Ibabablik ng National Capital Region Police Office o NCRPO ang pagtatalaga ng bus marshalls o ang mga pulis na kasamang bumibiyahe ng mga city buses sa Metro Manila.
Ito’y upang matiyak ang kaligtasan ng publiko makaraan ang sunud-sunod na insidente ng bomb scare sa iba’t ibang panig ng Kamaynilaan nitong mga nakalipas na araw.
Ayon kay NCRPO Director Joel Pagdilao, paiigtingin pa nila ang kanilang security measures sa pamamagitan ng pagdaragdag ng mga foot patrol sa mga matataong lugar.
Magtatalaga rin sila ng mga dagdag na puwersa lalo na sa mga lugar na may mataas na crime rates kahit gabi.
Sinabi pa ni Pagdilao na katuwang nila sa pagbabantay ang mga tauhan ng barangay bilang bahagi na rin ng kanilang paghahanda sa nalalapit na araw ng halalan.
By Jaymark Dagala
