Judith Estrada-Larino

Bumuhos ang pagbati kay Veteran Journalist Maria Ressa matapos itanghal na Nobel Peace Prize Awardee sa taong ito matapos igiit ang Press Freedom sa ilalim ng Duterte administration.

Ayon sa Foreign Correspondents Association of the Philippines (FOCAP), ang panalo ni Ressa ay panalo rin ng Press Freedom Advocates ng bansa.

Binigyang diin naman ng National Union of Journalist of the Philippines (NUJP) na ang nasabing award ni Ressa ay magsisilbing inspirasyon sa iba pang mamamahayag na inaatake ang kalayaan sa pagsasalita.

Nagpaabot din ng pagbati kay Ressa maging sina UN Secretary General Antonio Guterres, dating US Secretary of State Hillary Clinton at Nobel Laureate Malala Youzafzai.

Sinabi ni Guterres na ang award ni Ressa ay pagkilala sa mahalagang papel ng journalists at pagpapagana ng mga efforts para sa isang Free, Independent and Diverse Media.

Pinuri ni Clinton si Ressa sa nakayanang tila pressure ng Duterte administration dito at paglaban sa pagpapakalat ng mga maling impormasyon sa Facebook.

Inihayag naman ni Yousafzai na malaking karangalan ang paglaban ni Ressa sa pagsusulong ng press freedom na dapat aniyang ituloy kasabay ang hamon sa mga lider na palakasin ang social systems.

Maging sina Canadian President Justin Trudeau at us President Joe Biden ay nagpaabot din ng pagbati kay Ressa maging sa kapwa Nobel Peace Prize Awardee na si Dmitry Muratov ng Russia.

Sumakabilang buhay na kaninang umaga si Commission on Human Rights (CHR) Chairperson Jose Luis Martin “Chito” Gascon.

Sa kanyang post sa Facebook, sinabi ni Miguel Gascon, kapatid ng opisyal na COVID-19 ang ikinamatay nito.

Si Gascon ay CHR Chairman simula pa nuong 2015 matapos italaga ng dating Pangulong Noynoy Aquino at nakatakdang mag tapos ang termino sa May 2022. —sa ulat ni Jaymark Dagala (Patrol 9)

Umalma si Manila Mayor Isko Moreno sa mga panawagan sa social media na pag atras niya sa 2022 Presidential Elections.

Iginiit ni Moreno na karapatan niyang tumakbo sa eleksyon dahil umiiral naman ang demokrasya sa bansa.

Tinawanan na lamang ng Alkalde ang nag trending na #withdrawisko at nagbiro pang tila pinawi withdraw ang kaniyang sahod.

Tiyak na muling mabubuhay ang ekonomiya ng bansa.

Binigyang diin ito ni Presidential Adviser for Entrepreneurship at Go Negosyo Founder Joey Concepcion matapos pasalamatan ang gobyerno sa pakikinig sa mga panawagang luwagan ang guidelines sa full vaccinated individuals.

Kasunod na rin ito nang inilabas ng IATF na bagong testing at quarantine protocols sa full vaccinated international passengers mula sa green at yellow list countries na pagsailalim sa RT PCT test at kaagad pauuwiin kapag nag negatibo at sa bahay na lamang magku quarantine sa loob ng limang araw.

Sinabi ni Concepcion na ang nasabing hakbang ay magandang pamasko na rin sa mga Pilipino.

Patuloy ang pag akyat ng kumpirmadong kaso ng COVID-19 sa bansa na nasa mahigit 2.6-M na kasama ang mahigit 10,000 o nasa 10,670 na mga bagong kaso ng COVID-19.

Ayon sa DOH, naitala sa 118,203 ang active cases ng COVID-19 kung saan 77.7% ang mild, 13.4% ang asymptomatic, 2.7% ang severe at 1.1% ang critical condition.

Samantala, sumirit pa sa halos 2.5-M ang total recoveries matapos maitala ang 7,691 na mga bagong gumaling sa COVID-19.

