Judith Estrada-Larino

Binubuo na ng PNP Directorate for Operations at PNP Information Technology Management Service ang isang drug war database system.

Sinabi ni PNP Director for Operations Police Major General Val De Leon na ang nasabing database ay tataguriang Drug Related Data Integration and Generation System (PNP-DRDIGS).

Ayon kay De Leon, ang naturang sistema ay magsisilbing digital library ng lahat ng datos, intelligence reports at makabuluhang impormasyon kaugnay sa kampanya ng pnp laban sa iligal na droga.

Ito rin aniya ang magiging basehan para maisagawa ng epektibo ang anti illegal drug operations.

Hindi muna magtatrabaho sa anumang ahensya ng gobyerno si Vice President Leni Robredo.

Sagot ito ni Atty. Barry Gutierrez, Spokesperson ni Robredo sa posibilidad na pagsisilbi muli ng vice president sa gobyerno sa ilalim ng Marcos administration.

Sinabi ni Gutierrez na naka-focus lamang ang atensyon ni Robredo sa pagtatapos ng kanyang termino at magkaruon ng maayos na transition at pagsasara ng lahat ng programa ng Office of the Vice President.

Maaari aniyang makikiisa si Robredo sa isang civil society non-government organization para maipagpatuloy ang serbisyo sa mga Pilipino.

Ipinabatid ni Gutierrez ang plano ni Robredo na paglulunsad ng magugunitang inanunsyo ng kampo ni Robredo ang paglulunsad ng non-government organization na Angat Buhay sa July 1 o isang araw matapos siyang bumaba sa pwesto.

Pursigido si House Deputy Speaker Rufus Rodriguez na isulong ang apat na taong suspensyon ng Excise Tax sa fuel at iba pang oil products.

Ito ayon kay Rodriguez ay dahil inaasahan niyang sisirit pa ang presyo ng diesel, gasolina, cooking gas at iba pang produktong petrolyo dahil sa desisyon ng European Union na suspendihin ang 90% ng oil imports nito mula sa Russia hanggang katapusan ng 2022.

Ipinabatid ni Rodriguez na priority niyang ihain muli sa pagbubukas ng 19th Congress ang panukalang itigil ang pangongolekta ng fuel taxes sa loob ng apat na taon kung kailan inaasahan naman aniyang makakarekober na ang ekonomiya mula sa COVID-19 pandemic.

Kasabay nito, kinontra ni Rodriguez ang panukalang magpatupad ng mga bagong buwis o itaas ang kasalukuyang tax rate para makaipon nang pambayad sa halos 13 trillion pesos na utang ng bansa.

Laya na mula sa Pasay City Jail ang dalawang opisyal ng Pharmally Pharmaceutical Corporation.

Sina Mohit Dargani at Linconn Ong ay lumabas ng bilangguan pasado alas-9 kaninang umaga.

Ayon kay BJMP Spokesperson Chief Inspector Xavier Solda, alas-8 ng umaga nang matanggap nila ang release order na pirmado ni Senate President Vicente Sotto, III.

Magugunitang November 2021 nang ilipat sa Pasay City Jail sina Dargani at Ong matapos magmatigas na ibunyag kung nasaan ang mga financial documents ng kumpanya na hinihingi ng Senate Blue Ribbon Committee.

Si Ong ay hawak na ng senado nuon pang September 21, 2021 matapos i-contempt dahil sa pag iwas sa mga tanong ng mga senador at pagsisinungaling samantalang naaresto si Dargani nuong November 14 nang tangkaing lumabas ng bansa sa Davao City International Airport.

Patuloy ang apela ng Federation of Jeepney Operators and Drivers Association of the Philippines (FEJODAP) kaugnay sa ipinatutupad na modernization program ng gobyerno sa sektor ng transportasyon.

Iginiit sa DWIZ ni FEJODAP President Ricardo Boy Rebano na hindi kakayanin ng mga jeepney driver at operator ang mga requirement sa modernisasyon kaya’t maraming prangkisa na nila ang nawalan ng silbi.

Sinabi ni Rebano na mawawalan ng saysay ang mga ganitong hakbangin kung hindi naman makaka comply partikular ang mga maliliit na driver at operator na hirap na hirap na lalo na ngayong may pandemiya.

