FEATURES

Nagsimula nang humupa ang baha sa Barangay Hulong Duhat, Malabon City.

Ito ay matapos ang ilang linggong pagbaha dahil sa pag-apaw ng tubig sa ilang kabahayan at bakuran.

Dahil sa nangyari, nagsimula nang maglinis sa kani-kanilang bakuran ang mga residente.

Sa ngayon, may ilang kalsada na lang ang may baha pero hindi na ito tataas pa sa gutter.

Idineklara nang special non-working holiday ngayong araw sa Pasig City.

Ayon sa Pasig City LGU, pinagtibay ng malakanyang ang direktiba bilang pakikiisa sa 449 na kaarawan ng Pasig.

Dahil dito, walang pasok sa lahat ng antas ng paaralan gayundin sa trabaho.

Pero kung papasok sa trabaho, makatatanggap sila ng karagdagang 30% sa kanilang arawang sweldo.

Iiral din ang ‘No Work No Pay’ Policy para naman sa mga manggagawang hindi papasok sa nabanggit na araw.

Tumaas nang bahagya ang bilang ng mga kaso ng COVID-19 sa Pateros.

Ayon kay Pateros Mayor Miguel “Ike” Ponce III, nag zero COVID-19 cases sila nuong mga nakalipas na araw subalit mayruong naitalang siyam na kaso ang lungsod sa kasalukuyan na pawang asymptomatic.

Ipinabatid ni ponce na dalawa sa mga COVID-19 patients ay nasa isolation facility na dahil sa takot na makahawa sa mga kasambahay samantalang ang pito naman ay naka home quarantine.

Kasabay nito, inihayag ni Ponce na tuluy tuloy ang pagturok nila ng COVID-19 booster doses sa kanilang lungsod.

Dead on the spot ang isang babae matapos mabangga ng van sa Shaw Boulevard, Mandaluyong City.

Kinilala ng Mandaluyong City Police ang biktimang si Emelour Aquino, 21 anyos.

Ayon sa pulisya, naglalakad sa kalsada si Aquino kasama ang dalawang kaibigan nang mahagip ito ng van at tumilapon pa ng ilang metro.

Naaresto ang 21 anyos na driver ng van at na-inquest at mahaharap sa kasong reckless imprudence resulting to homicide.

Pursigido naman ang pamilya Aquino na ituloy ang kaso laban sa suspek.