15 indibidwal, kabilang ang limang buwang sanggol, ang sugatan matapos bumangga sa truck ng basura ang sinakyan nilang jeep sa Commonwealth Avenue, Quezon City, kahapon.
Ayon sa MMDA, pumalya umano ang preno ng driver habang binabagtas ang EDSA-San Juan.
Naisugod naman sa East Avenue Medical Center ang mga biktima.
Sinisilip na sa CCTV footage kung sino sa jeepney driver at truck driver ang may kasalanan at posibleng maharap sa patong-patong na kaso. —mula sa panulat ni Jenn Patrolla
Tatlong indibidwal ang nasaktan matapos sumabog ang tangke ng LPG sa residential area sa Kalawaan, Pasig City.
Agad namang isinugod sa Pasig City General Hospital ang tatlo para gamutin.
Batay sa ulat ng Pasig BFP, nangyari ang insidente dakong alas-11:00 ng umaga nang bigla na lamang sumabog ang LPG sa isang bahay sa nasabing lugar.
Agad namang nakaresponde ang BFP sa insidente at naagapan ang sitwasyon.
Patuloy naman ang isinasagawang imbestigasyon sa pinagmulan ng pagsabog.
Mas pinalakas ng LandBank ang suporta nito sa fisheries sector matapos pumalo sa halos P3B ang inilabas nitong loan hanggang nitong buwan ng Nobyembre.
Sa idinaos na LandBank Agrisenso Virtual Forum na dinaluhan ng 115 fishers at iba pang stakeholders sa buong bansa, inanunsyo ng LanBank ang mga ikinakasa nilang lending program na magpapalakas sa kontribusyon ng fisheries sector para maabot ang food self-sufficiency sa bansa.
Kabilang sa mga lending programs na ito ang Sustainable Aquaculture Lending Program (SALP) pagsasakang pantubig para magbigay ng credit assistance sa fishers associations, cooperatives o federations, non-government organizations, micro, small and medium enterprises, large agribusiness enterprises at countryside financial institutions.
Nagbibigay din ang landbank ng pautang sa ilalim ng commercial fishing vessel financing program bilang ayuda sa mga commercial fishing operators para makabili ng bangka pang domestic o overseas use.
Itinaas sa ikalawang alarma ang nasunog na isang warehouse ng mga furniture sa barangay Commonwealth, Quezon City nitong pagpasok ng Bagong Taon.
Batay sa ulat ng Bureau of Fire Protection naideklarang fire out ang sunog bandang alas-3 ng madaling araw kanina at wala naman anilang nasaktan.
Habang sa ngayon ay iniimbestigahan pa ng awtoridad ang pinagmulan ng naturang sunog, at kung magkano ang kabuuang pinsala nito.
Naglabas na ng kautusan si Manila Mayor Honey Lacuna-Pangan sa paggamit ng mga paputok at iba pang uri ng pyrotechnic devices para sa ligtas na pagsalubong sa bagong taon.
Batay sa apat na pahinang Executive Order 58, ang lahat ng uri ng mga paputok at pyrotechnics ay dapat ilaan lamang sa tamang lugar sa bawat komunidad na may kaukulang permiso mula sa Bureau of Permits.
Papayagan lamang ang pagsisindi ng baby rocket, bawang, maliit na trianggulo, el diablo, sinturon ni hudas, kwitis at lahat ng may limitado lamang na pulbura.
Pwede rin ang pyrotechnic devices, gaya ng sparklers, luces, jumbo, regular at special fountain, roman candle, trompillo, whistle device, butterfly at iba pang uri ng “pa-ilaw”.
Mahigpit namang ipinagbabawal ang paggamit, paggawa, pagbebenta at distribusyon ng iba pang uri ng paputok at pyrotechnic devises, tulad ng super lolo, lolo thunder, five star, og, pla-pla;
Pillbox, watusi, piccolo, giant whistle bomb, super bawang, goodbye philippines, goodbye earth, bin laden, coke in can at iba pang magdudulot ng panganib sa buhay at mga ari-arian.
