FEATURES

Kung may natitira ka na lamang na tatlong buwan upang mabuhay sa mundo, ano ang gagawin mo?

Ito ang naging tanong ni Alex Parra sa kanyang sarili. Sa edad lamang na 15 years old, na-diagnose ang noo’y junior high school student-athlete ng stage 2 osteosarcoma, isang uri ng bone cancer.

Ayon sa mga doktor, 40% ang kanyang survival rate. Dahil hindi nagre-respond sa chemotherapy ang kanyang cancer, napagdesisyunan niyang ipaputol ang kanyang binti.

Matapos ang amputation, limang buwang sumailalim si Alex sa chemotherapy at natutong maglakad gamit ang kanyang prosthetic leg.

Akala niya, ligtas na siya mula sa kamatayan; ngunit ilang araw lamang matapos ang kanyang high school graduation, napag-alamang mayroon naman siyang stage 4 lung cancer. At sa pagkakataong ito, sinabihan siyang tatlong buwan na lamang siyang mabubuhay dahil 10% ang survival rate ng kanyang karamdaman.

Lumikha si Alex ng isang bucket list, ngunit imbes na gawin ang mga nakalista rito, iniimagine niya lamang ito.

Nang ma-diagnose muli sa cancer sa ikatlong pagkakataon, dito na niya napagtanto na malapit na talaga siyang mamatay.

Inipon niya ang kanyang natitirang lakas at tapang upang gawin na rin sa wakas ang mga bagay na nasa kanyang bucket list.

Sa sobrang saya, hindi niya namalayan ang oras; hanggang umabot na sa puntong isang taon na ang nakalipas matapos siyang sabihan ng mga doktor na may tatlong buwan na lamang siya upang mabuhay.

Sa kasalukuyan, buhay na buhay si Alex at patuloy na nagbibigay-inspirasyon sa mga katulad niyang nakararanas ng malubhang karamdaman.

Napakaikli lang ng ating buhay. Huwag itong sayangin sa takot at panghihinayang.

Hanggang ngayon, usap-usapan pa rin sa social media ang pagpapakasal ng dating child stars na sina Nash Aguas at Mika Dela Cruz.

Tila kasi pang-teleserye ang kanilang love story na nagsimula noong mga bata pa sila.

Sabay na lumaki sa mata ng publiko sina Nash at Mika, bilang bahagi ng weekly gag show na Goin’ Bulilit. Bata pa lamang, makikita na ang kanilang kakaibang chemistry, at ayon mismo kay Nash, 2007 pa lamang ay crush na niya si Mika.

Ayon kay Nash na ngayon ay councilor na ng Cavite City, bata pa lamang ay nagpapapansin na siya kay Mika, ngunit hindi ito umubra sa kanyang crush na madalas siyang tarayan.

Matapos nilang grumaduate sa Goin’ Bulilit, nawalan sila ng komunikasyon.

Ngunit tila may plano talaga ang tadahana para sa dalawa dahil noong August 2017, nagbalik sa buhay ni Nash si Mika.

Ayon kay Nash, parang “magic” na nakasalubong niya si Mika sa isang mall. At dahil nasa tamang edad na sila, hindi na pinalampas ng binata na ligawan ang dalaga.

Makalipas ng isang taong panliligaw, naging magkarelasyon na ang dating child stars.

Aminado pa si Nash na napahagulgol siya sa sobrang tuwa nang matanggap ang 15-page love letter mula sa kanyang girlfriend.

At nitong May 19, kinasal na ang dalawa sa Tagaytay.

Patunay ang kwento ng bagong mag-asawang sina Nash at Mika na sa tamang pagkakataon at panahon, mananaig ang tunay at tapat na pag-ibig.

Noong August 1971, may isinagawang social psychology study sa Stanford University sa Amerika na pinondohan ng U.S. Office of Naval Research.

Dito, 24 physically and mentally healthy college students ang isinailalim sa isang experiment kung saan susukatin ang role-playing, labeling, at social expectations sa behavior ng tao sa isang simulated prison environment.

