FEATURES

Inihayag ng Department of Social Welfare and Development (DSWD) Region 3 na nagsimula silang maging partner ng SM Foundation Incorporated para sa Kabalikat sa Kabuhayan (KSK) on Sustainable Agriculture program noong 2012.

Sa panayam ng DWIZ, sinabi ni DSWD Region 3, Private and Government Sector Officer for Sustainable Livehood program, Mr. Ferdinand Jorge Canlas na malaki ang naitulong ng nasabing programa sa mga benepisyaryo nito sa Region 3.

Actually po, napakalaking tulong po ng SM Foundation sa mga beneficiaries, lalong-lalo na po ‘yung mga 4Ps beneficiaries natin, at kahit hindi 4Ps, basta poorest of the poor, may interest sa farming, qualified po sila. So, napakalaking bagay po ang partnership ng SM Foundation kay DSWD.

Sinabi naman ni Casuga Integrated Farm School President Ms. Cherrylin Casuga na isa silang TESDA accredited school kung saan layon nilang i-promote ang agricultural training, person development, at food security sa pamamagitan na rin ng partnership sa SM foundation.

 So, ‘yung partnership namin nagsimula noon at first po namin is 100 farmer beneficiaries po kaagad. Ito po ay first time namin ginawa at sa awa po ng Diyos and of course sa guidance ng SM Foundation and also ng mga kasama namin sa programa ang mga government agencies, ito ay nabigyan ng value kasi dito nagkaroon kami ng platform na gawin namin ang aming mission na i-incorporate ‘yung technology, ‘yung entrepreneurship sa agriculture and then ‘yung aming NC II.

Samantala, sinabi naman ni Department of Trade and Industry-Tarlac, Business Development Division chief Ms. Zaida Garibay na nagkaroon sila ng mga aktibidad kaugnay sa KSK program ng SMFI kung saan naging pagkakataon ito para maging entrepreneur ang kanilang mga magsasaka sa naturang lugar.

Doon po sa Victoria, Tarlac po kami nagkaroon ng mga activities. At maganda po na naging partner po namin sila, mga farmers po ‘yung kanilang mga ina-assist. Para po sa amin, pagkakataon po namin ito na gawin namang entrepreneur ‘yung mga farmers po na ‘yon. alam niyo naman po na ang DTI, ang mandato niya is on enterprise development, dahil alam po natin na talagang kapag itong sektor ng mga tinatawag na micro, small, and medium enterprises ay mapapalakas po natin ay mas gaganda po ang ating…so, sinasamantala po namin po ‘yung mga ganitong partnership po, para ‘yun pong mga farmer na ina-assist ng SM Foundation ay magiging potential entrepreneurs na rin po ito.

Ang pahayag nina DSWD Region 3, Private and Government Sector Officer for Sustainable Livehood program, Mr. Ferdinand Jorge Canlas, Casuga integrated farm school president Ms. Cherrylin Casuga at Department of Trade and Industry-Tarlac, business development division chief Ms. Zaida Garibay, sa panayam ng DWIZ

Layunin ng Kabalikat sa Kabuhayan on Sustainable Agriculture program na mai-angat ang antas ng pamumuhay ng mga magsasaka.

Sa panayam ng DWIZ, sinabi ni SM Foundation Incorporated, Outreach Program Assistant Vice President Ms. Cristie Angeles na gumawa sila ng programa para umpisahan ang tinatawag na “field school” noong 2007.

Noong 2007 kasi wala pang field school masyado, ‘yung bang literal na under the mango tree. Kasi kailangan po namin silang tulungan i-angat ‘yung  technology by introducing the high-value crops. Kasi ‘yung mga panahon na ‘yon nag-uumpisa nang lumiit ang mga lupa ng mga lehitimong magsasaka. Kasi ho diba, nahahati na nang nahahati ang mga lupain nila dahil ‘yung minana nilang lupa noon, mana-mana na po, paliit na nang paliit. So, to help also, tinignan po namin na ‘yung programang ito kung papaano pa siya mas every year mas mai-innovate para mas makapag-produce ng mas maraming gulay, mas kumita ang mga farmer sa mas kokonting halaga. Technology transfer po.

Sinabi naman ni SMFI Outreach Program Project Supervisor Ms. Shiem Bahoy na nakikipag-ugnayan sila sa kanilang partner agency para sa pagpili ng mga magiging karapat-dapat na benepisyaryo.

We really coordinate with our partners. Nagkakaroon tayo ng meetings with our partner agencies and kami naman po sa SM foundation, we really talk with our partners para makuha natin ‘yung mga tamang farmer na makakapag-join po sa atin. And sinisigurado po natin na lahat ng goals na dapat ma-achieve natin for our program is makuha natin, like si SM Foundation nakikipag-meeting with the partners like DSWD, DTI, TESDA, DA.