Nasunog ang isang residential area sa bahagi ng Barangay San Dionisio, Paranaque City kaninang alas-3:00 ng madaling araw.
Mabilis na kumalat ang apoy dahil dikit-dikit ang mga bahay sa lugar kung saan, umabot sa ika-5 alarma ang sunog.
Ayon sa mga tauhan ng Bureau of Fire Protection (BFP), nahirapan silang apulahin ang apoy dahil sa masikip na kalsada kung saan, napilitan nang umakyat sa mga nitso sa katabing sementeryo ang mga bumbero.
Patuloy pang inaalam ng mga otoridad ang danyos at kung may mga nasawi o nasugatan matapos ang sunog.
Nagsagawa ng street lighting ang mga opisyal ng lokal na pamahalaan ng Marikina sa pangunguna ni City Mayor Marcelino “Marcy” Teodoro.
Ayon sa Marikina LGUs, kinabitan ng mga led light ang mga poste sa Bayanihan Compound at Mountain Hills Hoa sa Barangay Fortune.
Ito’y para sa mga empleyado’t manggagawang umuuwi ng hating gabi at mga sasakyang dumadaan upang maiwasan ang anumang uri ng krimen o aksidente.
Dahil dito, mas magiging kumbinyente, maayos, ligtas at magiging panatag ang mga Marikenyo.
Inabot na ng hating gabi ang mga pasaherong naghihintay ng kanilang masasakyan sa mga terminal ng bus at jeep sa National Capital Region (NCR).
Sa pag-iikot ng DWIZ sa Marikina City, dumoble ang pila ng mga pasaherong uuwi patungong Pasig City dahil dagsaan pa rin ang mga mamimili ngayong holiday season.
Punuan din ang sakayan ng mga jeep patungong Antipolo, San Mateo, at Montalban, Rizal dahil sa dami ng mga pasaherong uuwi sa kani-kanilang lungsod.
Ayon sa ilang mga pasahero, kanilang sinamantala ang pagkakataong makapamasyal at makapag-diwang ng pasko.
Dagdag pa riyan, pahirapan ding makasakay ang ilang mga mananakay sa EDSA Bus Carousel dahil karamihan umano sa mga driver ay nagpasya na lang tumigil muna sa pamamasada para makasama ang kanilang pamilya at maipagdiwang ang araw ng pasko.
Nasawi ang isang lalaki hinihinalang gun-for-hire matapos makipagpalitan ng putok ng baril sa mga awtoridad matapos hindi tumigil sa checkpoint sa Quezon City habang napatay ng suspek ang TNVS rider na humabol sa kanya.
Sa isang ulat, kinilala ang suspek na si Richmond Mallari Dalisay, nasawi ang suspek sa police operation sa Barangay Baesa. Bago ang insidente, hindi huminto ang suspek sa checkpoint sa barangay bahay toro kaya hinabol ng mga pulis.
Ayon sa director ng Quezon City Police District na si Police Brigadier General Nicolas Torre III, nakasalubong ng suspek ang motoriklo na kanyang inagawan habang hinahabol ng mga pulis.
Isang TNVS rider ang tumulong na habulin ang suspek subalit tinamaan ng bala ng baril dahilan ng pagkasawi.
Patuloy naman ang follow up operation ng mga awtoridad para matunton ang salarin. - sa panunulat ni Maze Aliño-Dayundayon
Mahigit P1-M halaga ng shabu sa ang nasabat sa buy-bust operation sa Caloocan City.
Naaresto naman ang suspek na si Jessie Zozobradon, alyas “Jess”, 32 anyos, residente ng Barangay 174.
Ayon kay Northern Police District (NPD) Director, Brig. Gen. Ponce Rogelio Peñones Junior, nakumpiska kay Zozobradon ang nasa 150 grams ng shabu.
Nahaharap sa kasong paglabag sa Republic Act 9165 o Comprehensive Dangerous Drugs Act of 2022 ang suspek. —sa panulat ni Jenn Patrolla