Judith Estrada-Larino

Timbog ang dalawang lalaki na nakuhanan ng mga armas at illegal drugs sa isang checkpoint sa Davao City.

Ayon sa Davao City Police, naharang nila katuwang ang Task Force Davao ang mga suspek na sakay ng isang pick up truck.

Dalawang pistola ang unang nakuha sa mga suspek subalit tumambad sa mga otoridad sa pag inspeksyon sa sasakyan ang hindi bababa sa anim napung armas at ibat-ibang uri ng bala.

Ang mga armas ay nakapangalan umano sa isang security agency subalit walang dalang travel authority o permit to transport para sa mga ito ang mga suspek na nahaharap na sa mga kaukulang kaso.

Patay ang apat na PDL o persons deprived of liberty matapos makipag barilan sa mga tauhan ng BJMP nang magtangkang tumakas sa Liangga District Jail sa Surigao Del Sur.

Ipinabatid ni BJMP Spokesman Chief Inspector Xavier Solda na nang agaw ng baril at nang hostage ng jail guards ang isang grupo ng mga preso subalit bigo ang mga itong makatakas.

Naghahanda na aniya ng almusal ang mga tauhan ng Liangga District Jail nang sunggaban ng labing isang PDL ang isang personnel na nuo’y magbubukas sana ng gate ng selda para ipasok ang kanilang pagkain.

Sinabi ni Solda na mabuti na lamang at kaagad naka responde ang iba pang duty personnel kayat nagkabarilan ang dalawang panig na ikinasawi ng apat na preso at sugatan naman ang isang personnel.

Iniimbestigahan na ang insidente kung saan ang mga nasawing bilanggo ay hinihinalang miyembro ng NPA.

Hindi na makontak ng mga senador  ang isang opisyal ng Pharmally Pharmaceutical Corporation matapos ibunyag na tinamper nila ang expiration dates ng mga face shield na sinupply sa DOH nuong isang taon.

Ayon ito kay Senate Blue Ribbon Committee Chair Richard Gordon sa gitna na rin aniya nang alok ng Senado ni Krizle Grace Mago para sa kanyang proteksyon.

Sinabi ni Gordon na hindi na makontak ng Blue Ribbon Committee si Mago na una na aniyang nagsabing pag iisipan ang alok na proteksyon ng Senado.

Hindi kakailanganin ang militar sa pagpapatupad ng kada polisiya sa gobyerno.

Binigyang diin ito ni Vice President Leni Robredo matapos batikusin ang Pangulong Rodrigo Duterte sa pahayag na paggamit sa militar para matiyak ang tahimik na 2022 National Elections.

Sinabi ni Robredo na kailangan ang militar hindi para katakutan kundi para tumulong sa pagpapanatili ng kaayusan lalo na kung mayruong eleksyon.

Patuloy na umaapela ng dasal at tulong ang Carmelit Monastery sa Tanay, Rizal.

Ito ay matapos mag positibo sa COVID-19 ang labing walong madre ng nasabing monasteryo na pawang fully vaccinated na maliban lamang sa isa na umiinom ng chemo tablets.

Ayon sa pamunuan ng monasteryo ..pawang mild cases lamang ang nararanasan ng mga madre na unti unti namang umaayos ang kalagayan.

Hindi pa rin bumibitaw si Vice President Leni Robredo sa pag-asang isang kandidato lamang ang isasabong ng united opposition sa 2022 national elections.

Sinabi ni Robredo na tiwala pa rin siya sa mga susunod pang unity talks sa iba pang kandidato ng oposisyon.

Ayon kay Robredo ..wala siyang choice kundi maglabas ng desisyon bago mag October 8 kayat mayruon pa siyang dalawang linggong pag isipan ang kanyang political move sa darating na eleksyon.

Pinag iisipan aniya niyang mabuti para ang anumang susuunging posisyon ay makakapigil sa pagbabalik sa posisyon ng Marcoses at tatapos sa mga aniya’y korupsyon sa gobyerno.

Isinusulong ni Trade Secretary Ramon Lopez ang pagbubukas muli ng mga gym sa ilalim ng alert level systems.

Sa katunayan ..ipinabatid ni Lopez na ipinanukala nila sa IATF na payagan na ang re-opening ng mga gym sa 10 percent capacity dahil malaking tulong ang pag e-exercise para tumaas ang immunity kontra COVID-19 at iba pang sakit.

Kapag pinayagan na ang pagbubukas ng mga gym ..sinabi ni Lopez na o obligahin nila ang mga ito na maglagay ng air purifiers.