Dalawang linggo ang napagkasunduang timeframe sa research na ito, ngunit ipinatigil ito matapos lang ng anim na araw dahil sa matinding trauma na naranasan ng mga estudyante.

Hinati ang pagbibigay ng roles sa mga estudyanteng lumahok sa eksperimento. Mayroong mga nagpanggap na prisoners at jail guards.

“Inaresto” ng mga totoong pulis ang mga estudyanteng prisoners at pinagsuot ng bestida na walang pang-ilalim. Nilagyan din sila ng kadena sa paa.

Sinabihan ang mga estudyanteng gwardiya na bawal ang physical abuse, ngunit pangalawang araw pa lang ng experiment, nagpakita na ng rebelyon ang prisoners. Dahil dito, lumikha ang mga gwardiya ng reward and punishment system upang mapangasiwaan ang mga bilanggo nila.

Sa loob lang ng apat na araw, tatlong prisoners ang pinalaya dahil sa trauma.

Sa kasagsagan ng experiment, naging malupit at abusado sa kapangyarihan ang mga estudyanteng gwardiya, habang naging depressed at anxious ang mga nagpanggap na bilanggo.

Dahil sa pag-aaral na ito, naipakitang posibleng maging sadista ang mga ordinaryong tao kung mabibigyan sila ng awtoridad.

Gusto mo bang magpalipas ng gabi sa loob ng higanteng bituka?

Kung oo, para sa’yo ang Hotel Casanus, isang one-room hotel na matatagpuan sa Stekene, Belgium.

Mula ang pangalan ng Hotel Casanus sa pinagsamang Spanish word na casa o bahay at anus.

Maingat na idinisenyo ang naturang hotel. Sa labas pa lang, kapansin-pansin na ang ugat at mala-dugong kulay ng bituka. Mayroon pa itong sphincter at siyempre, hindi mawawala ang anus sa dulo nito.

Kung hindi kaakit-akit ang exterior nito para sayo, huwag mag-alala dahil sa loob, mukha naman itong normal na hotel na mayroong double bed, windows, at heater.

Nagkakahalaga ng €120 o P7,300 ang one-night stay sa Hotel Casanus. Kabilang din sa package na ito ang access sa museum ng Verbeke Foundation Art Park at breakfast for two.

Dahil sa pagiging kakaiba nito, patuloy na dinarayo ang Hotel Casanus na nakapagtatala ng 20,000 visitors kada taon. Patok din itong honeymoon destination para sa mga bagong kasal.

Kung titignan, aakalain mong eksena ito mula sa isang dystopian movie.

Makikita kasi rito ang ilang babae na nakapwesto sa harap ng ring lights at smartphones habang nagsasalita, sumasayaw, o kumakanta upang gumawa ng online content.

Sila ay hinahasa na maging social media stars ng mga kumpanyang tinatawag na “influencer farms”.

Laganap sa Asya, partikular na sa China, Indonesia, at South Korea, ang influencer farms.

Nakatuon ang influencer farms sa pagpapataas ng benta at pagpapanatili ng high-revenue streams sa industriya ng e-commerce.

Sa loob ng walong oras o higit pa, nagli-livestream o nagpro-produce ng content ang wannabe influencers upang mahikayat ang kanilang viewers na mag-add to cart sa kanilang mga ineendorsong produkto.

Kadalasang nag-aalok ng magarbong temporary rooms ang mga kumpanya para sa kanilang influencers upang magmukha itong authentic. Ngunit dahil napakataas ng demand ng ganitong operasyon, partikular na sa China, may mga pagkakataong sa kalsada na lamang sila gumagawa ng content.

Bagamat mukhang mahirap at hindi etikal ang ganitong uri ng trabaho sa influencer farms, malaki naman ang kinikita ng mga empleyado rito na posibleng umabot sa P2.6 million kada buwan, ayon sa ulat.

