Judith Estrada-Larino

Nagpalabas ng mga bagong testing at quarantine protocols ang IATF para sa mga pasaherong dumarating sa Pilipinas mula sa mga bansang nasa green at yellow list.

Ayon kay Presidential Spokesman Harry Roque, epektibo ngayong araw na ito, Oktubre 8 ang mga fully vaccinated individuals mula sa green o yellow list countries ay sasailalim sa facility based quarantine hanggang maipalabas ang negative RT-PCR testing result sa ika limang araw, pag home quarantine hanggang ika sampung araw.

Bukod pa ito sa mahigpit na pag monitor ng Bureau of Quarantine sa mga sintomas habang nasa facility ang nasabing indibidwal at ang mga dayuhan ay oobligahing mag secure ng sariling pre-booked accommodation ng hanggang anim na araw.

Sinabi ni Roque na pareho rin ang mga naturang protocol na ipatutupad sa mga unvaccinated individuals o hindi pa malinaw ang vaccination status maliban na sa facility based quarantine ang mga ito hanggang maipalabas ang negative RT-PCR testing na ginawa sa ika pitong araw. —sa ulat ni Jopel Pelenio (Patrol 17)

Operational na simula ngayong araw na ito ang Bicol International Airport.

Kasunod na rin ito nang isinagawang inagurasyon kahapon na pinangunahan ng Pangulong Rodrigo Duterte.

Ayon sa DOTR, uubra makapag accommodate ng 2-M pasahero taun-taon ang Bicol International Airport.

Una nang tinagurian ng Pangulong Duterte ang Bicol International Airport bilang most scenic gateway.

Patuloy ang paggalaw ng bagyong Maring habang nag iipon ng lakas sa susunod na 12 hanggang 24 na oras.

Ayon sa PAGASA, ang bagyong Maring ay posibleng lumakas bukas, araw ng Sabado at maging severe tropical storm sa Lunes ng umaga.

Ang sentro ng bagyong Maring ay pinakahuling namataan sa layong 495km silangan ng Catarman, Northern Samar.

Taglay ng bagyong Maring ang pinakamalakas na hanging umaabot sa 55km/hr malapit sa gitna at may pagbugso na umaabot sa 70km/hr.

Ang bagyong Maring ay kumikilos pa timog kanluran sa bilis na 15km/hr.

Hindi ipinapakita o patunay ng Nikkei COVID-19 Recovery Index ang aktuwal na pandemic recovery ng bansa.

Ayon ito kay Vaccine Czar Carlito Galvez, Jr., matapos mangulelat ang Pilipinas sa 121 bansang ini-evaluate hinggil sa pandemic response.

Sinabi ni Galvez na dapat ikunsider ng index ang magkakaibang karanasan ng kada bansa na nahaharap sa COVID-19 pandemic.

Ang data aniyang ginamit ng nikkei ay sumasakop lamang sa buwan ng Setyembre kung kailan nasa kasagsagan ang paglaban ng bansa sa paglaban sa Delta variant habang bumababa ang kaso ng COVID-19 sa ibang bansa.

Inihayag ni Galvez na naging batayan sa naturang index ang infection management, vaccination at mobility.

Hinaharang umano ng ilang gobernador ang pamamahagi ng COVID-19 vaccines sa mga munisipalidad dahil sa pulitika.

Ayon ito kay Vaccine Czar Carlito Galvez, Jr. dahil maraming doses ng vaccine ang naka imbak lamang sa mga bodega ng ibat-ibang rehiyon.

Dahil dito, sinabi ni Galvez na ang National Government na ang nagsimulang mamahagi ng mga naturang bakuna sa mga munisipalidad.

Pumapalo na sa mahigit 81-M doses ng COVID-19 vaccines ang nai-deliver na sa Pilipinas hanggang kahapon.

Magtataas ng singil sa kuryente ngayong buwan ang Meralco.

Ayon sa Meralco, tataas ng .0283 ang singil sa kada kilowatt hour ng kuryente na ngayo’y papalo na sa 9.1374.

Dahil dito, dagdag na P5.66 ang singil sa mga kumukunsumo ng 200 kilowatt hour, P8.49 sa mga kumukunsumo ng 300 kilowatt hour at P14.15 sa mga kumukunsumo ng 500 kilowatt hour.

Sinabi ng Meralco na ang rate adjustment ay dulot ng mataas na transmission charge.

Ang nasabing taas singil ay ika pitong beses na ngayong taon.

Nakapagtala ng mataas na mga bagong kaso ng COVID-19 ang tatlong rehiyon sa bansa.

Kabilang dito, ayon kay Health Undersecretary Maria Rosario Vergeire ang Bicol Region, Zamboanga Peninsula at MIMAROPA.

Ipinabatid ni Vergeire na ang Bicol ay nakapagtala ng halos 44,000 COVID-19 cases, mahigit 43,000 naman ang Zamboanga Peninsula at halos 30,000 cases sa MIMAROPA.

Samantala, inihayag ni Vergeire na ang Cordillera Administrative Region (CAR), Ilocos Region at Cagayan Valley ay nananatiling nasa high risk classification dahil sa bilang ng COVID-19 cases.

Unti unti nang bumababa ang kaso ng COVID-19 sa Quezon City kasunod na rin nang tuluy tuloy na testing at pagbabakuna sa mga residente rito.

Sa katunayan, ipinabatid ni Dr Rolando Cruz, pinuno ng QC Epidemiology and Surveillance Unit na nakapagtala ng negative growth rate ang lungsod nitong nakalipas na dalawang linggo kung saan ang average daily case na mahigit 1,000 ay naging 500 na lamang.

Gayunman, sinabi ni Cruz na uubrang tumaas muli ang kaso kung ititigil ang testing at pagbabakuna sa mga residente sa pamamagitan ng granular vaccination strategy.

Nakikipag ugnayan na ang COMELEC sa NTC sa pagaaral ng mga posibleng batas laban sa paggamit ng emergency alert system para sa political agenda.

Ayon kay COMELEC Spokesman James Jimenez, hinihintay nila ang resulta ng imbestigasyon ng NTC sa alert system matapos mag file ng COC si dating Senador Bong Bong Marcos na sa tiningi nila ay wala namang nalabag sa elections law.

Gayunman, pinagaaralan aniya nila ang mga posibleng batas laban sa pag abuso sa emergency alert system.

Sinabi ni jimenez na bago ang nasabing strategy kayat nais nilang matutukan kung may legal na basehan ang paggamit ng alert system sa eleksyon.