Ang magkasunod na pahayag nina SM Foundation Incorporated, Outreach program Assistant Vice President Ms. Cristie Angeles at   project supervisor Ms. Shiem Bahoy, sa panayam ng DWIZ

Inihayag SM Foundation Incorporated na layunin ng Kabalikat Sa Kabuhayan (KSK) program na ma-iangat ang buhay ng mga Pilipino sa mahihirap na komunidad sa pamamagitan ng pagpapabuti ng mga produktong pang-agrikultura, makabagong teknolohiya, at farm-market linkage.

Bago pa man maging global concern ang food security, kinilala na ni SM Founder Henry Sy Sr. Ang mga magsasaka bilang nanatiling most underserved sector ng lipunan.

Dahil dito, inilunsad ng SM Foundation ang Farmer’s Training Program bilang bahagi ng KSK kung saan nasa 28, 500 magsasaka ang nakinabang mula sa 900 na lungsod o bayan sa buong bansa.

Layon ng nasabing programa na makapagbahagi ng kaalaman sa mga maliliit na magsasaka upang matulungang maging self-sufficient at mapataas ang kanilang produksyon sa agrikultura.

Sa katunayan, ilan sa mga nasabing magsasaka ay seasonal supplier ng SM, habang karamihan sa mga ito ay benepisyaryo ng programa na kumikita na sa pamamagitan ng pagbebenta sa mga pamilihan.

Samantala, naglunsad ang SM Foundation ng KSK Farmer’s Market Day, na layong magbigay sa mga KSK Farmer ng libreng venue at assistance sa sm malls na kung saan maaari nilang ibenta ang kanilang mga produkto.

Sa ngayon, mahigit apatnapung SM Malls na ang may KSK Farmer’s Market Day.

Ang naturang inisyatiba ay sa pakikipagtulungan ng sm foundation sa Department of Social Welfare and Development (DSWD), Department of Trade and Industry (DTI), TESDA, City Agriculture Office, at SM Supermalls.

Maaari namang suportahan ang mga lokal na magsasaka sa pamamagitan ng SM Foundation sa Facebook, Twitter, Instagram at Youtube para malaman ang mga schedule ng KSK Farmer’s Market Day sa mga SM Mall.

Para sa mga Kare-Kare lovers diyan!

Napasama sa best-rated stews ng taste atlas ang pinagmamalaking Kare-Kare ng Pilipinas.

Umakyat ito sa ika-52 pwesto mula sa ika-53, sa 100 best-rated stews sa buong mundo.

Ang Kare-Kare ay may sangkap na peanut butter, karne, gulay na inihahain na may kasamang bagoong.

Ilan pa sa mga putaheng napabilang sa Taste Atlas ay ang Kare mula sa Japan, Keema ng India, Phanaeng, Curry ng Thailand, Ghormeh Sabzi ng Iran, at Hünkar Begendi ng Istanbul.

Nabunyag na patuloy na nakararanas ng involuntary hunger o gutom ang milyon-milyong Pilipino.

Ito ang lumabas sa survey ng Social Weather Stations (SWS) mula Enero hanggang Marso ng 2022 kung saan nasa 15.5 milyon ang nagsabing nakaranas sila ng involuntary hunger.

Sinasabing mas malala ito noong kasagsagan ng pandemya, kung saan maraming nawalan ng trabaho at nahirapan maghanap kung saan sila kukuha ng makakain.

Ngunit gamit ang iyong Globe Rewards points at GCash, maaari kang makatulong na masolusyunan ang suliraning ito.

Sa bawat pagbili ng load o pagbayad ng buwanang subscription, may katumbas itong Rewards points na maaaring i-donate sa Hapag Movement.

Sa pamamagitan ng teknolohiya, layon ng telco na makatulong sa pamamagitan ng Hapag Movement, isang inisyatibong pinag-uugnay ang iba’t ibang organisasyon na nakatuon sa pagbibigay-lunas sa gutom at pagbibigay ng kabuhayan sa mga mahihirap na pamilya.

“Hinihikayat namin ang lahat na makibahagi sa programang ito. Kahit maliit na halaga ay malaking bagay na at malayo ang mararating para sa laban natin kontra gutom,” ayon kay Yoly Crisanto, Chief Sustainability at Corporate Communications Officer ng Globe.

Para sa mga donasyon, i-download lamang ang bagong GlobeOne App at maaaring i-donate ang iyong Globe Rewards points.

Kahit na piso ay pwedeng i-donate.

Para malaman ang iba pang sustainability initiatives ng telco, bisitahin ang kanilang website.

Nakaramdam ng water service interruption ang ilang lugar sa National Capital Region simula alas-5:00 ng hapon hanggang alas-11:00 ng gabi kahapon.

