FEATURES

Paano mo sine-celebrate ang birthday mo?

Ang isang lolang ito mula sa Suffolk, England, ipinagdiwang ang kanyang 102nd birthday sa kakaibang paraan—sa pamamagitan ng skydiving!

Bilang isang dating World War II cadet sa Women’s Royal Naval Service, hindi na bago kay Manette Baillie ang panganib.

Sa katunayan, noong 100th birthday niya, sumali siya sa isang race sa British Grand Prix, sakay ng isang Ferrari na may bilis na 130 miles per hour!

Napagdesisyunan ni Baillie na mag-skydiving matapos malaman na ginawa ito ng 85-year-old na tatay ng kanyang kaibigan. Naisip niya, kung kinaya iyon ng lalaki, kakayanin rin niya ito.

Kaya sa kanyang 102nd birthday, nagtipon ang kanyang pamilya at mga kaibigan sa Beccles Airfield upang panoorin ang lola, kasama ang ilang skydivers, na tumalon mula sa eroplano sa taas na 7,000 feet.

Ginawa ring pagkakataon ni Baillie ang kanyang kakaibang birthday celebration upang makakalap ng pondo para sa ilang charities. Naging matagumpay naman ito dahil nakalikom na siya ng mahigit $13,000 o P730,000, nasungkit niya pa ang British record na oldest skydiver in history!

Nang tanungin kung ano ang sikreto sa pagkakaroon ng mahabang buhay, ang sagot lamang ni Baillie: laughter at adventure.

Arestado sa follow-up operation ang isang lalaki matapos niyang saksakin ang dalawa niyang kaibigan habang nag-iinuman sa Valenzuela City.

Ayon sa Valenzuela Police, may nakaalitan ang suspek sa pinuntahan nilang birthday party.

Para hindi na lumaki ang gulo, mabilis na iniuwi siya ng dalawa niyang kaibigan.

Nais pang bumalik ng suspek sa kaniyang naka-away hanggang sa mag-init na ang ulo ng suspek at pinagbalingan ang dalawa niyang kaibigan.

Patay sa insidente ang isa niyang kaibigan matapos magtamo ng saksak sa likod at tagiliran.

Habang sugatan naman ang isa pa niyang kaibigan na nagtamo ng saksak sa braso.

Nabatid na may kinahaharap pa itong kaso sa northern samar sa kasong frustrated murder.

Dagdag pa ang mga reklamong homicide at frustrated homicide para sa pagsaksak sa kaniyang mga kaibigan.

“Para sa kanila muna bago ako.”

Ito ang mga binitiwang salita ni Filipina boxer Nesthy Petecio matapos ibigay sa kanyang kapatid ang pabuya na house and lot.

Sa isang roundtable media conference na ginanap sa Taguig kamakailan, ibinunyag ni Petecio na napunta sa kanyang mga kapatid ang lahat ng house and lot na natanggap niya mula sa pagkapanalo ng silver medal noong 2020 Tokyo Olympics.

Para kay Petecio, mahalaga ang kapakanan ng kanyang pamilya, lalo na ng kanyang ina at kapatid na may Down Syndrome. Dahil dito, bukas-loob niyang ibinahagi sa kanila ang mga premyong nakuha niya mula sa boxing, kabilang na ang mula sa katatapos lamang na 2024 Paris Olympics kung saan niya nasungkit ang bronze medal.

Ayon sa Filipina boxer, para sa kanyang pamilya ang lahat ng mga natatanggap niyang pabuya at hindi niya umano ito ipagdadamot sa kanila.

Gayunman, plano niyang i-invest sa lupa at negosyo ang natanggap niyang incentives upang maging maginhawa ang kanyang pagreretiro sa pagiging atleta.

Pangarap lamang ni Petecio ang magkaroon ng simpleng buhay sa probinsya kasama ang kanyang pamilya, at ayaw niyang malayo sila sa isa’t isa. Sabi nga niya, “Simple lang ang reward ko—maging kumpleto kami.”