Ang graduation ang pinakamasayang seremonya na nararanasan hindi lamang ng mga estudyante, kundi ng kanilang proud na pamilya.

Ngunit lungkot ang bumalot sa isang graduation ceremony sa Lapu-Lapu City College dahil hindi nakaakyat sa stage ang cum laude na si Michael “Kikil” Alcoseba, 23-anyos.

Sa halip, ang nanay at lola niya ang tumanggap ng award at diploma, bitbit ang kanyang litrato.

Nagtapos sa kursong Bachelor of Science in Tourism Management si Kikil, ngunit ilang araw lamang bago ang pinakahihintay niyang graduation, sumakabilang-buhay siya dahil sa sakit na pneumonia.

Nang tawagin ang kanyang pangalan sa seremonya, napaluha na lamang ang mga guro, mga estudyante, mga magulang, at maging ang mayor ng Lapu-Lapu City.

Bagamat abala siya sa pagiging working student at dance performer upang suportahan ang sariling pag-aaral, nagawa pa rin ni Kikil na makakuha ng isa sa mga pinakamataas na academic rank.

Ayon sa kapatid niyang si Juliet Hiyas, mahirap para sa kanilang dumalo sa seremonya dahil nagtapos ang mga ka-batch ni Kikil nang wala siya.

Gayunman, pamilya man niya ang pinakamalungkot, sila pa rin aniya ang naging pinaka-proud sa ginanap na graduation.

Viral ngayon ang isang babaeng kinukuhanan ng video ang sarili gamit ang isang selfie stick.

Katulad ng nakasanayan, nakangiti ang babae habang nakatingin sa kanyang camera. Ngunit sa kanyang likuran, makikita ang malakas na alon na papalapit na sa kanya.

Imbes na tumakbo palayo, patuloy ang babae sa pagkuha ng video, hanggang sa tuluyan na siyang natangay nito.

Agad na kumalat ang video sa iba’t ibang social media platforms at websites na kadalasang nagsasabing tsunami ang tumangay sa babae.

Ayon sa pagsusuri ng mga eksperto, hindi tsunami ang tumama sa pinangyarihan ng video, kundi isang tidal bore.

Nangyayari ang tidal bore dahil sa gravitational force ng buwan o araw na nagiging dahilan sa biglang pagtaas ng tubig na tinatawag nating high tide. Kung pumasok ang paparating na high tide sa mababaw o pahilis na ilog o estero, posibleng bumuo ito ng alon na tinatawag na tidal bore.

Ibang-iba ito sa tsunami na dulot naman ng seismic activities, katulad ng lindol o pagsabog ng bulkan.

Gayunman, delikado pa rin ang tidal bore. Sa dami ng mga namatay dahil dito, ilang warning signs na ang itinayo malapit sa mga ilog na kadalasang tinatamaan nito.

Isang halimbawa ang Qiantang River sa China. Sa kabila ng mga nakapalibot na babala, marami pa rin ang namamatay rito kada taon dahil sa pagwawalang-bahala.

Bagamat walang naiulat na nangyaring masama sa babae sa video, maging paalala sana ito na hindi dapat isakripisyo ang kaligtasan para lamang sa ilang minutong kasikatan sa social media dahil wala itong halaga kung kapalit naman nito ang iyong buhay.

Kung ikaw ang tatanungin, ano ang mas gusto mo: pera o love life?

Ang bride na ito mula sa Bukidnon, hindi na kailangang pumili dahil panalo na nga siya sa pag-ibig, jackpot pa siya sa pera!

Niregaluhan kasi siya ng kanyang groom ng tumataginting na P1 million sa kanilang araw ng kasal.

Ayon sa host ng kasal at uploader ng video na si Lester Dave Verano, ipinaalam lang ng groom sa kanyang team ang surpresang ito sa araw mismo ng kasal.

Batay sa kaugalian, ang mga bisita ang nagsasabit ng pera sa bagong kasal, ngunit nais ng groom na magkaroon ng kakaibang twist.