Ayon sa anunsyo ng Maynilad Water Services Inc., naging sanhi ng pagkawala ng tubig ang power interruption sa La Mesa pumping station.

Apektado rito ang 18 barangay sa Quezon City, Caloocan, at Valenzuela.

Sa Quezon City apektado ang mga lugar ng Gulod, nagkaisang Nayon at Sta. Monica.

Sa Valenzuela, apektado naman ang mga barangay ng baybayin, Bignay, East Canumay, Gen. T. De Leon, Lawang Bato, Linguhan, Mapulang Lupa, Maysan, Parada, Paso De Blas, Punturin, Ugong, at West Canumay.

Habang apektado naman ang mga barangay 165,166 at 167 sa Caloocan.

Itatampok sa isang museo sa Davao City ang prineserbang buto ng pinakamalaking sperm whale na natagpuan sa Pilipinas.

Mayo nitong taon nang mapadpad sa Davao Occidental ang dambuhalang balyena.

Tinatayang may sukat ito na 60 talampakan at ang pinakamalaking balyena na narekober sa bansa.

Ayon sa necropsy, namatay dahil sa katandaan ang balyena.

Nakatakda itong i-display sa The Bone Collector Museum kasama ang 6,000 specimens na buto o taxiderm ng iba’t ibang hayop.–-sa panulat ni Hannah Oledan

Patuloy na iniimbestigahan ng Negros Occidental Police Provincial Office (NOCPPO)  ang kasong pagpatay sa dalawang barangay chairmen sa lalawigan.

Unang pinaslang ng dalawang hindi pa nakikilalang salarin si Danilo Dautil, kapitan ng Barangay Cabcab sa bayan ng Isabela.

Ayon kay Major Joseph Partidas, hepe ng Isabela Municipal Police Station, pinaniniwalaang mga miyembro ng Communist Party of the Philippines-New People’s Army o CPP-NPA ang nasa likod ng pagpatay kay Dautil.

Ang tserman naman ng Barangay Lalong na si Benjamin Javoc ay nasawi matapos lusubin ng tinatayang sampung armadong lalaki ang kanyang bahay.

Samantala, inatasan na ni Police Regional Office-Western Visayas Director Brig. Gen. Leo Francisco si Negros Occidental PNP Director Col. Leo Pamittan na imbestigahang mabuti ang mga naturang kaso.

Mawawalan ng suplay ng kuryente ang ilang lugar sa lungsod ng Mandaluyong bukas, Agosto 28.

Ayon sa Lokal na Pamahalaan ng Mandaluyong, ito ay kasunod ng isasagawang line construction ng Meralco sa mga kalye ng Samat at Calbayog sa Barangay Highway Hills.

Kabilang sa mawawalan ng suplay ng kuryente ang mga sumusunod na kalye:

• Domingo
• Guevarra
• Sultan
• Sierra Madre
• Malinao
• Kanlaon at
• Mariveles

Maaapektuhan din ng brownout ang kalye ng Lopez Rizal at Dr. Jose Fernandez sa pagitan ng 9:30 hanggang 10  ng umaga at muling mawawalan ng suplay  ng kuryente sa ganap na 3 hanggang 3:30 ng hapon bukas.

Sinibak sa pwesto ang 17 pang miyembro ng Quezon City Police District o QCPD dahil sa kapabayaan sa nangyaring hit-and-run incident sa Anonas St., cor. Pajo St., Brgy. Quirino 2A, Quezon City noong Agosto 6 na ikinasawi ng isang tricycle driver.

Ayon kay QCPD Director Police Brigadier General Nicolas Torre III, nang maupo siya sa pwesto ay agad siyang bumuo ng special investigation task group o “SITG Abong” upang tutukan ang pagkakabundol ng sasakyan ni  PLTCOL Mark Abong sa traysikel ng biktimang si Joel Laroa.

Makaraan ang imbestigasyon, tatlong pulis mula sa Talipapa Police Station (PS 3),  6 sa Anonas Police Station (PS 9) at 8 mula sa District Traffic Enforcement Unit (DTEU) ang ni-relieve at inilipat sa District Personnel Holding and Accounting  Section (DPHAS) epektibo noong Agosto 22.

Mananatili aniya sa DPHAS sa Camp Karingal ang mga ito habang nagpapatuloy ang imbestigasyon sa kaso.

Una nang sinibak ang imbestigador sa kaso na si Police Sr. Master Sgt. Jose Soriano at maging sina PLTCOL Alexander Barredo at PCPL Joan Vicente na parehong sakay ng QC mobile at nasa tabi lang ng sasakyan ni Abong nang mangyari ang insidente.

Matatandaang iginiit ni Mayor Joy Belmonte na nangako sila ng ligtas at payapang komunidad kaya’t walang puwang sa lungsod ang mga palpak at pabayang pulis.