanak gayundin ang sitwasyon ng mga naka work from home partikular ang mga madalas sumalang sa online meetings.

Nagbanta ang maraming netizens na lilipat na sila ng network dahil pikang-pika na sila sa palpak na serbisyo ng Smart-PLDT. —sa ulat ni Jaymark Dagala (Patrol 9)

Pupuwede nang mag biyahe sa mga lugar na nasa ilalim ng GCQ at MGCQ ang mga menor de edad at fully vaccinated individuals na mahigit 65 taong gulang mula sa Metro Manila.

Ayon ito kay Presidential Spokesman Harry Roque matapos magpasok ng probisyon ang IATF sa mga guidelines hinggil sa pilot implementation ng alert level system para sa COVID-19 response sa Metro Manila.

Bukod sa menor de edad at fully vaccinated individuals na 65 years old pataas, sinabi ni Roque na pinayagan na ring makapag biyahe ang mga fully vaccinated indivuals na mayroong immunodeficiencies, comorbidities at iba pang health risks at fully vaccinated pregnant women.

Gayunman, iginiit ni Roque na kailangan pa ring sumunod sa iba pang panuntunan at  health protocols na ikinakasa ng DOT at LGU na nakakasakop sa lugar na pupuntahan. —sa ulat ni Jopel Pelenio (Patrol 17)