Walang Pilipinong nadamay sa shooting incident sa Beirut, Lebanon.
Ayon ito sa report ng Philippine Embassy sa Lebanon bagama’t patuloy ang pagmo-monitor nito sa mga kaganapan sa area.
Kasunod na rin ito nang mahigpit na paalala ng embahada ng bansa sa alert level 2 na nakataas sa Lebanon dahil sa kasalukuyang political economic situation nito.
Kaya’t dapat maging vigilant ang Filipino community at iwasan ang paglabas at pagpunta lalo na sa mga matataong lugar.
Nagbukas ng ilang gates ang tatlong dam sa Luzon para sa inaasahang spilling operations ngayong araw na ito.
Ayon sa PAGASA, ala-6 ng umaga nagbukas ng dalawang gates sa tig isang metro ang Ambuklao Dam sa Benguet.
Ang water level ng Ambuklao Dam ay nasa 751 meters o isang metro na lamang sa spilling level nito.
Samantala, ang Binga Dam ay nagbukas ng tatlong gate sa 1.5 meters kada isa dahil malapit na sa 575 meter normal high water level ang reservoir ng water level ng Binga Dam.
Mahigit isang metro na lamang na malapit sa 193 meter spilling level ang water level ng Magat Dam kaya’t nagbukas ito ng isang gate.
Una nang nagpalabas ng tubig ang mga naturang dam dahil sa bagyong Maring.
Nakipagsanib puwersa na ang COMELEC sa iba’t ibang social media sites para mabantayan ang mga post ng mga kandidato sa 2022 National Elections.
Ipinabatid ni COMELEC Spokesperson James Jimenez na binigyan sila ng access at tools ng Facebook, Instagram, YouTube at Tiktok para ma regulate ang political advertisements at ilang aktibidad ng mga tatakbong kandidato.
Sinabi ni Jimenez na magsisimula silang maghigpit ng political campaign sa February 2022 na simula na ng official campaign period para sa mga national candidates.
Mayruon aniya silang itinalagang mga tao sa ibat ibang social media sites para mabantayan ang mga pulitiko.
Tumaas ang cash remittances na ipinadaan ng mga Pilipino sa bangko sa buwan ng Agosto.
Ipinabatid ng Bangko Sentral ng Pilipinas (BSP) na nasa 5.1% o katumbas ng halos $2.7-B ng cash remittance mula sa mga Pinoy na nasa ibang bansa.
Malaking kontribusyon sa pagtaas ng remittance ay mula sa mga land at sea based workers partikular sa Amerika, Malaysia at South Korea.
Tiniyak ng DOH na accurate o tama ang COVID-19 statistics kahit hindi kasama ang resulta mula sa antigen testing.
Ayon kay Health Undersecretary Maria Rosario Vergeire, apat o limang LGU lamang sa Metro Manila ang gumagamit ng antigen tests.
Ipinabatid ni Vergeire na batay sa kanilang analysis sa buong bansa walang 5% ang nagpa positive sa antigen test at nababawasan pa ito aniya kapag naba validate nila.
Natukoy na ng DILG ang Local Government Units sa labas ng NCR na maaaring isailalim sa alert level system.
Ayon ito kay DILG Undersecretary Epimaco Densing, III matapos ilunsad ang alert level systems sa Metro Manila nuong Setyembre 16.
Gayunman hindi naman binanggit ni Densing ang mga nasabing lugar.
Pinaiimbestigahan ng PNP ang mga nasa likod nang paggawa ng mga pampasabog.
Kasunod na rin ito nang pagkaka aresto sa umano’y mastermind at mga kasabwat nito na supplier ng mga sangkap sa paggawa ng pampasabog sa magkahiwalay na operasyon sa General Trias, Cavite at Lucena City sa Quezon.
Ayon kay PNP Chief Police General Guillermo Eleazar, unang naaresto si Charlito Tenorio na supplier ng controlled explosive substances sa Cavite sa ikinasang buy-bust operation at sumunod na naaresto sa ikinasang follow-up operations ng CIDG sa Lucena City ang itinuturong mastermind ni Tenorio na si Jr Suson .
Nakumpiska sa naturang operasyon ang nasa 750 kilos ng ammonium nitrate na nakasilid sa 30 sako at 1,000 piraso ng improvised blasting cap na naka karga sa isang container van na nagkakahalaga ng P200,000. —sa ulat ni Jaymark Dagala (Patrol 9)
Palalakasin pa ng PNP ang ugnayan nito sa AFP kaugnay sa kampanya nila kontra loose firearms.
Kasunod na rin ito nang pagkakaaresto sa lima katao kabilang ang isang pulis at dalawang sundalo na sangkot sa gun running o iligal na pagbebenta ng mga armas sa datu odin sinsuat, maguindanao.
Kabilang sa mga naaresto sina Patrolman Eliver Jay Anggot Soverano na nakatalaga sa Police Regional Office-Bangsamoro Autonomous Regional Crime Laboratory, Army Staff Sgt Glenn Sangyao at Staff Sergeant Reynaldo Dichosa,II at mga sibilyang sina Datu Morjan Kunakon Tumindig at Adams Tumindig
Tiniyak ni PNP Chief Police General Guillermo Eleazar ang kasong kriminal at administratibo na isasampa sa mga pulis sa pagkakasangkot sa gun running activities na posibleng gamitin ng mga nais maghasik ng gulo at karahasan sa 2022 National Elections. —sa ulat ni Jaymark Dagala (Patrol 9)
Hindi uubrang iapela ang alert levels kaugnay sa COVID-19 pandemic.
Ito ayon kay Health Undersecretary Maria Rosario Vergeire ay dahil idinideklara ang alert levels base sa scientific metrics.
Una nang ipinaabot ng healthcare workers ang anila’y maagang pagbaba sa alert level 3 ng NCR simula bukas, Oktubre 16 hanggang 31.
Tila babawi si Carlos Yulo sa pag depensa niya sa kanyang titulo sa 50th FIG Artistic Gymnastics World Championship sa Kitakyushu, Japan sa susunod na linggo.
Pursigido si Yulo na makuha pa rin ang Gold Medal sa floor exercise na una niyang napanalunan sa 2019 edition sa Stuttgart, Germany kung saan siya ang kauna-unahang Pilipinong nakakuha ng nasabing titulo.
Ang nasabing event na gagawin mula Oktubre 19 at 20 ay pagkakataon para bumawi sa kanyang no medal finish sa Summer Games.