Sumampa naman na sa mahigit 39,000 ang death toll nang maitala ang 191 na mga bagong nasawi sa virus. —sa ulat ni Aya Yupangco (Patrol 5)

Isinumite na ng DOJ for resolution ang drug complaint na isinampa ng pulisya laban kay Julian Ongpin na itinuturing na person of interest sa pagkamatay ng artist na si Bree Jonson.

Kasunod na rin ito nang pagdalo ni Ongpin, kasama ang dalawang abogado niya sa pagpapatuloy ng preliminary investigation para isumite ang kanyang supplemental counter affidavit.

Si Ongpin na anak ng negosyanteng si Roberto Ongpin ay kinasuhan kaugnay sa pagbitbit ng droga matapos marekober sa kanya ang 12 grams ng cocaine sa kuwartong tinuluyan nila ni Jonson sa isang beach resort sa La Union.

Inulan ng mga reklamo sa social media ang telecommunications company na Smart-PLDT.

Sa kanilang posts sa Facebook, inireklamo ng mga subscriber ang anila’y palpak na serbisyo ng kumpanya tulad ng mabagal na internet, madalas na pagkawala ng signal o connection, madayang promo at hindi maaasahang customer service.

Malaking porsyento rin ng mga nag reklamo sa social media laban sa mabagal na internet ng Smart-PLDT ay nagsabing nakakaapekto ito sa online class ng kani-kanilang mga kaanak gayundin ang sitwasyon ng mga naka work from home partikular ang mga madalas sumalang sa online meetings.

Nagbanta ang maraming netizens na lilipat na sila ng network dahil pikang-pika na sila sa palpak na serbisyo ng Smart-PLDT. —sa ulat ni Jaymark Dagala (Patrol 9)

Pupuwede nang mag biyahe sa mga lugar na nasa ilalim ng GCQ at MGCQ ang mga menor de edad at fully vaccinated individuals na mahigit 65 taong gulang mula sa Metro Manila.

Ayon ito kay Presidential Spokesman Harry Roque matapos magpasok ng probisyon ang IATF sa mga guidelines hinggil sa pilot implementation ng alert level system para sa COVID-19 response sa Metro Manila.

Bukod sa menor de edad at fully vaccinated individuals na 65 years old pataas, sinabi ni Roque na pinayagan na ring makapag biyahe ang mga fully vaccinated indivuals na mayroong immunodeficiencies, comorbidities at iba pang health risks at fully vaccinated pregnant women.

Gayunman, iginiit ni Roque na kailangan pa ring sumunod sa iba pang panuntunan at  health protocols na ikinakasa ng DOT at LGU na nakakasakop sa lugar na pupuntahan. —sa ulat ni Jopel Pelenio (Patrol 17)

Hindi itatago ng DOJ ang resulta ng imbetigasyon sa drug war killings.

Tiniyak ito ni Justice Secretary Menardo Guevarra matapos igiit ni UN High Commissioner for Human Rights Michelle Bachelet na i-publish ng gobyerno ang review nito sa nasabing usapin.

Ayon kay Guevarra, walang intensyon ang gobyerno na itago ang resulta ng review at investigation nito sa anti illegal drug campaign ng gobyerno.

Sinabi ni Guevarra na aprubado na ng Pangulong Rodrigo Duterte ang rekomendasyon ng DOJ para sa kaukulang case build up matapos i-forward sa NBI ang 51 mula sa 52 kaso ng drug war deaths.

Hindi na itutuloy ni Vice President Leni Robredo ang unity talks sa mga kapwa presidentiables nya.

Ito ayon kay Robredo ay dahil ang focus niya ngayon ay suporta ng sambayanan isang araw matapos niyang maghain ng COC para sa 2022 National Elections.

Bukas pa rin naman aniya sila sa pag uusap subalit hindi na sa pag iisa sa mga aniya’y principal kundi ng suporta ng taumbayan.

Binigyang diin ni Robredo na mayruong hangganan ang pagsisikap niyang mapag isa sana ang oposisyon dahil ang mahalaga ay ang kapakanan ng mga Pilipino.