Bigla niyang inilabas ang isang malaking maleta, at nang buksan ito, tumambad sa bride at mga bisita ang napakaraming P1,000 bills!

Inilatag ng groom ang pera at saka isinabit sa kanyang bride.

Ayon kay Verano, talagang nag-ipon ang groom upang makapagbigay ng hindi pangkaraniwang regalo.

Malaki man ang natanggap na halaga ng bride, hindi pa rin nito matutumbasan ang ibinibigay sa kanyang pagmamahal ng kanyang groom.

May dala ka bang tissue o sabon sa iyong bag? O kaya naman extrang plastic bag?

Ang tatlong indibidwal na ito mula sa Amerika, hindi mawawalan ng nasabing items. Ngunit imbes na gamitin gaya ng nakasanayan, ipinambabaon nila ang mga ito bilang pagkain!

Nagsimulang kumain ng toilet paper si Kinah Moore mula sa Baltimore, Maryland noong siya ay 8 years old pa lamang. Para sa kanya, katulad ito ng isang cotton candy na hindi natutunaw.

Nakakakain ng apat na rolyo ng toilet paper si Kinah kada araw at tinatayang P143,000 ang nagagastos niya rito taon-taon.

Mahilig naman sa sabon si Tempestt Henderson mula sa Florida. Mapa-bar o powder man, tiyak na papapakin niya ito!

Pakiramdam niya, mas nagiging malinis siya sa pagkain ng sabon, kumpara sa paggamit lamang nito bilang panghugas. Dahil dito, kumakain siya ng limang bar ng sabon kada linggo.

Samantala, simula 7 years old, addicted na sa pagkain ng plastic bags si Robert ng Oakland, Tennessee. Sa katunayan, sa sobrang pag-crave niya rito, nagnanakaw pa siya ng mga plastic mula sa grocery stores!

Ang ganitong uri ng eating disorder ay tinatawag na pica. Isa itong mental health condition kung saan hindi mapigilan ng isang tao na kumain ng mga bagay na hindi naman pagkain at walang nutritional value.

Seryosong kondisyon ang pica, kaya dapat mabigyan ng propesyunal na tulong at suporta mula sa komunidad ang sinumang nakararanas nito.

Naibenta sa auction ang isang pirasong balahibo ng ibon sa halagang $28,400 o higit sa P1.6 million!

Mula ang itinaguriang “world’s most expensive feather ever sold” sa huia bird, isang ibon sa New Zealand.

Ayon sa Webb’s Auction House, huling namataan ang huia bird noong unang bahagi ng 20th century.

Para sa mga Maori o mga katutubong Polynesian sa New Zealand, simbolo ng impluwensiya sa tribo ang balahibo ng huia birds. Ginamit nila ito bilang ceremonial headdresses at palamuti sa katawan. Naging pang-barter din ito o pamalit para sa mga mahahalagang gamit.

Naging sikat naman ang ibon sa European Kiwis dahil ginawa nila ang mga ito bilang palamuti sa mga bahay sa pamamagitan ng taxidermy.

Dahil sa walang-tigil na pangangaso sa huia birds, tuluyan na silang na-extinct noong 1907.

Bago ito mangyari, tinangka pa ng scientists na dalhin ang mga natitirang ibon sa isla upang mailigtas, ngunit hinuli pa rin ang mga ito at ipinagbebenta.

At ngayong wala na ang huia birds, ang balahibo na lamang nila ang nagpapaalala sa naging mahalagang bahagi nila sa kasaysayan ng New Zealand.

Nagpapakita ang kwentong ito sa pinsalang maaaring idulot ng hindi kontroladong pangangaso at komersyalisasyon sa mga hayop para lamang sa pera. Namamatay na ang mga hayop, nabubura pa nito ang ating kultura at kasaysayan.

Sa pamamagitan ng pag-iingat sa kalikasan at paggalang sa buhay ng lahat ng nilalang, maiiwasan na ang ganitong pangyayari sa hinaharap.