Naniniwala ka bang may darating sa iyong pera kung nangangati ang iyong palad?

Nagbunga ang paniniwala ng isang babae mula sa Maryland, USA sa pamahiing ito dahil nang magsimulang mangati ang kanyang palad, agad siyang tumaya sa lotto at nanalo ng mahigit P2.8 million!

Kwento ng babae sa mga opisyal ng Maryland Lottery, wala siyang intensyon na bumili ng tickets noong araw na iyon, sa kabila ng madalas niyang paglalaro nito.

Ngunit biglang nagbago ang kanyang plano nang maramdaman ang pangangati ng kanyang palad.

Bumili siya ng Lots of Cash scratch-off ticket sa Baltimore Service Center sa halagang $5. Laking gulat niya nang tumambad sa harapan niya ang cash prize na $50,000.

Noong una, hindi makapaniwala ang babae sa nakita, kaya pina-double check niya pa ito sa cashier ng lotto outlet. Kinumpirma naman ng cashier ang kanyang napanalunan.

Minsan, dumarating ang swerte sa mga pagkakataong hindi natin inaasahan. Kaya kung nararamdaman mong swerte ka, subukan mo na. Baka magdala pa ito sa iyo ng hindi inaasahang biyaya.

Ilang taon nang kasal ang Taiwanese na si Fan at ang kanyang asawa. Noong 2022, nagsimulang maghinala si Fan na may ibang karelasyon ang kanyang asawa.

Ngunit nang mahuling nagtataksil ang kanyang asawa, si Fan pa mismo ang inaresto ng mga pulis!

Dahil sa paghihinala, naglagay ng cameras sa iba’t ibang bahagi ng kanilang bahay si Fan.

Makalipas ang dalawang linggo, nakumpirma ang kinatatakutan ng lalaki nang makuhanan ng video ang kanyang asawa at kalaguyo nito sa kanilang bahay.

Ginamit ni Fan ang video na ito bilang grounds o batayan sa pagfi-file ng divorce. Sinampahan rin niya ang babae ng civil lawsuit.

Lingid sa kanyang kaalaman, nagtungo na sa mga pulis ang babae upang akusahan siya ng invasion of privacy dahil sa paglalagay ng mga camera sa kanilang bahay nang walang pahintulot.

Bagamat sinabi ni Fan na naglagay lamang siya ng mga camera dahil sa pag-aalala sa kanyang dalawang anak, hinatulan pa rin siya ng Taoyuan Court ng tatlong buwang pagkakakulong.

Bagamat nais lamang ni Fan na alamin ang katotohanan, nauwi ito sa mas kumplikadong problema na humantong pa sa kaparusahan. Patunay lamang ito na kailangang pag-isipan nang mabuti ang bawat aksyon, kahit sa tingin natin ay tama ito.

Mayroon ka bang alagang pusa?

Kung oo, maaaring makatulong sa iyo ang isang app na posibleng ma-detect kung may nararamdamang sakit ang iyong pusa sa pamamagitan ng artificial intelligence (AI).

Ito ang CatsMe! app.

Ang CatsMe! app ay dinevelop ng Japanese tech startup na Carelogy at ng researchers mula sa Nihon University. Gumamit sila ng 6,000 larawan upang makilala ng kanilang AI ang facial expressions ng mga pusa, kabilang na ang mga may sakit.

Dahil dito, mayroong 95% detection accuracy ang nasabing app.

Mula nang ilunsad ang CatsMe! app noong 2023, higit sa 230,000 furparents na ang nakagamit nito. Karamihan sa kanila, kaagad na idinadala sa beterinaryo ang kanilang mga alaga kapag makumpirmang may nararamdaman itong sakit.

