FEATURES

2023 Regional Tax Campaign kickoff, gaganapin bukas, February 16, 2023 ganap na ala-1:00 ng hapon sa Sm mega Trade Hall 1, 5th level, Mega B, SM Megamall sa Mandaluyong City.

Isasagawa ito ng Bureau of Internal Revenue (BIR), Revenue Region (RR) no. 7B-East NCR na pangungunahan nina Regional Director Albino M. Galanza at Assistant Regional Director Eric P. Diesto.

Ngayong taon, ang kanilang magiging tema ay “Tulong-tulong sa Pagbangon. Kapit Kamay sa Pag-ahon. Buwis na Wasto, Alay para sa Pilipino”.

Humingi naman ng suporta ang revenue region sa mga taxpayer mula sa Mandaluyong, San Juan, Pasig, Marikina, Antipolo, Province of Rizal at Cainta para sa pagbuo ng pondo para sa pagbangon muli ng ekonomiya sa pamamagitan ng pagbabayad nila ng tamang buwis at pagbabayad ng tama sa oras.

Target naman ng BIR na makakolekta ng P2.599 trilyon ngayong taong 2023. Aabot sa 80% ng pondo ng national government ay mula sa Bureau of Internal Revenue (BIR).

Layunin ng kampanya ng Bureau of Internal Revenue na suportahan ang adbokasiya ni Pangulong Ferdinand Marcos Jr. Na pagkaisahin ang bawat Pilipino pagdating sa pagbabayad ng tamang buwis para sa muling pag-ahon ng ating ekonomiya at pagaanin ang buhay ng bawat Pilipino.

Posibleng masipa sa pwesto ang barangay chairman sa Tondo, Maynila makaraang manggulpi ng tauhan ng MMDA nang pumalag sa clearing operation sa Dagupan Street, kahapon.

Ipinagharap ng reklamong “direct assault” si Chairman Rommel Bravo ng Barangay 51, Zone 4.

Ayon sa Manila Police District, mag-aalas-9:00 ng umaga nang magsagawa ng clearing operation ang MMDA nang mamataan ang “car wash” sa tabi ng bangketa.

Sinita ito ng MMDA nang biglang sumulpot si Bravo kung saan binigwasan nito ang isang MMDA Metro Aide 1 kaya nagkaroon ng komosyon.

Inihayag naman ni MMDA Traffic Czar Bong Nebrija na nasa tabi ng barangay hall ang car wash na sinasabing pag-aari ng punong barangay.

Noong isang linggo pa anya sila nag-abiso na magkakaroon ng clearing operation sa dagupan kung saan ilang beses na rin isinagawa ang naturang operasyon sa lugar.

Nalalapit na ang pagdiriwang ng Chinese New Year 2023. Pero alam niyo ba na maraming paniniwala o tradisyon ang mga Chinoy pagdating sa pagdiriwang ng kanilang Bagong Taon?

Isa na nga riyan ang:

BAWAL MAGWALIS
Naging tradisyon na ng mga Chinese ang hindi pagwawalis sa araw na ito dahil senyales daw ito ng pagtaboy ng swerte o kasaganaan. Iniiwasan din nila ang pagtatapon ng basura sa labas dahil sa paniniwala nila na malas ito at maari nilang maitaboy ang swerte sa loob ng kanilang bahay.

BAWAL BAD WORDS
Iniiwasan din ng mga Chinoy ang pagsasalita ng masama tuwing Lunar New Year period. Isa sa mga masasamang salita na iniiwasan nila ay ‘yung mga tungkol sa kamatayan, sakit, kahirapan, multo at iba pa.

BAWAL MALIGO
Ang pagligo o pagbasa ng buhok sa araw ng Chinese New Year ay ipinagbabawal din. Sa salitang Mandarin, ang (发, fa) o hair ay kaparehas ng pagbigkas ng facai (发财) na nangangahulugang ‘to become wealthy’. At dahil du’n paniniwala nila na hindi mabuting hugasan ang buhok sa araw ng Chinese New Year parang wina-wash out daw ang swerte. —mula sa panulat ni Angelo Baino

Pinalawak pa ng  e-wallet giant na GCash at PayMaya ang kanilang payment scheme sa mga palengke sa Central Visayas.

Bilang parte ito ng kanilang pagsisikap na isulong ang cashless na transaksyon sa bansa.

Ilan sa mga lugar na sakop na ng cashless transactions ay ang Tagbilaran sa Bohol.

Sa kasalukuyan, ang GCash ay mayroon nang mahigit 71M user sa buong kapuluan, na nagbibigay sa kanila ng access sa mga serbisyong pinansyal gaya ng pagbabayad, pag-iimpok, pamumuhunan, pautang at insurance.

Arestado ang isang lalaki matapos magpaputok ng baril sa barangay Sta. Monica sa Novaliches, Quezon City kahapon, araw ng Sabado.

Sa isang video, makikita ang isang lalaki na edad 59 na itinututok sa taas ang baril habang naglalakad sa isang eskinita.

