Pumalo na sa halos 2K ang bilang ng mga naaresto matapos lumabag sa election gun ban mula buwan ng Enero.
Ito ay bilang bahagi ng mga hakbang ng Philippine National Police (PNP) para sa seguridad upang matiyak ang mapayapa at maayos na pagsasagawa ng national and local elections sa Mayo a-9.
Sa datos ng PNP, may kabuuang 1,931 ang naaresto dahil sa paglabag sa ipinaiiral na gun ban.
Sa nasabing bilang, 1,871 sa mga naaresto ay mga sibilyan; 35 ay mga security guard; at 16 naman ang mga pulis na lumabag at 9 na sundalo.
Nangunguna sa mga lugar na lumabag ay ang National Capital Region (NCR) na may 654; na sinundan ng central Visayas na may 212; gitnang Luzon na may 126; CALABARZON na may 203; at kanlurang Visayas na may 110.
Nakumpiska naman sa naturang operasyon ang 1,490 na baril, 8, 188 piraso ng bala at 703 nakamamatay na armas o patalim.
Nahaharap sa pagkakulong ng hindi bababa sa isang taon ngunit hindi hihigit sa 6 na taon at hindi dapat sumailalim sa probation ang mga nahuling lumalabag.
Nahaharap din sila sa disqualification mula sa paghawak ng pampublikong opisina, pag-alis ng karapatan sa pagboto, at pagkansela o permanenteng diskwalipikasyon sa pagkuha ng lisensya sa kanilang baril. — sa panulat ni Angelica Doctolero