Nasa maayos na kalagayan si Vice President Leni Robredo, halos tatlong linggo makalipas ang presidential elections kung saan siya pumangalawa.

Ayon ito kay Atty. Barry Gutierrez, Spokesperson ni Robredo na nagsabi ring “at peace” na ang bise presidente at tanggap na kung anuman ang magiging resulta ng eleksyon.

Sinabi pa ni Gutierrez na itinuturing ni Robredo na reward ang pagdalo niya sa graduation ng anak sa New York lalo pa’t tuluy-tuloy ang kanilang pagtatrabaho sa nakalipas na anim na taon.

Kasabay nito, inihayag ni Gutierrez na bahala na si Robredo kung pormal na magku-concede bagamat sa tingin niya ay nasabi at nagawa na ng pangalawang pangulo ang mga dapat nitong gawin.

Pangunahing tututukan ni incoming DSWD Secretary Erwin Tulfo ang COVID-19 Pandemic Recovery.

Tiniyak ito ni Tulfo na nagsabi ring ipa-prioritize niya ang mas mabilis na pagbibigay ng financial aid at relief goods sa panahon ng kalamidad.

Sinabi ni Tulfo na marching order sa kaniya ni President Elect Ferdinand Bongbong Marcos, Jr. na tugunan ang problema sa pandemya.

Ipinabatid pa ni Tulfo na sisiguraduhin niyang mabibigyan  ng ayuda ang mga nawalan ng trabaho sa pamamagitan nang naiwalang multi billion peso budget ng DSWD na kabilang sa 10 ahensyang nakakatanggap ng pinakamalaking pondo sa pambansang budget.

Hindi lamang mga Syrian kundi maging ang mga Pilipino sa Syria ang damay sa kakulangan ng mga pangunahing pangangailangan tulad ng pagkain at gasolina, sa gitna ng hamon ng pagka bangkarote ng nasabing bansa.

Nabatid na kabilang ang mga Pilipino sa pumipila ng 10 hanggang 12 oras para lamang makabili ng gasolina.

Sinabi ng ilang Pinoy sa Syria na bagamat nakikita nila ang mga pagbabago sa gobyerno, nangangamba naman ang mga itong magbabalik sila sa normal sa madaling panahon.

Kaugnay nito, kumikilos na ang DFA at Overseas Welfare Authority para mai-repatriate ang mga Pilipino sa Syria na gusto nang umuwi ng Pilipinas.

Nagbigay ng thanksgiving dinner sa Malakanyang ang Pangulong Rodrigo Duterte sa mga miyembro ng gabinete niya, isang buwan bago siya bumaba sa pwesto.

Ayon kay Cabinet Secretary Melvin Matibag, ilang kanta ang inawit ng pangulo kabilang ang “Ikaw” sa saliw ng Philippine Philharmonic Orchestra para sa mga cabinet member kasama ang kanilang asawa.

Binigyang diin ni Matibag na ang nasabing dinner ay pagdiriwang at pagpapasalamat ng pangulo sa sakripisyo ng cabinet members sa nakalipas na anim na taon.

Kinilala aniya ng pangulo ang achievements ng administrasyon at nagpasalamat din ang pangulo sa mga asawa ng cabinet members na pinayagang mag serbisyo publiko.

Hindi naman masabi ni Matibag kung kagabi na ang huling pagkakataon na pupulungin ng pangulo ang kanyang cabinet members bago tuluyang maging private citizen na sa June 30.

Ibinahagi sa facebook ni CHEd Chairman Prospero Popoy De Vera, III ang ilang litrato at video ng pangulo sa pagho-host ng nasabing thanksgiving dinner.

Narekober na ng Philippine Airforce (PAF) ang Hermess 900 Unmanned Aerial Vehicle nito sa Baungon, Bukidnon matapos itong bumagsak nuong Sabado.

Ang nasabing AUV ay narekober ng PAF sa magubat na bahagi na buo pa maliban lamang sa nasirang mga pakpak nito.

Walang naitalang nasawi o danyos sa mga ari-arian dahil sa pagbagsak ng naturang AUV sa Silangan ng Lumbia Airport.