Ayon sa hepe ng Novaliches Station na si Lt. Col. Jerry Castillo, nagwawala ang suspek habang winawasiwas ang hawak na baril. Nakumpiska sa suspek ang baril, tatlong piraso ng live ammunition at isang fired cartridge case.

Dagdag pa ni Castillo, walang serial number ang baril kung kaya’t itinuturing ito na loose firearm.

Aminado ang suspek na lasing siya ngunit pinabulaan ang paglalabas at pagpapaputok ng baril.

Samantala, wala naman nasaktan sa insidente habang mahaharap ang suspek sa reklamong alarm and scandal at illegal possession of firearms and ammunition. —mula sa panulat ni Maize Aliño-Dayundayon

Tinapos ng social media ang pagtatago ng isang wanted person sa Maynila.

Kasunod na rin ito nang pagkakatimbog ng mga pulis Maynila sa Pulilan, Bulacan kay alias Rence, miyembro ng isang gun for hire.

Ayon sa mga otoridad, ang suspek ay nagpanggap pang napatay sa isang engkuwentro sa Tondo, Maynila nuong 2019 subalit nagtago lamang pala sa iba’t ibang bahagi ng bansa.

Natunton ng PNP ang kinaroroonan ng suspek dahil sa mga post nito sa social media.

Ang suspek ay nahaharap sa mga kasong murder at attempted murder.

Nadakip ng pinagsanib na pwersa ng Quezon City Police District (QCPD) at Rizal Provincial Police Office ang leader umano ng ‘Dioquino Carnapping Group’.

Kinilala ng QCPD ang suspek na si John Martin Dioquino, residente ng Barangay Parang.

Narekober kay Dioquino ang dalawang carnap na motorsiklo nang masakote sa Del Pilar Street.

Ayon kay QCPD Director, Brig. Gen. Nicolas Torre the third, nasa listahan ng district level most wanted person ang suspek na nag-o-operate sa Quezon City, Marikina City at lalawigan ng Rizal.

Nahaharap naman si Dioquino sa kasong paglabag sa RA 10883 o New Anti-Carnapping Law. —sa panulat ni Hannah Oledan

Kalaboso ang dalawang drug suspect sa magkahiwalay na buy-bust operations sa Taguig City.

Kinilala ang dalawang naaresto na sina Abraham Datukali at Jelie Omarhabang nasamsam mula sa kanila ang mahigit P700,000 na halaga ng iligal na droga.

Nasakote ng station drug enforcement unit ng Taguig City Police si Datukali sa Maguindanao Street, Barangay New Lower Bicutan at nahulihan ng 90 grams ng shabu na nagkakahalaga ng P612,000 at digital weighing scale.

Natimbog naman si Omar sa Oplan Galugad na isinagawa sa Barangay North Daang Hari at narekober mula sa kanya ang 14.8 grams ng shabu na nagkakahalaga ng P100,000.

Nahaharap sa kasong paglabag sa Republic Act 9165 o Comprehensive Dange­rous Drugs Act of 2002 ang dalawang suspek. —sa panulat ni Hannah Oledan

Umabot sa mahigit 70 pamilya ang nakatanggap ng tulong pinansiyal mula sa lokal na pamahalaan ng Quezon City matapos maitala ang sunog sa dalawang barangay ng lungsod.

Pinangunahan ni QC Mayor Joy Belmonte ang pamamahagi ng ayuda katuwang ang mga tauhan ng Social Services Development Department sa mga residente ng Brgy. Manresa at Brgy. Paltok.

Ayon sa QC LGUs,   nasa P10,000 ang natanggap na tulong ng mga home owners habang P5,000 naman sa mga renter or sharers.

Matatandaang umabot sa ikalawang alarma ang sunog na tumagal ng halos dalawang oras bago idineklarang fire under control ng mga tauhan ng Bureau of Fire Protection (BFP).

Tiniyak ng Philippine Health Insurance Corporation (PHILHEALTH) na mananatili sa 4% ang kanilang premium rate na may income­ceiling na P80,000 ngayong taon.

Ito’y bilang pagtalima sa direktiba ni Pangulong Ferdinand Marcos Jr., na suspendihin ang premium rate increase na itataas sana sa 4.5% mula sa kasalukuyang 4% gayundin ang pagtaas ng income ceiling mula P80,000 hanggang P90,000.

Ayon kay Acting PHILHEALTH CEO Emmanuel Ledesma Jr., maglalabas sila ng hiwalay na advisory na nagsasaad ng mga gabay sa pagpapatupad ng naturang direktiba, partikular na para sa direct contributors.

Tiniyak naman ni Ledesma na magpapatuloy ang bagong benefit packages, na dapat sana ay huhugutin mula sa premium increase.

Kabilang na rito ang Outpatient Therapeutic Care para sa Severe Acute Malnutrition, Outpatient Package para sa Mental Health at Comprehensive Outpatient Benefit.