Sumampa na sa mahigit Isang Bilyong Piso ang naitalang halaga ng pinsalang iniwan ng bagyong Urduja sa bansa partikular na sa mga lalawigan ng Eastern Samar, Samar at Leyte.
Ayon sa NDRRMC o National Disaster Risk Reduction and Management Council, nasa 543 Milyong Piso ang naitalang halaga ng pinsala sa imprastraktura habang 465 Milyong Piso naman ang naitalang pinsala sa sektor ng agrikultura.
Posible pang tumaas ito ayon kay NDRRMC Spokesperson Mina Marasigan dahil hinihintay pa rin nila ang mga datos mula sa iba pang mga lugar na lubhang binayo ng nagdaang bagyo.
Samantala, nananatili pa rin sa 41 ang bilang ng mga nasawi habang nasa 45 naman ang bilang ng mga nawawala sa pananalasa ng bagyo.