Patunay ang app na ito na malaki ang pakinabang ng teknolohiya sa pagpapabuti ng kalusugan ng ating mga alagang hayop. Sa pamamagitan ng CatsMe! app, mas maagang matutukoy ang kanilang sakit na siyang magbibigay-daan upang sa mas humaba pa ang buhay ni Muning.

Hindi makapaniwala ang isang babae sa nalaman niya tungkol sa kanyang karelasyon nang mahigit apat na taon.

Alam ng babae na “mama’s boy” ang kanyang 24-anyos na boyfriend. Ngunit labis ang kanyang pagkagulat nang makitang pinapa-breastfeed pa ito ng kanyang ina!

Ayon sa kwento ng babae sa isang programa sa radyo, ipinagdiwang nila ang engagement nila ng kanyang boyfriend—na ngayon ay fiancé na—sa bahay nito.

Matapos kumain, nagpunta saglit ang babae sa banyo upang ayusin ang sarili, subalit paglabas niya ay hindi na niya nakita ang kanyang kasintahan.

Hinanap niya ang lalaki, hanggang sa matagpuan niya ito sa guest room kasama ang kanyang ina. Ngunit hindi niya kinaya ang eksenang tumambad sa harapan niya dahil nakita niya ang fiancé niya na nakahiga sa hita ng nanay nito habang sumususo!

Nagulat din ang mag-ina nang mahuli sila sa akto.

Paliwanag ng lalaki, normal lamang daw iyon sa kanilang mag-ina. Ginagawa umano nila ito upang kumalma siya.

Bukod pa rito, ibinahagi ng babae na magkatabi pa rin matulog sa kama ang mag-ina, at madalas nila itong pinagtatalunan ng kanyang boyfriend. Minsan daw ay sinusungitan din siya ng ina ng lalaki.

Simula nang mahuli ang mag-ina, tatlong buwan nang hindi nag-uusap ang magkasintahan.

Sa ngayon, hindi pa alam ng babae kung itutuloy niya ang pakikipagrelasyon sa lalaki na malapit na sana niyang pakasalan.

Sa psychoanalytic theory, tumutukoy ang Oedipus complex sa pagnanais ng isang anak na magkaroon ng sekswal na ugnayan sa kanyang magulang, partikular na ang isang lalaki sa kanyang ina. Nauuwi ito sa rivalry sa pagitan ng anak na lalaki at ng kanyang ama.

Payo naman ng ilang netizen sa babae, hiwalayan na ang kanyang fiancé dahil hindi normal ang “kahalayang” ginagawa nila ng kanyang ina.

Mahilig ka ba sa kape?

Kung oo, susubukan mo bang uminom ng kape na may halong dahon ng sibuyas?

Maraming netizen ang nagka-interes na subukan ang spring onion latte na ayon sa ilang ulat ay nagmula sa China.

May ilang coffee shops na nagbebenta ngayon ng spring onion latte, ngunit kahit ikaw ay maaaring gumawa nito sa iyong bahay.

Una, kailangan munang dikdikin ang mga dahon ng sibuyas sa isang baso. Saka ito lalagyan ng yelo, gatas, kape, at toppings na spring onion.

Ayon sa ilang netizen na nakainom na ng kapeng ito, hindi ito masarap. Anila, hindi bagay ang malutong at slippery texture ng spring onion sa kape. Matapang din ang lasa at mabaho umano ang amoy ng kape nang haluan ng dahon ng sibuyas.

Bahagi ang spring onion latte sa dark cuisine ng China. Tumutukoy ito sa culinary style na nilikha batay sa mga kombinasyon ng mga pagkaing kakaiba o minsan pa ay nakakadiri, ngunit mas masarap pala kaysa sa inaasahan.

May ilang netizen na nagsabing hindi nila kailanman susubukan ang kape na may dahon ng sibuyas, habang ang iba naman ay nag-aalinlangang uminom nito dahil ayaw nilang magkaroon ng bad breath.